Srikanth hi kum 23 a upa chau, Hyderabad besan Bollant Industries Company, Crore 50 manhu neitu a ni mek a. An company hin thil tumna zuk hmawn hmang el thei nawk hai (eco-friendly disposable packaging products.) an siem a nih.
Srikanth Bolla hringnun hi a awlsam naw khawpel. A piengsuolna (mitdel) lei hin a hringnun a lo hmangna ta poah hmusitna le diriemna nasatak el a tuok.
Mitdela a hung piengdawk hlim chun an khuo le tui Sitaramapuram, Andhra Pradesh khaw mihai chun a nu le pa lo sinthawtuhai kuoma chun an naupa hi inthi tir el dingin an lo infui a nih. Sienkhawm, a nu le pa chun an uksak lawm lawm naw a. School a hai khawm thungna a hnungtieng taka inthung dinga sawn a ni hlak a, inkhelnaa hai inthangtir a ni ngai nawh. Sienkhawm, Srikanth chu a lunghnuol ngai naw a. An school Class 10 Board Exam ah a Top a nih.
Intermediate level a inchuk dinga Science subject lak a tum chun Andhra Pradesh Education Board chun phalna a pek nuom naw a. Board chun Arts stream chu mitdel hai lak thei ding chi chau a nih tiin a lo hnawl a nih. Chu le inzawm chun Srikanth chun case a zieklut a, thla ruk a nghak hnung chun Board chun Science a lak an hung phal pek ta a. Srikanth chun Class 12 chu 98% hmuin topper ah a thang nawk a nih.
Inchukna insanglem beiseia a thaw tum laiin a ta dinga harsatna lientak a hung inherdawk nawk. Indian Institute of Technology (IIT) ah Entrance Exam pe dinga form a fill up chun Admit Card an peksuok nuom nawk ta naw a. Chu huna chun a nih Srikanth in "IIT in a mi dit naw a ni chun IIT ka dit bik nawh" tiin a nghatsan bur ta chu. IIT chu nghatsanin US a UG program hai a apply a, chu taka chun Top School 4, hieng MIT, Stanford, Berkeley le Carnegie Mellon a dingin admission a hmu a nih. MIT chu thlangin MIT ta dinga International Blind Student hmasatak a ni nghe nghe.
MIT anthawka a zo hnung chun Srikanth chun India rama piengsuol haiin hmusitna le diriemna an tuok nasa chu thil iemani tak thaw a nuom a. America rama hamthatna dang dang hai chu maksanin India rama hung kirin Hyderabad ah Samanvai (non-profit organization) a tan a, hi hi piengsuol hai ta dinga an tul le an mamaw anga thangpuia hmatieng thil beiseium tak siempek tum tu a nih. Braille literacy chu suk hmasawnin, digital library le Braille printing press/library hai chu piengsuol hai ta dinga tutorial service petu dingin a hung siem a. Samanvai fethlengin Srikanth chun piengsuol inchuklai mi 3000 neka tam a siem mek a nih.
A dawt nawka a hmalakna lien deua chun. Piengsuol hai sawr theina lampui a hung ngaituo a. Kum 2012 khan Srikanth chun Bollant Industries Pvt. Ltd., piengsuol hai ta dinga fak hmu theina ding a hung induong ta a nih. A Company hin (Eco-friendly) hieng areca leaf plates, cups, trays, le dinnerware, betel plates, le disposable plates, spoons le cups hai a siem tak a. Chu baka chun printing inks le printing products dang dang an siem bawk.
Tuhin Bollant company hin piengsuol mi 150 thawktu le thil siemna hmun (Manufacturing units) 5 a nei mek a. Kum khata an thil zawrsuok zat chu Million 70 a chuong vawr vawr ta a nih.
COMMENTS