Fox Journal: 28th Thlatun 2016 - Shaheed Bhagat Singh a nephew Abhey Singh Sandhu chun a pate/pute Bhagat Singh, Delhi Univesity textbook pakhatah rikrap-hmang tia an inchuon chu a ngaimaw hle thu zani khan a saksuok.
"Zalenna ei hmu a inthawka kum sawmruk pariet zet a liem hnung khawm a zalenna suol pawlhai inentirna di'n thumal (word) dit umlo tak India ta dinga thlunglu lo chan ta hai hril na'n ei hmang rawp hi a lungzingum thlak hle.
Insel buoina suksuok na dinga hiengang thumal (words) dit umlo tak zalenna suolpawlhai inkawk tir vet a ni hi a pawi hle. Kum 1990 a historian inlar Bipin Chandra'n a lekhabu ziek a khan rikrap-hmang tia inchuon a nia, sienkhawm, a khawhnungin Zalenna suolmi ti'n thleng a ni a. Anachu, tuhin kha an lekhabu siemthat kha khawlam a um zo an tah?" ti'n chanchinbumihai kuomah an tlun.
An hma tienga HRD Ministry'n hma hung la ngei dingin a nuom thu a hril sa nghal.
Chanchin Tawi:
Pasaltha Tv. Shaheed Bhagat Singh hi ei hriet ta angin India ta dinga thlunglu lo in hlan hmasa pawl a ni a. An sungkuo hi Politics tienga active tak an nih a. Young Italian movement a Giuseppe Mizzani chet dan hin a ngaidan a lakpeng nasa hle a, Naujawan Bharat Shaba ti hming chawiin pawl March 1926 khan an din pha nghe nghe. Hi bakah Hindustan Socialist Republican Association pawl a zawm bawk a nih.
Ni 30 October, 1928 a Simon Commission in Lohore a sir tuma Lala Rajpat Rai le a pawl ha'n Simon Commision an ditnaw leia nuorna an nei na leiin District Superintendent of Police James A Scott in nuorna nei hai kutthlak phalna a pekna le inzawmin Pu Lala Lajpat Rai chu police kut turin an rik hle a. 17th November, 1928 khan lungphuchawlin a thi a. Pu Rai a thina le inzawmin HSRA haiin Pu Rai a phuba an lak ngei ding thu thusuok an siem a. Sienkhawm, an that tum tak James A Scott chu hrie suolin mi dang Pu John P Saunders (ASP) chu 17 December khan an that ta lem hlau el!
Nasataka kumpinu uisathiem ha'n an pel hnungin, 8 April, 1929 khan Assembly chamber a bomb an deng lut a, hi hmun a hin manin a um ta a nih. Tlansie el lovin a thawkpui Batukheswar Dutt le tulaia tawngkamkei inlar em em 'Inquilab Zindaba' (Long Live the Revolution) tia khek in Police ha'n an man ta a nih.
23 March, 1931 khan Lohore Jail a khaihlum a um in, Kum 23 mi a tling awr chau tiin a Ram hmangai em em ta dingin thlunglu a lo chang ta a nih.
COMMENTS