- Jr Amo
Mother's Day ti hi ei tawng ni naw sienkhawm a hrethiem naw ei um ring a um naw a. Ei tawnga ei hang inletsuok tum chun Nû hai Ni, ti inla khawm a suol lien taluo ring a um nawh. Nû hai ta ding bik lieua ni ser pawimaw lo um ta hi sungkuo a inkhat nu in chawimawi a phu zie, nu hai hi chawimawi tlak an ni zie ti a lo suklang tumna a ni tak.
America rama chu Nû hai ni hi hi kum zabi 20-na bul tiengpang khan hmang tan a ni a. A then dang dang hai le khawvel ram dang danga hai Nû hai ni inser dan hi an ang nawna tam tak a um ve tho a nih.
Tulaia ei ihmang mek Nû hai ni hi kum 1908 a hmang le inser tan tah a lo ni a. Ei hrietlar em em Anna Jarvis in St Andrew's Methodist Church, Grafton, West Virginia hmuna a nu a hmangai le a ngai em em hrietzingna hun a hmang tana inthawka vawisuna Nû hai ni ei hmang mek hi hung insieng tan a lo nih.
Kum 1905 khan Anna Jarvis hin America rama Nû hai ni hmang a ni theina dingin thang a lak tan a, hi kum hi a nu Ann Reeves Jarvis a thi kum a ni bawk. Anna hi Peace activist a ni a, American Civil War hun lai khawm khingtieng khingtienga sipai hliem hai enkawltuin a thang a, hriselna thua vantlang hrieta thang lain Mother's Day Work Clubs khawm andin nghe nghe.
Anna hin a nû sin bangkhai sunzawma a thei ang anga a nû chawimawi le nu hai ta ding bika ni pawimaw sersuok chu a nuom hle. Asanchu, khawvela hin nû hai baka mi hmangaitu le ei ta dinga inrim hi an um nawh ti a hrietchieng tlat lei a nih.
Kum 1908 khan US Congress chun Mother's Day official holiday a hmang dinga hnina chu a hnawl a, an hnawl nasan hi fiemthawin Mother-in-law's Day hmang tul ve pal a tih an ti nih. Amiruokchu, Anna Jarvis thang lak tawp naw na zarin kum 1911 khan US state po po chun hi ni hi chawl (Holiday) in an hmang tawl tah a. A hmang hmasatak tu chu Anna hai khuo West Virginia an nih. Chuong chun, kum 1914 a hung ni chun Woodrow Wilson (US President) chun Mother's Day chu Nû hai inza le chawimawina ni a hmang dingin National Holiday dinga puongin suoi a kei tah a nih.
Mother's Day hmang dingin nawr hlawtling sienkhawm Anna chu Mother's Day hmang a hung ni pei dana (Thuom sumdawngna) chun a lungninaw a. Kum 1920 kum bul tieng chun Hallmark Cards le company dang hai chun Mother's Day card an hung zawrsuok a. Chu chu Anna chun Mother's Day hmang dan ding annaw ziet le an manfuk naw niin a hriet a, Mother's Day thiltum tak a suksiet niin a ngai. Hieng thil lei hin Mother's Day chu ama vekin boycott a thaw nawka, company card zawrtu hai chu a hek ding tiin a vau bawk a nih.
Anna chun mihriem hai hin gift le card siem sa hai inchaw lovin an nû hai hmangai zie le chawimawina chu kutziek ngeiin an suklang ding a nih tiin ngaidan a nei tlat a. Hieng ang card a sumdawngna hai hin Anna a suk lungsen hle a, jail a chen intang pha na'n a hmang hiel a nih.
Kum 1912 chun Anna chun Mother's Day chu May thla kar hninaa Pathienni a hmang dingin a rem thaa, chu ruol ruol chun Mother's Day International Association andin a. Mother's Day tia a lam le ziek dana hin "Mother's" ti hi singular a ziek a, sungkuo tinin khawvela nu hai po po ti zawng ni lova inkhatnu an chawimawi seng theina ding a ditna leiin chiengtakin hrilfiena a siem sa bawk a nih.
Tuhin hi ni ser pawimaw tak el hi rambung dang dang (Khawvel pumpui ti thei hielin) haiin an inser deu seng ta a nih.
A tarik ti bika ziek dingin May thla kar hnina Pathienni a ni pei leiin a tarik hi hmang hun huna mi bak hi zieklang a remchang naw nih.
Nû hai ni hi a pawimaw khawpel a. Ngaidan le dit dan tam tak el inanglo a um, indik tak tak el an ni seng. Nû nei ta lo hai ta dingin a chanhai tlak hle ding a nih ti hai khawm a tam. Amiruokchu, Nû chu a lo um ta naw a ni khawma an rimna le a nau a enkawlna po po, a hratna le a hmelthatna sawrkang rieta a hmangai a nauhai a pawmlienna chun a ni bik peka inser a, chawimawi chu a phu tak zet el a nih.
