-David Paultinkhum
Naupangte kani lai khawn Football pet hi keima tawka kan hnik ve em em a, thiem le thiemnaw chu thuhran; ei inhnikna in a phâk ve hrim hrim leiin a sûr a sa hnuoia Ball hnawtin ei tlan ei tlan el. Kapa khawm khan amin hnikpui ve thei khawpela, nei le neilo hrilloin ka balpet naa ka mamaw dinghai ami lakpek el hlak. Ka balpet khawm a en taima thei em ema; pahai enlai ngeia ei hang inkhel khan thafanna thartak ami pek nawk hlak. Zingkara inthawk zantieng chen bufak khawm uksak lêk loa ei inkhel khawm khan phingțam nachang khawm ei hriet nawh. Neka upa hai lai ei inhnela inchukna takin ei hmanga anhawi thei hle el. Tulai hun angin khanglai huna khan Ballboot khawm eila bun meu nawh. A bun sun hai khawma khingtieng chau dam an bun phak hlak. Kan ruolcham laia Ballboot nei hmasatak khawma Buffalo boot secondhand a nei phâk ve tawk a nih. Khang hunlai khan kapa beisei ang ka phâknaw mani ding balpet zoa in kan lawi zatin " Bawia, mi hnunga hrat deuin i tlan hlaka" ami lo ti zie hlak. Kei chun a umzie mumal hrelo chun ka lungrilin "kapa hin tlan hrat ami ti ni awm hih" ti'n kalo lawm ve em em hlak.
Nikhat chu University hminga Football Match kan nei laiin papui pakhat hin a naupa balpet a hung en ve a. A naupa bula a thiem zie le tlan a hratzie a hang hril meu khan kapa tawngbau kha ka hung hrietsuok nal ela. Ka khawsawt luotin ka mitthli a tla ve hiel el, kapa khan a theitawp takmeu suoin balpet amin hnikpuia chu a beisei ang ka phak naw khan ka lungril a sukna hle ela; hang țan thar nawk dingin ka hmangaitak kapa hlaka ami dampui tasi nawh. Pasal e ti lo chun mi hrietnaw kar mitthli ei huoi rawp el. Kapa khan a naupa hi amilo hmangai em leiin mi halin ka hratnawna hai kha ami sawisel ngai nawa; duottakin ami lo enkawl lem alo nih. A naupa'n mi nauhai a phaknaw zie kha a hmuin a lungril alo na thei awm de maw! Pa haiin nauhai hi anlo va hmangai ngei de aw! I pa kha ala dam ani chun hmangai hle raw aw??
Hi thu ka ngaituo pei laiin thildang pakhat hung inlang nawk chu ei Hmar hnam hi a nih. Krista chanchințha chel hmasatu le a hrildartu; mihai tadinga malsawmna ni dinga Pathien bêl ruot eilo nih. Pathienin iengleia hnam hieng zozai um laia Hmar hai kher kher hi ami thlang am? Tihi ngaituo tham a tling. Krista hmangaina leiin thalangsuok bîka ei hang um el dam hi a ropui khawpwl a nih. Hi chanchintha chelngirtu ding le puongdara; mihai tadinga malsawmna ni thei dinga ami beisei lei ni ngei a tih. February 5, 1910 a inthawk kum iemani chen kha Chanchintha zarin mihai chung en le inpak ei hlawa. Ei thaw thaw kha a țha sawnin anmi entawn a. Politics a khawm a hmasa pawl le a lusa pawl ei ni thei pei a nih. Inchukna tieng nisien khanglai huna ei mithiemhai kha tulaia thangthar haiin ei tluk phak teu teu ta nawh. An hla phuok le an thuziek haiin ei nun chu ala chawm lem hman hman a nihi. Khanglai huna khan ei Hmar hnam sunga inremna, hmangaina le inthuruolnain hmun a hluo lien em em a nih. Pi le Pu tlawmngaina dam, ruol in hmangaina dam a taka hmu theiin ala um.
Anleh tu ngirhmuna ei hnam hi teh? Ilo ngaituo hlak am? Ilo belchieng hlak am? Kapa tawngbau bawk kha ei chunga hin a tlung anta naw maw??? Mi ienga ei ngai lo le ei hmusit haiin anmi tlansan vawng anta naw maw? Eila hnawtphak in i hriet am? Pathien thua ti chau naw chu mi'n anmi chung enna le anmin za na hi aum ta chie am ani maw!! Pathien thu le hla a hin mihai inpak le inhnar eila ni țawk țawk chau annaw!! Pathien thu hi ei chel zing naw lem chun ei ngirhmun hi hmu ngam um naw nih. Mi ri kukha ei ri eila sawn dinv a nih. Pathien hmangaina tawp neilo chun ei hnam chunga khawm hin a zangaina le hmangaina tawp loin ala suklang pei lema, ei thaw anga mi thungrul ding nisien hi thisen insuo hnam hi ami hla ring aum ta nawh. Ami hmangai em leiin hunțha ami la buotsaipeka; Ama tienga ei kir hun hi a nghakzing a nih. Hieng ela ei um ding hichu Pathien khawma a phal ring aum nawh. Ami beisei hi ansang hle ding a nih. A beiseina hi nakie phâknaw pal hlau eiti ti inlau aum ngei maw!!!
Aw Hmar hnam thanghar la, i ralthuom GOSPEL ngei kha chelin thang hang la thar raw ie!! I thiemna le i varna hai sira hnawlin; Pathiena i ralthuom pawimawtak kha changchawiin ke pen tan rawh.
COMMENTS