PATHIEN INPAK LE CHAWIMAWI KHAWLAI HMUN A KHAWM INHAWI TITU HMAR GOSPEL SINGER GRACE FAMHOITE
Grace Famhoite hi January 26, 1997 in Sielmat hospital ah a pienga, Rengkai, CCPur khuo ah seilienin, tukhawm hin Rengkai, Edenthar ah an sungkuo in an khawsa mek. Naupang Sunday School-a a um laiin malzai (Junior) hlasak in elna a um a, an unit aiawin a suoka, hi hi mipui hmaa a hlasak a vawikhat ngirsuok ve na a nih. Hla hi a chintet anthawka sak hlak reng chu a nih a, a duthusam ang takin mi laia sak chak na a hung nei pei tah a, tuhin chu Hmar mipui hai lem chun a rawl ngainobei tak hi ei ngaizawng huoi huoi a hung ni tah.
Hla 7 vel chu ama mimal in a lo khum tah a, a music video hai Pathien zar chau in hieng 'Malsawmna a lo nih', 'Thlamuongna Lalpa' le 'Malsawmna sirbi' hai hi ama mimal a sengna a nei naw, a hla phuoktu haiin an produced a nih. Hieng hai po po hi Grace tading chun malsawmna a lo ni vawng el a nih.
Eini lai a ei hrietlar em em le a rawl ei ngaizawngna pakhat Krismas hla 'Bawngin runpui a bel' ti hi anni sungkuo in an seng umsun chu a la nih.
Tuhin hla thar pakhat a buoipui nawk mek a, recording hi anhma tieng thaw a tum a, nghakhla a um takzet. Hmar hla thar ei nei nawk vat ta ding niin anlang a, tha a suk tho hle.
Grace chun "Hla ka sak reng reng hin inhawi ka ti a, sak fuk naw chang annawleh taksa chau chang um sienkhawm mipui laia Pathien inpak le chawimawi hi khawlai hmuna khawm inhawi ka ti vawng. Ka sak nasan le kan pâk ka hriet lei a nih. Hmatieng peia khawm hi neka nasa a thaw ka la tum leiin in mi tawngtaipuina ka ngen, mihriem ve el ka ni sih a" tiin a hril.
Ei tawngtaina a hai lo hrie zing ei ta, ei Hmar hlasak thiem hai hi ei thangpui thei na na ah thangpuiin dawmkang pei ei tiu. Ei ta an nih a, eini'n ei chawisang naw chun tuhai in am an mi chawisang pek ding?
Grace Famhoite hi a hla thar a buoipui mek a khawm hlawtlingna tamtak hung dawng a, a ngaitu hai po po in thlarau malsawmna an chang ngei thei na dingin FJ chun ditsakna insang tak ei inhlan a nih.
COMMENTS