KRISTIEN SUNGKUO

~Mrs Lalhlimpui 

Kristien sungkuo hi hril ding a tam a, a scope a lien bawk a, a umzie tak chu “Kristien nundan ding anga sungkuo” or “Pathien le inpawl hlak sungkuo” a nih. Chuong a ni chun Kristien inti na zawng hi Kristien sungkuo indiktak a ni thei naw ding a nih. Asanchu, mi piengthar haiin Pathien dit dan ang taka sungkuo an enkawlna chu a kawk bik tak leiin.
Sungkuo hi Pathienin a ngai pawimaw em em a. Genesis 2 ei tiem chun Pathien ngei chu sungkuo lo indintu le, sungkuo siemtu ding chen lo siemtu a nih. Sungkuo intanna bul tak chu nuhmei le pasal nupa ni dinga zawm chu a nih. Nuhmei khatin sungkuo an din thei nawh a, pasal khat chauin a thei bawk naw leiin Pathien in Ama angpuiin mihriem a lo siema chu chu tha a ti le ti ei hmu. Tulai khawvela, nuhmei le nuhmei innei dam, pasal le pasal innei dam ei hung um tah a, Pathienin sungkuo an din nasan chu an ni a hin a fail der a nih. Sungkuo Pathienin an din nasan hi thil dang dang hril ding um sienkhawm point thum hang hril inla.

1. Ama le inpawlna inthieng nei dingin (Eg. Adam le Evi).
2. Chithla dingin (Eg. Adam le Evi).
3. A Naupa Isu Krista thisen zara kohran hung ngirsuok ding le an inlaichinna or inmatna suklangtu dingin a mi lo buotsai a nih (Ephesi 5).

Pathien indin sungkuo a chun Pathien siemsa order sungkuo tinin ei zui ding a um. Chu chu pasal - lu a nih, nuhmei - thangpuitu digin, nau - nu le pa thu zawm dingin. Ei thlatu Evi chun a ngirhmun pawimaw tak theinghilin a pasal thangpuitu nekin a sukthlutu a lo ni a. Vawisun chen hin chu suksuolna ra chu ei la sîk pei a nih. Pathien le inpawl zing hlak insung chun, hi ngirhmun hi an ngai pawimaw a, phursuok ngei an tum hlak. Chuong ang sungkuo hang hmu le an ina leng el khawm anhawiin ha a dam hlak. Billy Graham chun, Pathien thu hrila rawngbawlna thatak ka nei thei nasan chu ka nuhmei lei a nih a tih.

Insunga Pathien thu laklutna dinga mawphurtu tak chu nu le pa ei nih. Nu le pa Pathien le hringna inzawmna feltak nei hai chun Pathien a hmasatakah an sie a, thu thar hla thar an dawng hai chu biekin a chau ni loin an insungah la lutin ra insuo ngei dingin thang an lak a, nupa nun hadam takin an hmang. Vawisuna Kristien inti si nupa inthe, insung kawidar ei tam em em el hi ngaituo tham a nih. Ei ringkawl bat inang naw lei dam, Krista neka lien lem insungah ei sie lei dam a ni el naw ding maw? Ei pasal hai dam a mi hrechiengtu le a mi hmu chiengtuhai hin Pathien thu nunpuiin an mi hmu am? Pathienin order a siemsa lawm taka pawmtu nupa hai chun harsatna, inremnawna, inhrietthiemnawna an nei ring a um nawh. Nupa insuol zing zing, inhal zing zing le tawngbau thaa inbie ngai der lo chun, Pathien thu insunga laklut chu thil harsatak ning a tih.

