An Open Letter To Pu Joseph Lalrothang President Hmar Inpui

Inza um tak

Pu.

A hmasa takin i kekawk hrui suot tlak ni nawh inlakhawm Hmar hnam ta dinga inpekna ngaisang tak pumin chibai!

Hel kuol lovin ka hril nuomah hei luot nghal el ka tih.

Lainatna thang thak lova tharum hmanga nunghak pawngsuol hlaktu Muolvaiphei khuo mipui lungsenin an chilhlum or vuok hlumna thu a inremna thu i signed pui hi ieng ang lungril puta signed pe el am i na?

A hnuoia point tlawm ka hung tarlang hai hi fip taka ngaituo thra ding le ennawn dinga ngen i nih.

1. Thilthawsuol seng senga khawm Hmar hai chu mi hringna latu ei ni leiin a hming a mawiin pipu dana Thingpui hang khai kha a hun el naw maw?
Thingpui chu a ho taluo ei lo tih a ni khawma, an hnam puon dum, vawk fun 5 that niin hriet a nih a, mipui lungsen insum zo lo thilthaw ngaidam inhnina ding chun ava tam ta lawm lawm de! In mipui hai hin hlutna kan va nei tanaw de!

Thingpui, puon le Vawk meu that a ni ta hnungah Pawngsuoltu chungah Rs 3 lakhs chawi dingin maw inhung inrempui?
Hienghai popo sel thlak theina ding evidence Hmar in ei nei that em em vei leh. Mi hma a thudik hril ngamlo ding khawpa depde le inzapui um ei lo ni hrim a ni, i thuoi Hmar nau hai hi.

2. A Thipa hin thil pawi nasatak a tawk leiin Muolvaiphei thalai haiin ka sawl, ka kham khawm hril lovin an inchana, a tawp a tawpah manin a uma, ama inpuongna dungzuiin nunghak a pawngsuol ngei tih finfiena le a nunghaknu ngei khawma, ama ngei hi a nih tih a identified hnungah iengleia KAN INTUMSUOL tih inziekna a khan i signature mawitak le Nang ngei khawma
Hmar nau laia National awardee umsun ka nih ti pui ngam khawpa i chapo pui, i thiem i varna kha khawlam a um tah a?
I retired hma a i thaw that hai popo le i service laia i hming thatna popo kha '"Joseph Lalrothang" tih mawi taka i ziek khan i ziek bo der el an ta kha.
A hrim hrim thu ah mihriem pakhat thina thu ah ngaidam inhni in i fe a, i fe san tak kha iem ana tih ngaituo thak lova inremna thuthlungah Hmar popo an hekna thu ah maw i zuk signed ngam el chu?

3. Inremna thuthlungah KAN INTUM SUOL tih i signed ta hnungah pawngsuoltu, sorkar khawma khaihlum theina or damsung lungin intang theina dan an siem laiah cheng lakh 3 pe dinga rem tina i hung siem bur el chu. I rorel dan hi hriet thiem a van tak ngei de! A tha e, ei thawsuol paisa zuk chawi khawm a tha ie.

An leh i naunu, Saidan khuo a um le vawisun huna thudik hril lang ding khawma i ko ngam lo, rape victim..a damsunga a lungrila mi hai tluk zo lo a um ta ding le, a thil tuok vangduoi thlaktak leia pasal khawm hmu lo a um thut thei chunga hin Lakh iengzat am pek i tum reng reng?
Vawisun khan kan intum suol tih a khan i kutziek mawi tak khan thaisiet nawk el thei talo dingin i ziek hnan tah a nih a,
I naunu, rape victim hi khawlai hmun tak am andikna le a chanvo indiktak hailang pek in pe nawk tang i ta?

Inza um tak Pu, i thilthaw hi i hrietchiengnaw leia i thaw am, Hmar hnam chun an indikna le an chanvo claim ngam tak tak naw ni hai tih lungril i put lem?

Zinga zingkar Local news, national news le Imphal tieng news popo i tiem phat chun pawitawklo pasal pakhat, pawngsuoltu a an intum suol leiin
Hmar mipui lungsenin an vuok hlum or chilhlum a, ngaidam inhnina in Hmar Inpui haiin pipu danin thingpui inlumin vawk an thata, a ruong hi Gangte puondumin an tuoma, cheng lakh 3 a ral anih, tih a hung suok phat iengtinam hrilfiena pe tang i ta le?

Pu, vawisun in inbiek zo char khan Hmar mipui haiin in inbiekna thu kha iengtinam in inbieka tih an hriet hma rauin KAN INTUM SUOL tih headinga hmangin internet khawvela chun kapdar chuoi chuoiin a lo um tah a, I thlahnuoi deihlim hnuoia chawlhadam le rorelna fel beisei taka lo nghaktu thalai hai lungril hi ava hliem nasa de?
Iengtinam thawidam tang i ta le?Ngaituo ding ava tamta lawm lawm de!

Pu, hi rorelna indik lo tak hi iengtinam hma lak pei i tuma?
Hmar hnam damna dinga zinga ngei ngei thu indik umlo popo sukrel am, i hmingsiet taluo ding laka invengna in Hmar Inpui hi suoksan el i tum ding?

Ringumin

Sd/-
Lalkawthang Hassh Hmar