Rev. Lalramlawm Inbuon
Changthlang: Luka 2:20 Chun, berâm vêngtuhai chun vantirko hril ang ngeia iengkim an hmua an hriet leiin, Pathien chawimawi le inpâk pei pumin an kîr nawk tah a. Tiena mihan hmu an nuom ni lawmun hi, hmulovin sâng tamtak anliem hnungin Lal lungawi kum hun lawmum sandamna ni mi thuoitlungtu Lalpa Pathien chu inpâkin um raw se.
Khawvela hin Lal tamtak an pieng tah a, nisienlakhawm, Lal Krista ang hi an la pieng ngai nawh. Asan ropuitak chu mithi haiin damna an nei theina dinga pieng ani leiin lal dang ang ani naw a nih. Chu Lal danglam tak el chu ama adanglam el niloin ahmutu taphawt hai khawm danglamna tak an nei hlak. Iengang danglamna am an nei hlaka ?
1. Isu Krista hmutuhai chun nun danglam an nei hlak : Vantirkoin Berampuhai kuoma ahril angtakin Mari chawilai naute an va hmua inthawka thil danglam tak hung tlung chu Pathien chawimawi le inpâk pei pumin an kir nawk tah ti ei hmu. Thilthawhai 8:3 Saula ruok chun kohranhai chu a suknawmna bêk bêk a, in tinah a lût a, a nuhmei a pasalin a hnûkdawk a, intângna inah a khum hlak. Saula kohran suknawmnattu le sukdartu ropui tak chu Thilthawhai 9 Pathien le an intuok zet chun amaa danglamna ropui tak el ei hmu. Thlthawhai 21:13 …” Lalpa Isu hming lei chun Jerusalema khuop chau niloin, thi chen khawm ka huom in sawnnaw”a tih. Paula nuna inthlâkdanglamna ropuitak ahung tlung in ei hmu.II Kor.5:17 Chuleiin, tukhawm Kristaa um chun thil siemthar a hung ni tah. Mîn hmu ding indiktak an hmu pha chun lo theiloin mihriem nuna danglamna a um hlak.Berampuhai hin Isu Krista an hmu hma khan Pathien chawimawi le inpâk in an um ti hril ding a um nawh. Nisienlakhawm Lal danglam tak el an hei hmu a inthawkin annia danglamna ropui tak el a hung tlung tah.
Ei ram, hnam le kohranhaiin kumtin Krismas hlim le lawmtlâng takin ei hmang hlaka, athen lem chu tawp hleitheilo hielin ei hmangin sum tam tak tak sêngin ei hmang hlak. Atha ka dem naw, khawvêl mihai hmana miropuihai pieng champha insera thupui taka an hmang chun ei ni lem chu a awmin ran lien lien, athau thauhai that in ei hunhai hmang hi a awm lem in thaw ding rêng khawm anih. Amiruokchu ei rama kristienhai laia iengleia nun danglam hmu ding um talo el am ana ti ruok chu ei ngaituo dinga pawimaw êm êm chu a nih. Ei nungchang, nuomdan, ditzawng,du zawng, thilthaw nuom zawnghai danglam thei dêr lo, hmu ding indiktak hi ei hmu naw lei ning a tim?
Mihausa nau neisun Birth day hmang dingin mi lien le ropui iemanizat an fiela, annaupa chu Chaira inthung tirin, a hung lût ta phawt chun gift a thungna chair a chun an sie peia, atawpa chun asietu an tam leiin an gift chun naute chu a hlie in a bukkhum taa, chu phingle an lawmtak le fena san tak chu inlang zo talo in gift chun a bukkhum ta an tih.
Khawvel sandamtu ding hung pieng hi hmun hlatak taka inthawk dam, hun le sum tam tak sengin chu ni ropui hmang dingin ei tlân khawm hlaka, hmu ding tak hi hmufulo in a keihnawi thil thenkhat hin ahlie zo an ta el naw amanih. Hmu ding tak hmufu lo hin ahlim hlawpa hin zo ei ti ti inlau um tak a nih.
2. Isu Krista hmutuhai chun an lampui an thlâk danglam hlak: Khawsak mivarhai chun Isu chibai buk dingin arasi zuiin an fe ti ei hmu. Mari kuomah naute chu an hmuh a, an bawkkhup a, chibai an buk a… lampui dangah an khuo tieng an kir tah ti ei hmu.
Luka 18:3543 Mitdel kutdaw Isu le intuokin Isu’n a sukdam thu ei hmu, Chun Pathien in pâk pum peiin ama chu an zui tah a.Min hmu ding indiktak an hmu chun an lam pangngai an hraw ta ngai nawh a, lam thar an hraw lem ta hlak. Ei pi le pu haiin Isu Krista an hmu hma chun ran thisena inthawiin zu le sahai chênin thingbul, lungbulhai bie in hun an lo hmang hlak. Nisienlakhawm, 1910 in hmu ding indiktak Isu Krista an lo hmu ta leiin chuong lampui po po hai chu maksanin le hraw ta loin Kross lampui an lo hraw ta lem.
