SAM ANG THENA KHAWVEL (LYRICS)

-PI ROSIEM

1. Thlatu suola an mâwl leiin, 
Thina le lungngaina hai hi, 
Hnam tin chungah an lêng a; 
Kei khawm ka chunga tlung hin, 
Lungngaiin ka fâwn vêl ie.

Ka ngai ie chatuon ram, 
Ka ngai ie la Pa ram khi; 
Thlarauin mi thuoi la, 
Hmangaihai an châwlna hmun 
Mîn tlun ngei rawh.

2. Khawvêl nun ka ngaituo hin chu, 
Lung a mâwlin sa-lung a zîng; 
Thlafam muola an liem hin, 
Tinkim dâwn a tûl ngei maw, 
Ka lungngai a hung zuol ie.

3. Hmangai fe tahai ka thlîrin,
Thlafamhai zil ang ka kova; 
Hnung ngai lovin an lêng a; 
Lalţhungpha chu ngîrhuolin, 
“Halleluiah” ti’n an lêng.

4. Vân khawpui thara ka tlung pha, 
Sam ang thena um ta naw nih, 
Lungzûr ser ang an kimna, 
Angel vâr Serafim leh, 
Lal lunghnêm chu awi kan tih.