Fox Journal | Imphal, 06.04.2016: Ramhnuoimi haiin an khawsûng le a khaw mipui hai an chawkbuoi rawp hlak chu nghawk le tuor pei ta loin Nongshum khuo mipui hai chun License Gun hmangin a sûn a zânin a khuo chu an vêng insawk tah a nih.
Imphal East District a Khundrakpam A/C a um le Sagolmang PS hnuoia um Nongshum khuoa hin In 65 le mihriem 300 lai an cheng a. Chanchin ei dawng dânin a khuo mipui hai hi, SoO a um KNO/KLA cadre haiin kum tamtak liemtah a inthawk khan an suknawm nat le an sawisak rawp hlak chu nghawk ta in tuta kar liemtah a inthawk khan a khuo tlangval haiin silai hmangin an khuo chu an veng tan el an tah.
JAC Against the Torture of Nongshum Villagers by KNO/KLA Cadres a Convenor Konjengbam Ibungobi in chanchinbumi hai kuomah a hril na a chun, KNO/KLA cadres hai hin sawisak dan chi dang dang a sawisak le vuo-in, an in le lo hai suksie pekin, pawisa khawm an dawl hlak a. Nongshum khuo a PMGSY hnuoia contract sin a sinthawtu hai khawm an hung kidnap tum a, amiruokchu a khuo mipui hai hin silai hmang in an lo hnawt hmang a. Ramhnuoimi hai chu an hung nawk ring a um leiin sûn le zânin an vêng el a ni ti thu Konjengbam Ibungobi chun a hril. A hril pei naa chun sipai, AR le Army hai bulah khawm an harsatna tuok hi intlun a ni ta a, an chunga (UG hai) action lak nekin a khuo mipui hai hi ramhnuoimi hai umna pe a vênghimtu tiin an intum let lem a nih. Khuo dang dang Lal hai le khawm Joint Meeting neiin UG hai do dan ding hma lak dan ding, hmalak pei dan ding an lo hriltlang ta hlak.
Silai chawi a vênghim chau ni loin ramhnuoimi hai kut tlak na hi dodalna in Imphal-Khamenlok le Imphal-Khongbal lampui a hai khawm Indefinite Bandh khawm an lo ko ta a. An hmatieng inremna aum naw chun nuorna chi hran hran hai neiin Economic Blockade hai chen khawm an ko ding thu Konjengbam Ingobi chun a hril.
COMMENTS