Fox Journal: Hun iemani chena inthawka ICI Kohran abikin Țhalai pawl haiin an lo riruong lawk angin hungtlung ding tarik April 7 - 9, 2016 hun sung khin India khawpui New Delhi hmunah "Unchanging Word in a Changing World" (Khawvel danglam zing laia danglam ve ngai lo Pathien thu) ti thupuia hmangin ICI Țhalai Central Inkhawmpui Lien a vawi 32-na hmang ning a tih. Tlungkim ni hi tarik 7 niin Rorelna um nghal a ta, tarik ni 8 le ni 9 hai hi inkhawmna huna hmang ning a tih.
Inkhawmpui lien hmangna ding hi hmun pahni niin, a hmun ding tak hai chu – All India Prayer Fellowship, Mission Hospital Road, Sahurpur, Fatehpurberi, Chhatarpur le Weightlifting Auditorium, Jawaharlal Nehru Stadium, Lodhi Colony hai ning a tih.
Hi Inkhawmpui lien a hin Malzaia inruolsiekna (Rev. Thangngur Music Award) le Hlapawla inruolsiekna (Pu Buonglienkung Music Award) hai nei ni bawk a tih.
Inkhawmpui hun sung hin Pathien thucha hriltu ding mi 6 ruot an ni a, chuong hai chu - Rev. Lalneikhup Hmar, Secretary Finance, ICI; Rev. Lalhmingthang, Secretary Evangelism, ICI; Rev. Lalrohlu, Secretary Hmarbiel South Presbytery, ICI; Rev. H.P Runremthang, YCO & Evangelist-At-Large, ICI; Upa Dr. Zawlthanglien, Vice Chairman CKȚP, ICI le Rev. Vijayesh Lal, Gen. Secretary, EFI hai ruot an nih. Anni hin Pathien hrilna hun an hmang seng ding a nih.
A chunga thuhriltu ding tarlanga um hai baka khin Inkhawmpui hunah Chibai bukna thu-tawi hril dingin mi pawimaw 4 - Rev. Zathangsing Zate, Executive Secretary, ICI; Ms. Darthangmawi, W.C.O, ICI; Warish K. Masih, Moderator’s Episcopal Commissary, Church of North India (CNI) le Shri Kiren Rijiju, Hon’ble Minister of State for Home, Govt. of India, New Delhi hai hun pek an ni a, an hun hai an hmang thei ngei seng ding niin chanchin ei dawng.
Chanchin ei dawng pei danin hi inkhawmpui liena hin New Delhi laia North East kohran le Fellowship chi tum tum hai khawm hi inkhawmpui Pathien thu le hlaa inpawltlangna ding huna hin țhang dinga fiel seng an ni thu Țhalai țhuoituhaia inthawkin ei dawng.
COMMENTS