A THA IE

Kum 1873 khan, mi pakhatin a nuhmeia inthawkin thu a dawnga. A nuhmei le naununghakhai chu Americaa inthawka Europe panin an lo fe hmasa a nih. A nuhmei chun, “Makhata him (Saved Alone)” ti chauin a pasal chu thirhruiin thu a thawn a nih. A nuhmei le a nauhai chu lawng sietna rapthlaktak el an tuoka. A naunuhmei pali hai chu thiin a nuhmei chau chu a damsuok a nih. Kum 1870 khan an nau pasal neisun an chan taa, chu kum nawk chun an sumdawngna hmun chu meiin a kangsieta. A kum thar el ah hieng ang sietna hi an hei tuok nawk a ni a. A rapthlak em em.Chu pa hming chu Horatio Spafford a nih. A sunghai siet tuokna tieng pana a fe lai chun, ei hla hrietlar em em, “Thlamuongna’n tuipui angin a mi chîm a, Lungngaina tuipui fawn lai hin; Ka ta dinga i buotsai thil iengkim chu; A tha ie, Ka thlarau ta dingin” ti hla hi a hung zieksuok tah a nih.

Hi mipa hin hieng ang sietna a tuok laia “A tha ie” ala ti thei rawp el hi ieng lei am ning a ta?Anei popo a chânhnungin, a tha ie a la zuk ti taltal el hi ieng lei am ningata? Alungril ngaituonahai, a phurrikhai le a mangagnahai hi ieng âm an nghat ning a ta? Horatio hin ieng dangah a ngaituonahai, a hmatieng po po an nghat nawa, Isu Kristaah an nghat lem a nih. Ama hin Isu chu ringin ringumtakin a hnung a zuia, ama sandamtu Isu Krista a nei leiin ‘A tha ie’ ala ti thei a nih. Isu Kristaah a beiseina, a hringna po po an nghat tlat leiin harsatna nasatak a tuok lai khawmin huoisen takin hmatieng ala pan ngam a nih.

Philipi 1:21ah Paula chun, ka ta dingin hring hi Krista ana, thi khawm hlawkna a nih tiin a hrila. Hi Krista, vawisunnia ei iring le a hnung ei zui hi a nih inngaitlawmin, mihriem anga insiengin thikhawp raka ei ta dinga hung inbun ruokin, ama thisen ngei chun ei suolhai sawpfaiin, ei suol man bat a mi tlak pek tah a nih. Isu Krista intlanna a hin, ei suolna a then chau niloin, a rengin, krawsah hemdein, ei suolhai a mi ngaidam hmak a nih. Tuorna hrim hrima hi tuor laiin an hawi a um der nawh. Amiruokchu, Sam ziektuin, ‘Tap pumin bu chi fe suok pui sienkhawm, a bu phalhai chawiin hlim takin hung kir a tih’ tia a hril angin, ei tuor laiin rinum hle sienkhawm, a hnungah ei lallukhum sukmawitu an la ni ding a nih. Ieng angin tuor inla khawm, ei kuomah Pathien a um zing a nih. Pathien hmangainaa inthawka mi the thei iengkhawm a um nawh. Thina khawmin a mi the thei nawh. Ei mithai ei insima, ei ngai ei sunglekuohai, ei ruolhai ei maksan huna khawm, ei ta dinga hlawkna nasatak a ni lem ding a nih. Ei tlantu chu ei ta ding ngeiin ei hmu awm sia.

Lalpa, I hung nawkna chu nghakin kan thlir, Thlan kheltieng van boruok a khin. tawtawrawt le Lalpa rawl ei hriet phat chun, Ka thlarau chawl kumkhuo tang a tih! Thil ei nei po po chân angin ei inngai chang khawmin hlimna thuruk, hadamna, thlamuongna maktak ei nei hlak a nih. Asanchu ei nei po po ei chân thei naw a nih. Isu a inthawka mi the thei an um nawh. Hi khawvela hin iengpo khawm tuok inla, chatuonin Pa kuomah ei la cheng ding a nih. Ama hringna ngei ei suolhai leia mi petu kuomah, mi hmangai em em tu kuomah ei la cheng kumkhuo ding a nih. Chu neka thlakhla ding ieng am ei nei leh? Hi hla hin mi tamtak, mi harsatna phura chau ngawi ngawi dam, lungngai beidawnga inrum dam Pathien hmel an hmutir hlak a nih. |awnga, thua zuk hrilsuok el theilo thu tamtak a hril a nih. Hi hla hin iengkimthawthei, ei fe na phawta min tlawnpui zingtu Pathien hmel a min hmutir rawp hlak a nih. Harsatna ituok chang A tha ie iti thei am? Lungngaina, mangangna, beidawngna ituok chang thlamuon rawp hlaktu che ihriet hlak am? Hi hla, tha em em hi a ziek laiin Horatio hi inhnar um lo tak a nih. Amiruokchu, a thi hnung khawmin hi hla hmang hin thu ala hril ta rawp a nih. Hebrai ziektuin Abel chungthu “thi ta hnungin thu ala hril ta rawpa” tia a lo hril ang deuin.

Hebrai ziektu main, “Ei ringna siemtu le sukfamkimtu tieng chu en zingin” a ti angin Horatio hin Isu Krista tieng a en zing a nih. Chuleiin, “A tha ie!” ala ti thei a nih. Isu Kristaah chau thlamuongna a um a nih. I ta dingin a thia, ituorna a hrieta, ikuomah a um zing hlak a nih. A kuomah nikhat chu ala thuoi ding che a nih. Chu chu a thutiem, inkhel lo ding a nih. 

Source: Thalai Weekly