Fox Journal: November ni 19 kum 2000 khan Akrit Jaswal chu kum 7 mi chau niin mi a ât a, hi mi a ât le inzawm hin khawvela surgeon naupang tak a lo ni tah. Ama hi Nurrpur, Himachal Pradesh a pieng a nih.
Kum naupangte a nia inthawkin science (hrietnavar) le anatomy inhnik reng a ni a. Local hospital a doctor thenkhatin a thil inhnik an lo hrieta, kum 7 a tling chun mi an ât lai chu a en an phal tah a nih.
Sungkuo retheitak, beram venga khawsahai chun a thiemna hai an lo hriet chun an naunu chu a ât nuom dîm tiin an indawn a. An naunu chu a nautet laiin nasatakin meiin a kang leiin a kut parhai chu an kawpa, an hlûm nghe nghe a. Hospitalah admitin an naunu ât man ding chu an pek zo naw ding leiin ama, Akrit Jaswal hi an naunu ât dingin an ngen el a nih. Ama chu an beiseina innghatna um sun a ni tah. Jaswal chun an naunu chu hlawtlingtakin a ât a, naupangtenu khawm chun a kutparhai suk chang theiin a um pha tah a nih.
Mi thenkhat, khawvel mak ti khawpa thil dangdai deu, thil mak deu thaw an um rawp. Chuonghai laia Akrit Jaswal hi tiem sa thei a nih. Thla 10 mi chau a niin a lawn thei el chau ni lovin a tawngthei der tah a. Kum 5 a ni chun Shakespeare lekhabu ziekhai a tiem tanin. Ama anga naupang ta ding chun thil harsa le thil theilo ang hiel a nih. Hi naupang, Jaswal hi India rama IQ insangtak a ni nghe nghe. A IQ hi 146 nia hril a ni bawk.
Khawvela mi âttu (surgeon) naupang tak a ni lei hin Akrit chu a hming an thang hle tah a. Mr. B.R. Rahi, Chairman of Secondary Education in Dharamshala chun Akrit hi a chawm a, a chawm chau ni loin a mentor khawmin a thang nghe nghe a. Kum 12 a niin Chandigarh College University of Punjab ah Science a degree la dingin an chuka. Ama hi Indian University in student a pawm laia naupangtak a ni zui nghal.
Akrit hin nasataka Cancer damdawi ding hmusuok ngei tuma thang a lak leiin khawvel ngaiven a hlaw hle a. Ama chanchin suitu 'Firecracker Films' chun London ah inhmupui dingin an fiela, chutaka chun khawvela medical researchers hming inthang tak takhai an hmupui bawk.
Akrit hin Cancer damdawi hmusuok tumin nasatakin thang a laka, hrietnavar tienga thiem em em niin, tuhin kum 23 a tling taa, IIT Kanpur ah Bioengineering a zo fel der tah.
Akrit Jaswal hi India lunghlu pakhat ve a nia, a ram mipuihai ta dinga theitawpa thang latu. Kum naupangte nisienkhawm thawsuok a hau ta hle ela, mihriemhai hmakhuo ngainain nasatakin thang a lak zing bawk a. Mihai ta dinga chona petu le thathona petu a ni rawp hlak. Amiruokchu, kum 7 mi chauin mi a ât ding chu ei inhrilhmu chuong nawh.
COMMENTS