BORUOK LUM LEIIN MI 70 NEKA TAM AN THI TAH

Fox Journal: Phalbi dei ei khela nipui a hung inhersuok meu chun India ram simtieng panga State um hai chun nasataka lum le khaw inthal an tuor tan mek a. India state a Telangana simtieng panga chun mi 70 neka tamin boruok lum leiin an thi pha tah niin liemtah Ningani a sawrkar thusuok chun a tarlang. Thina tuok tamna hmun tak chu Mahabubnagar district a ni a, hi taka hin mi 28 zet an thi a nih.

A thi hai hi a tlangpuiin sun nisalum hnuoia kut sinthawtu hai, lo-keitu le nisalum hnuoia sin dang dang thaw hai an ni tlangpui.

Meteorologist hai chun India rama nipui chu tuor a harsa deu deu tah a. Boruok lum dan temperature in 45°C a khelna ni hai (Days) khawm kum 15 liemtah a inthawk khan nasatakin a pung tiin an hril.

Indian Weather Department hai chun boruok lum bek bek lakah mitin fimkhur a, nisalum taluo hnuoia suok dawk lo dingin mipui an hriet tir.

Boruok lum leia harsatna tuortuhai hi a tlangpuiin kum upa tieng ta le khawsakna kawnga mi hnuoihnung tieng, slum area le inte bawl fawm mei meia um hai an nih. Kum 2015 khan Telangana le a thenum Andhra Pradesh State a inthawkin boruok lum tuor zo naw leia mihriem thina tuok chu mi 1000 an chuong.

Temperature hi hieng Uttar Pradesh, Delhi, Rajasthan le Madhya Pradesh a hai khawm hin a pangngai (Normal) nekin an sang lem vawng tah.

May le June hi India rama thla (Month) lum tak hun a ni a, hieng huna hai hin dan naran ang deuin temperature hai chu 40°C a vuok kai dawr hlak.