Fox Journal: New Delhi hmuna 32nd ICI Central Kristien Thalai Inkhawmpui lien 2016 chu taksa le thlarau inbuotsaina nasatak le tung a ni ang hrimin zani zan khan hlawtling takin a lo tumtiek tah.
Tuta tuma inkhawmpui a hin mikhuol inzieklut mi 840 neka tam an inzieklut a, Thalai a fekhawm hai po po hi hmunkhata in camp in common mess buotsai a nih.
Chun, inkhawmpuia Pathien thucha hriltu dinga ruota um Rev. Lalneikhup Hmar, Secretary Finance, ICI; Rev. Lalhmingthang, Secretary Evangelism, ICI; Rev. Lalrohlu, Secretary Hmarbiel South Presbytery, ICI; Rev. H.P Runremthang, YCO & Evangelist-At-Large, ICI; Upa Dr. Zawlthanglien, Vice Chairman CKȚP, ICI le Rev. Vijayesh Lal, Gen. Secretary, EFI haiin an hun an hmang thei seng a, thuhrilna hun thatak an hmang seng. Taksa le thlarau malsawmna tam takin an dawng niin inkhawmpui simtuhaia inthawkin thu ei dawng.
Zani Pathienni a nipui ni taka khan inkhawmpui chibai bukna thu hril dinga fiela um angin Kiren Rijiju, Union Minister of State for Home Affairs chun Greetings hrilna hun a hmang a. A thuhril tlangpui laktawi ei hung suklang.
"Vawisuna in program hmangna huna in mi fiel hi lawmum kati tak zet. In program a item hai po po hi a ropuiin lawm aum tak zet a. Hieng chen ka phak theina khawm hi nangni sangtel hai mi backup na zar a nih. Kohran khawm indegenous a inthuoi le um thei hi thil harsatak a ni a; iengkhawm loa hieng chen in phak hi Pathien zar a nih.
Eini tlangmi hai hi mainstream a umlo anga eiin ngai hi thil indiklo a nih. Ei rengin India ram mi ei ni a, mainland a neitu vawng ei nih. Discrimination hi NE mi ei ni leia ei tuok bîk anga ngai hi andik naw a; hi thil hi khawlai hmuna khawm a tlung ve zing a nih.
Vawisuna Appeal le DPR (Detail Project Report) inmi pek hai hi ka hung bawzui ngei ding a nih. Vawisuna in ihril kher lo in pawimaw le tulna naa thangpui ding cheuin kan pei zing" tiin a hril.
Chun, Rijiju baka hin Rev. Zathangsing Zate, Executive Secretary, ICI; Ms. Darthangmawi, Women Co-Ordinator (W.C.O), ICI; Warish K. Masih, Moderator’s Episcopal Commissary, Church of North India (CNI) hai khawma chibai bukna thu an hril ve a.
ICI Secretariat chun GenCon 2016 chibai bûkna in chen 100, 000 le Central Nuhmei Pawl in chibai bûknain cheng 10, 000 Central Kristien Thalai hotuhai kutah an pek bawk.
Kum 2016 sung hin Hmarkhawlien a THALAI IN bawl lai meka um hawng malamin biel pumpui huopa Gospel Camp buotsai ning a tih.
Kum thar 2017 a 33rd Inkhawmpui Lien (GenCon) innghatna ding chu Tuithaphai Presbytery a nih.
Chun, Kum 2017 hi Year of Unity a puong ding ti hai chu inkhawmpuia ro thenkhat chanchin ei dawng thei hai an nih.
Inruolsiekna hlapawl le malzai lawmman sem a ni bawk. A hnuoia ang hin:
* Buonlienkung Award
1st Prize - Assam Hills Presbytery
2nd Prize - Guwahati City Church
3rd Prize - Jiribam Presbytery
* Rev. Thangngur Award
1st Prize - Nk. Lalhmunmawi, Cachar Presbytery
2nd Prize - Nk. Lalbiekim Bapui, Assam Hills Presbytery
3rd Prize - Nk. Mary Tuolor, Ghy City Church
* Malzai Inruolsiekna (Mission Fields):
1st: Vinod, Tripura Mission Field
2nd: Mercy, North India Mission Field
3rd: Mala, Arunachal Mission Field
* Chun conference hin Thalai member inchukna tienga mi pangngai baka thaw tha zuol pahni hai kuomah lawmpuina thuziek an hlan bawk. Chuong hai chu Nk. Rosel El Rothangmawi, UPSC All India Combined Geo & Geo-Scientist exam ah All India Rank - 11 le Pu Dr. Immanuel Zarzosang Varte, Ph. D zo/degree lak lawmpuina.
COMMENTS