Kum 1519 khan Hernando Cortez chu America rama lalram lien deu el Aztec-hai do dingin a rawihai leh lawng 11 in Spain a inthawkin an suok a. America tuipui kam an tlung chun an lawng 10 chu suksiet dingin thu a pek a. Pakhat chau a hla a. A rawihai chu an lung a awi naw hle. Amiruokchu ama chun ei fena ding a hin kir thei nawng ei tih. Ei hrat leh ei hrat ning a ta, ei hrat naw leh hrat tum zingin ei thi el ding a ti chun a rawihai chu a sukphur ta em em a. Chu ngam naw naw chu tuta lawng pakhat la um a hin chuong inla kir thei in tih a ti chun a kir nuom an um ta naw leiin lawng pakhat la um khawm chu an suksiet tah a nih. Eini khawm kum thar ei hmang mek a, kum thar hi a lo hmang lawk tah tukhawm ei la um nawh. Ei rengin ei la fe ngai nawna hmun ei fe zing a nih. Nitin hi lekha phek thar hlawkah ei chanchin ei ziek pei ang a nih. Ei kir thei ta nawh.
Kum thar a hin iem thaw dingin ei inngai a? Pathien chun ei lampuihai chu tluongtlung dingin a mi dit. Joshua 1:7-8 a chun Joshua chu hrattak le huoitaka uma, Pathien thu chu zawm tlat a vawitieng amani, changtieng amani pet der lo dingin a hril a nih.
Pathien mi Mosie chu a thi tah a. Israelhai chu Jordan ral, an la fe nawna hmun chu kai dingin an insiem a. Pathien chun Pathien Thuthlung Bawm chu an hmu pha zui el dingin a tih a. Hi hin Pathien chu a mihai lai a um ti an entir a nih. Tukum hin Pathien le a thuah um veng ei tiu. “Zinga chun ieng am a hung um ding in hriet si nawh. In hringna chu ieng am a na? Sum sawtnawte hung inlanga bo nawk el hlak ang hi in ni sih a” Jakob 4:14.
Tienlai ei pi le puhai chun an ram del bak chu hriet bek bek an nei nawh. Khang hun laia hrietna le tuta ei hrietna chu an ang ta naw hle. Amiruokchu tu khawm hin hma tieng thil ding chu ei la hriet chuong nawh. Hma tieng ding thlir hin phurna, huphurna le beiseina a fe kawp zing hlak a nih. Pathien mi Mosie tawngtaina angin eini khawm damlai nihai hmang thiem ei tul a. Chu ding chun tum thatak ei nei ding a nih.
Tlan inel um sien. A tawpna ding um si naw sien umzie iem um a ta? Chuongang chun hringnun khawm tum, thiltum ei nei naw chun umzie a um naw ding a nih. Eini ringtuhai chu ei thiltum tawpna tak chu vanram a nih. Philipi 3:14 a, “Krista Isua Pathien chungtieng kona san lawmman hmu dingin tiem chin tieng ka pan tal tal” ti ang khan. Chu tiem chin tieng pan ding chun iengtin am tukum hin insiem ei ta? Eini chun, “hun hau lang chu.... Sum chu hai ang chun nei lang chu...” ei ti vet hlak. Suonlam indik lo a nih. Hienghai hi a pawimaw tak an nawh.
Noah chun Pathien a ti a, ama sungkuo sandamna dingin lawng a tuk a. Hebrai 11:7 a chun, “ringna leia felna um ro chu hluotu a lo ni tah” a ti der el. Abraham khawm chu koa a umin a fena ding tieng a hriet nawh. Amiruokchu a suok a, “khuo, lungphumhai nei mi, Pathien ibawl le siem chu a nghak a nih.” Mosie khawm sawtnawte kar suol inhawina hlimpui nek chun Pathien mihai le suknawmnat tuor a thlang kha. Lawmman pek ding chu a thlir zing hlak leiin.
Hieng mihai, an la fe ngai nawnaa fehai hin iem an nei bik lie? Ringna. Eini lai khawm ringnaa mi huoisen iengzat amani ei nei ve. Eini khawm Pathien ring zing ei tiu. Chu chu hnena, ei thiltum ei tlung theina ding chu a nih. Ringna chu, Rom 10:17 a chun, a thu hrietna leiin a hung um hlak a ti angin Pathien thu a hin chieng thar ei tiu. Chuong a ni naw chun Hebrai 11:6 a a ti angin “...ringna naw chun ama lawmzawng mi ni ruol an ni nawh; Pathien kuoma hung chun ama chu a um ti le, a zawngtuhai kuomah lawmman pe hmang a nih, ti ring ding a nih” a ti sih a.
Source: Thalai Weekly
COMMENTS