Fox Journal: Chanchinthar tak ni ta naw sienkhawm zani hmasak lai chaua thil tlung a ni el khelah nu le pa le a dang dang haiin ei ngirhmun hi ieng ang am an tah a ti ei hrieta nau hai enkawlna kawngah thang ei lak nasat zuolna dingin la hang suklang ei tih.
Master Th. Lamlalmuon s/o (L) Th. Tuankhanlian kum 12 vel, Koite khuo CCPur a um le a ruolhai pahni Kamchungnung kum 13 le Lenchungnung kum 6 liemtah Inrinni khan tlangram tienga sinthawa inhlaw dingin Shaktiman ah an zui a, Monsang-Henglep panin sung le kuo hriet der lovin an lo inrelhmang a nih.
A khaw (Koite) mipui haiin hieng naupang pathum hai umna an hriet ta naw phing chun nasatakin zawngna sin an thaw tah a. Chuonga an zawng zing lai chun Monsang a papui pakhat chun a hmu thu hrilin Koite lal (Chief) inrawinain tlangval tam tak le tlangram tieng an va zawng a, an hmu ngei bawka, tuhin chu Koite tlungpui an ni der tah.
Anni rawi hi hienga inhlaw dinga an inrel hmang nasan chu Mobile Phone Touchscreen (Smartphone) inchawkna dinga inhlaw tum a ruka inrelhmang an nih. Koite khawtlang a khawphekin an sukbuoi, sung le kuo lung inrim takin an sie bawk a nih. Pawi ei ti tak zet el hieng lawma an lungril mobile phone ditna in a run hne hi.
India ram inthang tum mek a cheng hai, India a khawm a ram kilkhawrna pawl tak Manipur a khawm CCPur District a cheng hai hi khawvel changkangna hmu zing siin khawsakna lan hnuoi leiin harsatna a min tlun mek chu a nih.
Ienglei am ni tang a ta kum 12 mi chau chau haiin Mobile Phone dit leia a ruka inrelhmanga khaw hla tak el sung le kuo le inhmu phak nawna hmun Shaktiman zuia inhlaw an thlang hiel el tâk hi? Ngaituo tham a nih.
COMMENTS