Fox Journal | Imphal, April 9: Imphal East a um Napet khaw mi le thenum khuo hai lungsen tawpkhawkin zani zantieng khan Napet khuoa um SoO nei lai URF designated camp chu mipuiin an hlukhum.
Zani lai vela URF cadre hai hin Napet khuo mi 3 nasataka an sawisak leia mipui lungsen mi 1000 bawr vel hai hin an camp hi an va hlukhum el an tah. Hienga mipui lungsen an va fe hin URF hai hin an automatic silai hai an lo kap a (Mipui tieng a ni naw ei ring), amiruokchu, mipui lungsen chu inthi zam hne ruol an ni nawh. Lung, bawngtuthlaw le hmawl chawiin an camp sung lutin camp sunga motor um hai chu mipui lungsenin an raw siet vawng. Motor raw sieta um hai hi DI Tata truck pakhat, Gypsy pakhat, Van pakhat, Bike pakhat le Activa pasari mipui lungsenin URF hai camp a mi an raw siet a nih.
URF hai hin kum 2014, May thla khan Napet khuo a sawrkar school ah Designated Camp hi an hawng a, hawng a ni a inthawk school khawm kai zawm ta lova hienga um an tah.
A hmuna inthawka report ziek dan angin local club members le Napet khaw nunghak hai chun Thabal Chongba hmang dingin an inbuotsai a. Chu an inbuotsainaa chun URF cadres hai chu an hung thangve phing chun nuhmei hai chun Thabal Chongba an hmangna hmun ding chu an sawn tah a. Chuonga Thabal Chongba an hung tan ta chun, URF cadres hai khawm chu an la hung nawk ngeia, amiruokchu, Meira Paibi haiin hung suok/thang lo dingin an lo hril a nih. Chu zo sawtnawte hnunga chun URF cadre hai chu lampuia umin Thabal Chingba hmang dinga hung hai chu an lo dap (Frisking) pei a, thalai a fekhawm hai ta dingin harsatna an intlun ta leiin Napet khawsunga upa deu hlek haiin thaw lo dinga an va hril chun an tawng ngai nek nekin chuonga a va hriltu kum tienga upa deu ta hai chu URF hai chun an lo bei zek lem a. Hi chungthu an hriet le inruol hin local Meira Paibi hai, club members le Napet khuo mi hai le thenum khuo Nongada, Kameng Khunjao, Lamlai, Chalou, Nongren Chana le Telou khuo mi hai URF hai chunga lung awi ta lo reng hai chu an tlankhawm a. An camp chu an va bei nghal a, camp a inthawk chun URF hai hin silai an hung hmetpuoka chu chun mipui hai lungsen a suk zuol sau sau bawk.
Silai khawm ti ta lo mipui lungsen tam tak hai leh iemani chen an inbeituo hnungin URF cadre hai chun an camp suoksanin an tlanhmang a nih. URF cadres hai hi thi chu an um naw a, hliem an um le an um naw ruok chu an tlanhmang leiin report hmu ding a um nawh.
COMMENTS