Fox Journal: Khaw inthal leia harsatna chun Maharashtra state a Marathwada biel chun a tuor zuol hle. Marathwada biela dam 7 zet chu tuhin a kang nawk tah a. Hieng dam kang hai lai hin Jaikwadi, Asia rama dam lien pawla thang phak ve khawm a thangsa a nih. Maharashtra hmuna hin dam 800 a um a, chuong dam 800 chun tui thienghlim 380 million cubic metres chau a peksuok thei tah a, Marathwada hmuna medium dam 75 zet um hai laiah dam 54, a chunga hril langa um hai leh an kang tah a nih.
Nikum khawm khan khaw inthal leia harsatna hi hi biel hin a tuok a, amiruokchu, nikum khan chu dam pakhat chau a kang a, tuhin dam 7 zet an kang tah a nih. Tuhin dam 4 tui kang lo a la uma, hieng hai khawm hin 5% chau tui thienghlim dawng ding a um an tah.
Hi lai biela mihriem cheng hai ta dingin tui phurtu tankers 2000 haiin tui supply na sin an thaw a. Mipui tui inchu na leia insuolna le intuolvuokna chen a suoka boruok a sosang pei leiin Section 144 of the Criminal Procedure Code chu hi lai biel Latur a dingin puong a ni hiel.
Latur biela ding tui phurtu tho special train khawm vawituk khan Latur a lo tlung tah, hi train hin tui litre 5,00,000 a phur a nih.
Khaw inthal leiin Ramkund, Godavari hmuna insilna hmun thienghlim Kumbh Mela, Maharahstra a hung intanna ni bawk khawm chu kum 139 hnunga a vawikhatna dingin a kang ve ta bawk. Municipal a thuneituhaiin hma an lak nawa tui sie lut a ni naw chun hmun hla tak taka hi hmuna Gudi Padwa, Zirtawpni a inphum ding hai khawm an ho hul ding niin an lang.
Ruo tui thienghlim tlak hun chen dai dan ding a sawrkar chun a ngaituo meka, sienkhawm an thal bek bek leiin hmalakna hai khawm chu a hlawk angin an lang thei bek bek nawh.
Khaw inthal hi nipui a hung ni tak tak hin zuol tieng a la pei ding niin an hril.
COMMENTS