Indopui II huna khan Vuongna khaltu Jacob Deshezer chun August 6,9,1945 in Hiroshimaa le Nagashakiaa atom bomb tone 5 a rik thlakin mihriem 1,40,000 an thi pha kha ania. Vangduoi thlak takin avuongna chu an kâp thlâk pêka, ama chu ahringa manin Jail a an thun ta a. Jail sûnga chun lekhabu tam tak tiemin nitinin lekhabu dang dang a tiem sa pei a, a tawpa chun Bible tiemin ‘Hmelma ngaidam theitu chu Pathien anih’ tiin Pathien indiktak chu a hmu fûk hlau el ta a. Chuphing chun “Hmêlmahai thina dinga atom bomb ka thlak chun an hringna dingin Gospel ka hril naw ding am anih”.tiin a khêk suok. Americaa inthawka hmêlmahai thina ding lamtluong a hraw chu inhersanin lamthar
Mihai damna ding lamtluong chu a hraw tan ta. Isu fietaka hmu hi hmelmahai ngaidamna, theidahai hmangaina, Inremna a hung rasuok hlak a ni.Unau dittakhai/tiemtu dittakhai kohranin programme thatak tak le hlim um tak tak hai ei lo hmang liem rawn tah a. krismas inhawi le hlimtak takin vawi tam tak ei lo hmang liem ta bawk. “La cham raw la cham raw kan ngai che la cham rawh” tiin thenkhat lem chu khawsawtin thingpui sen le lengkhawmin hun sawt tak tak el khuong le siel ki le ei la lengkhawm zui hlak. Matt.2:12 . . .lampui danga an khuo tieng an kir tah a. ti ei hmu. An le ei ni rawi hi ei khuo le vêng tieng ei kir huna hin ieng lampui am ei hraw tan nawk hlak a, mi tam tak chun mani lampui hlui bawk ei zui nawk hlak niin an lang. Ieng lei am ning ata, Hmu ding indiktak hi ei hmu fûk naw lei ning a tim?
3. Isu Krista hmutuhai chun an topui tawk tawk thei ngai nawh: Berampuhaiin vantirko hril ang taka an va hmu chun naute chanchin thu chu an hril vel a. Matt.9:2731 Isu’n mitdel pahni a sukdam tum khan tukhawm hriet naw dingin fimkhur ro tiin an cha ti ei hmu.
Nisienlakhawm, anni chu an suok a, chu ram po po a chun a chan chin an suk thang tah a. Miin hmu ding indik tak Lal danglam an hmu zet phat chun khap hne ruol hrim anni ngai nawh. Thilthawhai 20:2223 Thlarau inthiengin ‘khuopna le rinum nain a tuok che’… ka hringna khawm thlâkhla ttlâkah ka ruot nawh. Suolhai ngaidam thei tu, Damna nei tu tindiktak ahmu fie a, chu chu mihai khawm hmu ve ngei hai sien anuom na leiin ama tuor ding chu iengmaloa angai lem thei a nih.
John F.Kenedy, America Presiident kaphlum ani chiea inthawka darkar 24 sungin khawvel mipui 95% in an hriet hman an tih. An le ei ni rawiin Misuolhaiin damna an nei theina dinga hung pieng le thi hi kum 2000 a lo liem hiel ta hnung khawma iengleia ei rama Isu Krista hretu 4% chau ei la ni zing am? Ei ram le kohran lai hrilding tak damna Isu nêka hril nuom le hril inhawi ei ti hi iem ning a ta, II Lalhai 6,7 thu ei en chun Phar 4 haiin damna dinga hmangruo pawimaw tak fak le dawn hmêlmahai campa an va hmu lai khan an to pui tawk tawk naw a, an hmu zing laiin Samari khawpui sunga phingtama thi dinghai an thei nghil thei naw leiin an va hril ti ei hmu. Kohranhai hin ei thil hmu hi ieng leia ei to pui tawk tawk el am ning a tah? Hmu inti si in fie zat lo hin ei hmu pal am anih.
Chuleiin vawisuna Krismas hmangtuhai po po hin hmu ding indik tak khawvel sandamtu, mithihai sukhringtu,lungngaihai suklawmtu,hi hmu seng inla, chu chan chin chu ei nitin nuna ei hril nuom tak ni seng bawk sien la, chun ei krismas hmang hin umzie hung neiin hlawk takin hmang thei ei tih.
Chuleiin, tukuma Krismas hmangtuhai po po in krismas inditakhmang senga hmu ding indiktak hmu seng dingin ka ditsakna kan hlan cheuin, ei chan senga Lalpan mal mi sawm pek seng raw se.
COMMENTS