ANIMATION INCHUKLAI BAWHLUMA TLANSAN; A SUNGHAIIN A MIT AN THAWLAWM

Fox Journal: Kum 25 a upa animation inchuklai chu vawituk inhmatak khan Aravinda Circle, J.P. Nagar, Bengaluru hmunah bike a tlan chu motor lenin a baw hnungin a tlansana, a hmunah a thi nghal. A bawhlumtu motor hi man le hriet ni lovin tuchen hin a la um zing.
A thi pa R. Sandeep a pa Ravi R. chun a naupa a taksa bung dang dang hai thawlawm a nuoma chu a accident naa hin a sie rawn leiin thawlawm a remchang naw a. Amiruokchu, a mit pahni hai hi Dr. Malathi Manipal Hospital, Jayanagar ah an thawlawm tho a nih.

Thi hun lo tak, a hun tlung hmaa a mi maksan a nih. Chuleiin, a mit bek hin khawvel la hmu sien kan ti a nih tiin lungsie takin Sandeep a pa chun a hril a nih.

Sandeep hi private institute a animation course pakhat inchuklai mek, an sungkuoa Jayanagar III Block a um an ni a. A sangnu ruok chu America ah lekha inchukin a um.

Inrinni zan khan Sandeep hi an umna hmuna inthawk hla rak lo, a ruolhai ina zan sawttak party a țhang a ni a. Zingkar dar 4:20 in a bike khala in tieng a pan laiin Qualis motor (a rawng var) in a baw a nih. Sandeep hi a tluknaa a lu a tet a, hospital hnai tak panpui nghal a ni a chu a thisaa phurtlung a nih. Police hai report dan chun an hmunah a thi nghal niin an hril.

Sandeep hin accident a tuok lai hin helmet a khum nawa, an rui hle bawk a nih tiin Rama Ratna Kumar, Senior Traffic Cop in a hril.

A ruol inhnai pui Senthil chun hi laia hmun taka CCTV an sie chu a function naw thu Police haiin an hril chu a hrilsawng a. Motor chu an la hrietchieng thei naw thu an hril. Amiruokchu, hi lai hmun hnai te te a CCTV hmun thuma sie haia inthawk chun motor chu an hung hrietchieng thei vat an ring thu S. Girish, Deputy Commissioner of Police (Traffic – West) chun The Hindu a hril.