HMANGAINA MAK RIMAWI TAK CHU

Kumzabi 18na lai khan nupui pakhat, ‘Mama Newton’ tia a veng mihaiin an ko a uma. Ama nu hi an venga naupang taphawtin nu dinga an dit chu a nih. A luah kel sam toin, a kut kak tek tukin, a hmai hlak mitthli surna in a suk hmel hem zo. Sun le zanin, nitin in hi nu hin a naupa John ta dingin, thahnemngaitakin mitthli le insawpin a tawngtai hlak a nih.

A naupa John chun tleirawl a niin a nu a tlan hmang sana, lawngah an hlaw tah a nih. Ama hi naupang lulul tak le kawmaw tak el, a khaw pumpuiin misuol tia an iko a ni a. Amiruokchu, Mama Newton hin a ta dingin a tawngtai rawpa, Pathien kuomah a naupa chu sandam dingin le a rawngbawltua hmang dingin a ngen rawp hlak a nih.

Ama nu hin thil pahni ring bur a neia. Chuhai chu: Tawngtaina thilthawtheina le a naupa hi nikhat chu ala piengthar ding a nih ti hai hi an nih. Nikhat chu Pathienin Mama Newton tawngtaina a dawn a. A naupa John Newton lungrilah sin thawin a hung piengthar tah a nih. Chu taka inthawk chun, John zu he pa chu John- Thuhriltu tia hriet a hung ni tah. Ama, John Newton ngei hin, kum 54 mi a niin, Kristienhai national anthem tia hriet lar hiel, “Hmangaina mak rimawi tak chu” ti hla a hung ziek suok a nih.

Pathienin John Newton hi nasatakin a hmanga, ama leh Thomas Scott le William Cowper hai hi thaw tlangin an rawngbawl naah mi tamtakin Pathien sandamna an chang a nih. William Cowper hi, ei kristien hlabua hla, ei sak vet, “Immanuel a thizamah” ti hla phuoktu a nih.

Hieng ang khawpa Pathienin a hmang hi ieng lei am ning a ta? Hieng po po a tlung theina chu John Newton a nu Mama Newtonin ringna det tak neia thahnemngaitaka a naupa ta dinga a tawngtaina ra a nih. Nuhai hi an pawimaw em em. Nauhai nunah mawphurna lientak an nei a nih. Nu tha tak tak, Lalpa ringtu le Lalpa titu ei nei hi ei vangnei hle. Khawvela hin ei nuhai, Pathien ti mi ang hi an vang ta hle a. Nu tha an uma, nu ropui tak tak, thilthaw thei em em an um bawka. Chulaia ropui tak chu Nu, Lalpa titu pe Lalpa beiseituhai hi an nih.

Nuhai hin nauhai chungah mawphurna lientak an nei a nih. Lalpa tina le insung enkawl dan ding chu Thuvarhaiah chieng takin an ziek a nih. Bie chieng ei tiua, inchuk ei tiu. Vawisunnia nuhai po po, nuhai ni hlim le lawm taka hmangtuhai hi inngaituo thar ei tiu. Ieng ang Nu am ei ni a? Nauhai Pathien tieng kawk hmutu Nu ei ni am? Ei ni naw chun ni tumin thang la thar ei tiu. Khawvelin a mamaw tak chu Nu, Lalpa titu le Lalpa beiseitu, Lalpa tinaa a insung relbawl hlak a nih.