Palm Sunday ei hmang kha lo sawt nawk deu ta sienlakhawm, Palm Sunday le inzawma thu tlawmte hung ziek ka nuom a. Ei hriet seng ta angin, Palm Sunday ei ti hi Hmar Dictionary a chun Tum, Kutpha, Kuva kung pakhat tiin an zieka, Palm Sunday ei hmang dan le ei inkawktir tak chu Isu Krista Jerusalema ropuitaka chawimawia a lutna ni a nih. Tulai Kohran niser ei hmang hai hi Local Committee haiin Programme siemin ei hmang hlak a, Isu Krista huna Palm Sunday Programme an hmang hi tu Programme siem am a na ? ti hi ngaituo chi tak a nih. Johan 12:16 a chun, “Chuong thu chu a tirin a inchuktirhaiin an hriet nawh a, nisienlakhawm Isu chawimawia a um hnung chun a chanchina chuong thu chu ziek a nih, ti le a chungah chuong thil chu anlo thaw ngei ti an hriet tah a” tiin. Isu chuongna Sabengtung, Tumkau chawia an khek hai, a fena ding lampuia puon le sawlhna an lo pha hai, a hmatienga fe hai le a hnunga hung zuitu hai chun “Hossana Lalpa hminga hung chu inpakin um raw seh” (Marka 11:9-10) an ti dam, an thaw dan ding le an khek dan ding hai hi Programme siema an chuktir an um ring a um nawh a, tulai Palm Sunday ei hmang changin NSSU hotu haiin an naupanghai an inchuktirin an khek hlak a, thaw dan ding le khek dan ding khawm Bible entawn ding ei nei tah a.
An ni hun lai khan chu entawn ding an la nei nawh a, Isu Jerusalema ropuitaka chawimawia a lutna hi Pathien programme siem a nih. Tukuma Puitling Sunday School Marka Hrilfiena phek 207 hnuoia chun “Hossana” Barclay chun “Khalai huna mipui khek pawlhai khawm khan an khekpuitak hi a kawk an hrietnaw a ring hiel a nih” tiin an ziek a. A kawk an hriet khawm nisien, an hrietnaw khawm nisien Pathienin an khektir niin kei chun ka pawm tlat a nih. PALM SUNDAY By; Upa H.K. Ngurlien Zairawn, Jiribam Presbytery. Isu Jerusalema ropuitaka chawimawia a lutna hi a thiltum tak chu Isu hi sandamtu a na, ropuitaka chawimawia, inpak tlak a ni ti hi mi po poin an hrietna dinga Pathien thiltum a nih. Palm Sunday ei hmang nasantak , a thiltum tak ei hrietchieng a tul hle a nih. Tulai Kohranhai hin Isu hi sandamtu a ni ti chu ei hriet a, inpak tlak le chawimawi tlak a ni ti ruok hi chu ei hrietchieng tak tak naw a hawi khawpel. Mobile phone a mi hlasak an record a, an ngaithlak hlak, mani ruok chun hla khawm sak peilo ei tam tah. Pathienin ami sandam ta ti hrechieng tuhai chun mani ngeiin Pathien ei inpakin ei chawimawi ding a nih. “Mani ta khawm in ni ta nawh a, mana inchawk in ni ta in sawn naw; chuleiin in taksa chun Pathien chawimawi ro”(I Kor.6:20) a lo ti a nih. Sam ziek ei tiem chun Pathien inpaka chawimawi ding hi a hril rawn em em el. Sam 100 a chun “Ram po pohai Lalpa chawimawiin hlimtakin khek ro” a ta. Sam 148 a chun thil siem po po haiin Lalpa chu inpak dingin an fui a; Sam 150:6 a chun, “ Iengkim inthuok thei taphawt chun Lalpa chu inpak raw se, Lalpa chu inpak ro” a ti bawk a.
Hla siemtu chun Zingkar Vate han Pathien an inpak, parmawiin a ropuizie an entir hlak, a thilsiem haiin Ama an chawimawi Mihriem chau naw chu inchuktir an ngai nawh, a ti bawk. Ama angpuia siem, suol leia thiemnaw chang ta hnung, A hmangaina lei chaua A naupa Isu Krista thisenin kraws lerah ei suolhai ngaidama an tlan haiin Pathien ei inpak a ei chawimawi pei naw hi mak tak chu a nih. Sam 42:1 ah “Sakhi vadungte tui chaka an thuok hlawp hlawp angin, Aw Pathien ka hringna hi nangma chakin an thuok hlawp hlawp a nih” a ti angin Pathien chaka, ngaina le beiseina hi ei tlasam ta a, Pathien neka dit lem le hmangai lem ei hau ta hle a nih. Tulai khawvel changkangna “INTERNET” hin Thalai tamtak nun chu a thuoi kawi zo ta a, Bible tiem an hung pei ta nawh a, Student tamtak khawm an lekha tiem ding takngiel khawm ngaisak thei ta loin internet inhnelpuiin zan sawt tak tak an meng a. Zingtieng inhnu deu deuin an tho lem a nih. Ei rama Mobile phone a hung um hi a thangkaiin dit a um em em. India le Foreign a um hai chen le khawm nitin ei inbiekpui a, chanchin ei inhril zung zung thei a. A tha nawh tia sawisel ngam ding lem chu ei um nawh. Amiruokchu a hmang dan ei thiemnaw leiin mihriem nungchang hi a suksiet ta hle el a, hmang dan thiem hi a pawimaw khawpel.
Thalai tamtak lem hi chu Biekina khawm an khik a, an hmet naw chun an um thei tanaw a nih. Ei rama 1992 kha eini lai Harna (Revival) a tlung tawpna tak niin ei hriet. Kum 23 a tling tah a, hril khawp Revival a tlung el ta naw hi ngaituo tlak tak a nih. Kohrana harna revival a tlung naw chun Pulpit Sermon ringawt hin chu ei ram Kohran siem tha zo dingin ring a um nawh a, Mobile phone ei hmanga inthawkin ei ramah a tlung thei ta naw mani aw ti khawm hi ngaituo awm hiel a ni tah. Biekin sunga khawm Bible, Hlabu chawinawhai khawmin phone chu an chawi hlak a nih. Biekin sunga khawm Bible, Hlabu nek khawmin an langsar ta a. Chuleiin eilo chawi ani khawmin that(Switch off) a bag sunga thun tha hlak inla a tha naw ding maw ? Dan ei siem thei naw khawmin inhril hriet ngun chu tha hle dingin ka ring. Biekina nuhmei kekawr bun tha ei ti nawh a, an bun khawmin a chungah puon an bi chun an lang ta nawh a, ei sawisel ta ngai naw ang bawkin, ei chawi khawmin inlang naw sien chu a tha le mawi lem ni ngei a tih. “Aw ka hringna, Lalpa chu inpak la, ka sunga um po pohai a hming inthieng chu inpak ro. Aw ka hringna Lalpa chu inpak la, a thilthaw that popo chu theinghil naw. Ama chun I ritlona po po a ngaidam hlak a, I natna po po a sukdam hlak”(Sam 103:1-3) a Lal Davidin a ti angin eini hai khawm Pathien chawimawia inpak dingin ei in ngen a nih. Ama chau inpak tlak le chawimawi tlak a ni sih a. Amen.
Source: Kristien Magazine
COMMENTS