Ringtu hai hi tawngtai ding ei nih ti khawm ei hriet. A that ziet khawm ei hriet. Amiruokchu, a chang chu a harsa nuom fut a nih. Ei Bible hmun tamtakah tawngtai thatzie le tawngtai ding ei ni zie hmu theiin a um. Chu chau chu annawh, thlarau mi deua ei ngaihai khawm hin tawngtaina pawimaw ziet nasatakin an hril hlak a nih. Anachu..
Tawngtai hi an tak ngawi ngawi chang a um rawp hlak. A chang leh a mi sukbuoia. Pathienin ei tawngtainahai a ngaithlak ta naw amani ti dingin a um rum rum chang khawm a tam. Rev. Thangngur meu khawmin, “ Ka tawngtaina nghil am an tah?” a lo ti ve hiel a nih. Dawnna ei hmu ding beiseia tawngtai ei ni tlangpui. Dawnna ei hmu naw hin ei tawngtai tho ding amanih? Annawleh iengleia dawnna ei hmu naw am ning a ta?
Isu Krista nun hi ngun taka ei sui chun inchuk ding tamtak a um a nih. A tawngtai nun khawm inchuk khawp a nih. Iengtin am a tawngtaia, iengleia tawngtai am a ni a? Isu Krista hin mi dang po po nekin dawnna a hmu rawn lem a. Asanchu a thilhni hai hi a thain an dik lei a nih. Ei Bible a khawm hmun fienrielah a tawngtai hlak thu hmun hran hranah hmu theiin a um a nih. Tawngtaina hun ding a nei charin a tawngtai el hlak a nih. Iengleia Isu kha tawngtai vet am a ni a? Iengleia tawngtai ding am ei ni a?
1. Pathien le ei inkar a siemtha
Tawngtaina chu eini ringtuhai ta dinga ei thuok lakna a ni a. Tawngtaina chauin Pathien ei biek theia, ama le inpawlna ei nei theina chu tawngtaina chau a nih..
2. Thlemna hne dingin a mi thangpui
Isu ngeiin, a inchuktirhai kuomah, “Thlemnaa inlut nawna dingin tawngtai ro” tiin a lo hril a nih. Eini ringtuhai khawm thlemnaa ei lut nawna dinga tawngtai rawp ding ei nih.
3. Pathien ditdan a min hriettir
A pathumna a ding chun, ei tawngtai hin Pathien ditdan/remruot ei hriet thei a nih. Luka 6:12-16 inkar ei tiem chun Isu chu zankhawvarin a tawngtai a nih. A ra chu vawisunni chena ei ihril rawp hlak Tirkohai amani Inchuktir 12 hai an nih.
4. Tawngtaina hi Pathien sin suk puitlingna a nih
Johan 14: 13, 14 ei en chun, Isu in ka hminga iengkim in hni ta phawt chu thaw pei ka tih tiin a hril a nih. Hi thu hi vawikhat el a hril nawa, a hril nawn a nih. Tawngtaina chau hi a nih Pathien ta dinga thil ropuitakhai thawtheina chu.
5. Tawngtaina hi ei ralthuom a nih.
Ephesi 6: 10-20 sungah Kristien ralthuom famkim ei hmu a nih. Ei i dohai hi tisa le thisen a ni nawa, inlanahai le thuneinahai dam, hi inthim chunga khawvel roreltuhai le van hmun haia thlarau suol umhai chu a ni lem. Hilai thuin a mi hril chu ringtu nun hi inhnelna el amani a ni nawa, indo hmuna um ei nih. Chuleiin, Isu Krista Sipai tha Tirko Paula ngeiin Pathien ralthuom famkima inthuom dingin a mi ti a nih. Chutaka ralthuom pawimaw em em chu |awng\aina hi a nih.
6. Thlarau tienga hartharna tlungna dinga pawimaw em em chu tawngtaina hi a nih.
“Ka mihai, ka hming chawia kohai chu an insukhnuoia, an tawngtaia, an lampui rilohai chu an nghatsana ka hmel an hung zawng chun, vana inthawkin lo hrieng ka ta, an suol chu ngaidam ka ta, an ram khawm suk hrisel ka tih” ( II Chro. 7:14). Hilai thu hi thu tawite, Pathienin thlarau tienga hartharna amani revival thua a thil hril chu a nih. Hartharna a tlung reng reng hin, mi tuhai amani, khawlai hmuna mani taimatak le thahnemngai taka lo tawngtai pawl hi an um tei hlak.
Ei tawngtai hin einiah danglamna mi sukthar amani mi siemthartu hi a um hlak a nih. Chun, ei kawl vela hai sukharna dinga hmangruo pawimaw tak ei hung ni a. Chuongchun, hung indar peiin revival a hung tlung hlak a nih. Chu chu tawngtaina ra a nih.
7. Tawngtaina hi Pathien ta dingin a hlu a nih.
Thuphuongsuo 5: 8 a ei hmu angin Vanrama riminhnik chu tawngtaina hi a nih. Eini rawiin riminhnik ei ti le chu an ang naw hle. Pathien chu iengkim thawthei a ni a, mihriem isiem nek deia thil riminhnik khawm siem thei a nih. Amiruokchu, a varnain tawngtaina a thlang a nih. Hilai thu a inthawk hin tawngtaina hi Pathien ngaiah a hlu hle a nih ti hriet theiin a um.
Source: Thalai Weekly
COMMENTS