Nû hai kuoma ei hmangaina le ei ngainat zie a taka suklangna hun tha, khawvela ei hringnun ei khalna ding kawnga pawimaw tak chu Nû ti thumal hi a lo nih.
Nû le nau inlaichinna hi thu le hlaa ziekdawk hne ding ruol a lo ni naw a. Hmangaina hrilfie ruol lova nau enkawltu a nih. Lampui indik mi kawkhmuin, hringnun ei khalna kawnga ei thiltum hlawtling thei dingin a mi lo siem a. Nû hai hi lekha an thiem am an thiem nawh, an mawl am an var, an thu zawm le inza an phu takzet.
Mi dawnril tam tak hai chun Nû hi pathiennu/Pathiennu tiin an lo inbuk hiel a. Hringnun hi umzie nei takin an mi siem pek a, Nû hai hin hmangai le duot, ngainat le inza an nih ti hi an dam hun lai ngei hin an hriet a va pawimaw de!
A nih! Vawisun hi Nû hai ni, ni famkim, Nû hai kuomah nau haiin an hmangai zie an suklangna hun tha chu. I ta dinga a hlut zie le i khawvel a ni zie hril rin naw rawh. Ei ta dinga thil pek hlu tak el, ei khawvel sukmawitu a ni zie ei inhriettir a pawimaw. Chawimawina po po, inzana po po le ditsakna po po hi ni bek hin Nû'n a dawng ding a nih.
Hrezing hlak ei tiu, Nû chun nau ta dinga a tuorna le an rimna hi an zawtsuok ngai nawh a, harsain rinum hle sienkhawm to tawkin a tuormuolsuo el hlak. An harsat tuor le an rinum tuor suksatu ni loa a sawk zangkhaitu ei ni nuom a hle. Nû le nau kara inlaichînna um ang hi khawvela hin inlaichînna dang a um ring a um nawh.
Hnuoi vantirko Nû, Pathienin a mi pek hin chawimawi a phu hrim annawm! Zingkar dei lai khawma insunga tho inhmatak, zan a midang po zal hnunga zal chau hlak. A tul le pawimaw po po thawtu Nû a nih. Pakhat chau nisienkhawm insung a hluo bit hnea, a um nawna hmun chu a ruok hle hlak.
Mithiem hai chun Nû hai hi ei school hmasatak an nih, lampui indik le thu tha mi kawkhmutu tiin an lo hril bawk. Mitinin naupang hun hi ei ngaizuol hlak, asanchu, nu le hun ei hmang that/rawn hun lai a lo ni lei a nih. Nû hlut zie le pawimaw zie hi innghil thei an nawh.
Nû hmangaina iengtin am ei lo sanglet hlak a? Inruiin, a thu zawm lovin, ei dit dan ang chaua hun hmanga Nû thu ngai lovin Nu hmangaina hlutak el hi ei lo sanglet hlak am? Ei suol le ei that naw lai tak khawma Nû hmangaina chu a kiem ngai nawh a, hmangaina tawp lo, a thei bak le a tlin bakin nau a lo enkawl hlak a nih.
Vawisuna ei hriet tlat dinga pawimaw chu hi hringna Nû peka ei um hlu tak el le, hi Nû hi hrietlawk um lova lakpek thei zinga um ei nih ti ei hriet a pawimaw hle. Hmangaina chu iem ana? Hmangaina chu thu chau annawm a taka suklang a ni hma chun. Andik a nih!
Nû hmangaina hi iengtin am vawisun hin sanglet ei ta? Nû tia ei kova an hawi thei lai le ei rawl ri hre theia a um lai hin ei hmangai zie suklang ei tiu.
Nû hai ni ei hmang mek a, i nû chu kuo la fawp rawh. Hmangaina indik le ditum, enkawlna thatak a dawng a nih ti suklang rawh. Hi hun tha hi hmangthel nawng ei tiu.
Vawisuna Nû hai ni hmangtu ding po po Nû hai kuomah ditsakna chibai lungril takin ka buk cheu a. Mitin chunga roreltu Pathienin malsawmna'n vur sienla cheu, sawt tak dam inla, nau, tu le te hai Pathien dit dana enkawl puitling seng thei ding le sungkuo ditum tak el Kristien sungkuo indin seng thei dingin malsawmna dawng seng ro.
A kuthai rasuok chu ama pe la, Dâikawtkhârhaia chun a sinthawhai chun ama chu inpak raw se. - Thuvarhai 31:31
Nû hai ni Chibai.
COMMENTS