Fox Journal: Zani Zirtawpni khan New Delhi a inthawkin Indian Nursing Council (INC) palai pahni Ms. C. Revathi, Principal, Mansari Devi College of Nursing, Bhubaneswar le Nanda Kumar, Asst Professor, AIIMS College of Nursing, Bhubaneswar hai hungin Bethesda School of Nursing, Muolvaiphei a GNM Nurse inchukna um mek B. Sc. Nursing College a upgrade a ni thei dan ding le inzawmin inspection an hung thaw.
Inspection hi zani le vawisun thaw a ni a, lekha pawimaw, teaching faculty (An original documents hai), physical infrastructure-building le a dang dang an en a, BSN baka hin affiliated hospital hieng Saikawt PHC, Nazareth Nursing Home, Sielmat Christian Hospital le Dist. Hospital hai khawm an kan sa bawk a nih.
BSN thuneituhai le INC Palai hai an hohlimnaa chun College thar hawng thei ding anga an umna chu lawmpui an um thu an hril a. Nursing College thar hawng hi a awl a, suk puitling le changtlung taka siem a harsa leiin theitawp suo dingin BSN thuneituhai an infui. Nursing College nei ding hin 1st Batch B. Sc haiin an zo hma ngeiin Hospital nei a tul a nih.
An hril peinaa chun BSN chu College a hlangkai a ni ngei theina dingin Palai hung hai hin an kir phat an recommend ngei ding thu an hril a. An thil en hai laia hin BSN Chowka (Kitchen) an en nuom hle a, tlai suong tuhaiin thienghlim taka an thaw hai an hmu chun an inpak hle.
Hi Nursing College hi CCPur ah a hmasatakna ding a ni a, a then hi chu naupang tak tak in la ni tawla, a college le inthanglien peiin in professional goal hai sukpuitling ngei dingin kan ditsak cheu tiin an hrilsa bawk.
GNM 2016 -17 validity khawm palai hung hai hin an thaw sa nghal a. Vawi zantieng khan New Delhi panin an lo vuongkir nawk tah niin chanchin ei dawng.
COMMENTS