Pathienin Isarelhai kawlah a vel a vela a lo hril chu, nau inchuktirna hi a nih. Deut.6:8 lai chun inthung lai, in lawn lai, in zal lai khawm in inchuktir ding a nih a tih. Nauhai inchuktirna hin taimak a ngai. Ran ei vai tawla ei hriet seng tho ring a um. Taimakna thanglo chun thaw el thei an nawh. Na an nei am, pangngai an aw naw deu am ti hriet ding chun taimak a ngai. Ran neka hlu lem ei nauhai enkawlna le inchuktirna hi ei ngai pawimaw tawk am? Howard Dunlop chun, ka nauhai hi an tawng thei hmain dingthathuona tawngtai dan an hriet vawng tah a tih. Ei ram siet tak zie hi naupang chite khawm thil thanaw thawin an um zo tah. Nu le pa hai a bul tan thang ei tiu. Khawvel intlansiekna thiemna varna inchuk ding chun, thang ei lak nasa hle, chatuon dai ding tak Pathien thu inchuktirna hi iengleia ei ngaitha thei? Nauhai inchuktirna neka pawimaw lem iem a um? Khawlam an fe a? Iem an thaw a ti khawm ngaisak lova an mi sukbuoi naw phawt leh lungawi el tum nawng ei tih.

Nauhai hin nu kuomah hun an hmang rawn lem a, an tul an pawimaw khawm nu kuomah an intlun rawn lem hlak. Nu le pa mani sinthaw chau ngaisaka, nauhai ta dinga hun awl nei thei thak lo hin nau le kar a mi siem pek hlak. An ta dinga ka lan hman nawh ti zing zing le order insuokhum zing zing hin nau tieng helna a siem hlak. Howard chun, ka sunghai leh hun kan hmang ding chun fielna dang po po ka hnawl hlak a lo tih. Nauhai leh hun ei hmang tlawm lei hin sungkuo ei inpaw nawh a, nauhaiin an ditdan lampui an hrawh a, a vawrtawp a tlung pha ei insir nawk hlak si. Chu hun ei tlung hma hin ei nauhai ei hun peng ei tiu. Ei sin chau hi ngai pawimaw nawng ei tiu.

Nauhai inchukna tha tak chu nu le pa nun ah a nih. Ei nun le an kuoma ei thuhril an mil naw chun an mi fak thei ngai nawh. Nu le pa ei ni leiin an mi ti a, iengkhawm an hril ngam naw mei mei a nih. |awngbaua thu sangkhat i hril nekin i nuna thil pakhat an hmu khan anni a ra an suo thalem thei. Pathien thu hi ei hril khawma, ei nunah hmu ding a um si naw chun mi hai mi nghawk ei kai mei mei a nih. Ei nun hi Pathien thu leh a fe kawp zing naw chun nauhai ta dingin entawn ding a um naw ding a nih. Missionary ropui John Gibson Paton hi ka ngaisang a, sel fa hai lai rawngbawla suok a nih. Missionary ah a tleirawl laiin a fe el ngam nasan hi a pa nun hin ama hi a hne lei a nih. An pafa hohlimna chu van tieng thu ngawt a nih. Nauhaiin ei nuna an hmu iem ni veng a ta? Hrangsietna, duamna, khelhril hmang, hleprukna hai dam hi ni pal a tih ti inlau a um. Vawisun hin ieng chie -in am insung ei thuoi ti hi inngaituong ei tiu.

Nauhai ngirhmun ngaisak leklo, inchuktirna va pek ngat ngat ei tum el chun lak ding tak an hriet thei ngai nawh. An phak tawk ang peia enkawl hi naupang an tha a fan a, sukdik ngei an tum hlak. Genesis 33:13-14 ei en chun Jakob le Esau in hmu nawkna ei hmu a. Esau in a ruola fe dinga a sangpa a hang ngen chun, Jakob in naupanghai hi chite te chau an la ni a, ran hai hi te thuoi an ni tawla, nikhat chau khawm fe hrat pui chun an thi el ding a nih ti’n a lo hril a. Vawikhata thaw huk hin ei nauhaiin an fak phak ngai naw hrein dam te tea inchuktir a keihruoi a pawimaw.

Thil dang tamtak hril ding um sienkhawm nu le pa in hi po hi hang sukdik thei inla chu ei insung hlim a ta, kohran hung kang peiin khawtlang nun chen khawm a hadam pha hle ding a nih. Thanghar ei ta bul tan thang ei tiu. Thiempu Eli anga rawngbawla inhmang vieuin insung ngaisak si lo hin Pathien a suklawm chuong nawh. Eli chunga Pathien lunginsenna hi ei chungah tlung ve pal a tih ti inlau a um tak zet el. Hi thiltha thaw ding hin insuk hrat ei tiu.  

Source: Thalai Weekly