POCSO ACT

POCSO Act (Protection Of Children from Sexual Offences Act)
Emman Pulamte


Ei tulai khawvel hang thlirin nuhmei-pasal pawngsuolna/suk-dudana hi a sosang hrat hlea. Ei khawpui Delhi ngeia khawm hriet ding aum deu zing tah. Hi khawnga hin India sawrkar Na khawm a sît hlea, sukre/sukbo tumin nasataka ṭhang lain Act/Dân thar hai chen a pass hiel a nih. Chu hai laia Act/Dân pass thar pakhat chu POCSO Act hi anih. Hi Dân suonga hin hriet ding le zawm ding tamtak aum. Tlawma a pawimaw ei ti zuol hai ei thei ang angin hang tarlang ei tih.

Protection of Children from Sexual Offences Act (POCSO Act) hi Naupang (kum 18 hnuoi tieng) hai Nuhmei-Pasal thila suk dudana/pawngsuolna a’nthawka venghimna Dân ania. Hi Dân hi Indian Parliament chun May 2012 khan hmang thei dingin phalna alo insuo tah a, tarik 14th November 2012 khan hmang ṭan alo ni tah nghe nghe a nih. Hi Dân hin naupang nuhmei-pasal thila insuk dudana/pawngsuolna hrimhrim hai chieng tak le fel fai takin a hril fie tawl. Hi Dân hnuoia hin naupang kum 18 hnuoi ting hai chu kum tlinglo, mania thu tlukna siem theilo/phallo, nuhmei-pasal thila la ṭheṭhawp theilo le huomchin neia sie an nih. Anni hai hi miin an pang, ser, nene, le a dang dang hai an nuomnaw sa sain lo thempekin lo zalpui khernaw hai sienkhawm ama ngei chu hi dan hnuoia hin pawngsuoltu chu anih. Hi dan hnuoia hremna chu pumpel naw nih.

POCSO Act hi Indian Penal Code a section hran hran hnuoia auma, amiruokchu IPC chun naupang kum tlinglo hai nuhmei-pasal thila dân a hranin a sie nawa, chu chu naupang le mitling ta di’n a hranin dan a riruong naw tina anih, POCSO Act ruok hi chu a biek liua Naupang kum 18 hnuoi ting hai ta dinga Dân a riruong anih. Hi Dân hin Naupang suknawmnata um hai hming, thlalak le nina hrim hrim news, media, internet le thil dang danga hril dar/ suk dar phal ninaw nia, hriltu/suklangtu anlo um pal ani chun hremna tuokin Jaila hai kum khat chen sie/intang an tih.

Hi Dân section – 21 na a chun suksuoltu chau niloin naupang suknawmnat lai hmutu/hrietuin naupang ṭhangpuina dingin iengkhawm hma la loa ato sawngpui ti hriet dawk ani chun ama ngei khawm hrem thei ning a ta, jaila hai chen tlung/intang thei le fine hai chen chawi thei a tih.
Naupang suknawmnat hai thubuoi chu inrang taka enkai/sukfel vatvat anni theina di’n hi Dân hin naupang hai ta ding bik lieu lieuin Special Court a siem pek. Chu baka hi Special Court hin buina lo umta/tlung hai hrim hrim chu kum khat sung ngeia chingfel di’n thu a siempek bawk.
Hi Dân hin naupang hai le inthuruol taka fein, thu hril kawnga dam, hrietpuitu siemna dam, en fiena dam le adang dang hai Courta rorelna inthlunpui a ta, chu taka chun:

Naupang thu chungchang hai ching takin suizuina lak ding, chu khawm chu naupang hai In ah/ama nuomna hmun ngei ning a tih. Nuhmeite ani chun nuhmei Police ngei hmang ding, athei hram chun Sub-Inspector hnuoi nilo ding. Suzuina chu ni 30 hma ngeia zo fel ding.
Naupang tukhawm police stationa zan-khat khawm suk-tang/chel-tang phal ninaw nih.
Police officer tukhawm uniform hak pumin naupang inbiekpui phal ninaw nih.
Thu khawchang hrim hrim naupang hril dan a’n thawka lak khâwm ding, mi dang hai hril sawngna hai phal ninaw nih.

Ṭawng inlettu/thu khawchang hretu a ṭul dan izirin ruoi thei ning a tih.
Naupang ruolbanlo alo ni chun naupang inbiekpui theitu ruoi thei ni bawk atih.
Naupang medical examination chu naupang suong le kuo hai um lai ngei annawle naupang in a ringzo mihriem anei umlai ngeia nei ning a tih. Nuhmeite ani chun nuhmei doctor ngeiin examination nei a tih. Naupang thu indawna nei lai atam thei ang chawlna (break) hun siem ning a tih. Naupang chu thu khawchang indawn dingin nuom hun huna ko thei ninaw nih. Naupang inṭhi zawnga tawngbau hrim hrim hmang phal ninaw nih. Camera hmang phal ni bawk naw nih.  

Hi Dân hin a thawtu/suknawmnattu chau niloin, a tûmtu le a ṭhangpuitu hai chen khawm hremna pe thei ata; a ṭhangpuitu chu a thawtu le inang rawngin hremna pe thei ata, chun a tumtu khwm  sukpuiling khernaw sienkhawm alo tûm hrimhrim ani chun hremna pe thei atih. Amiruokchu hremna dan ruok chu suknawmnattu haiin hremna andawng chenve nithung a tih. Hi Dân hin naupang suknawmnat hai inrang taka enkawl nghal ani theina di’n Special Juvenile Police (SJP)/ Local Police a riruonga, chuong hai chun naupang hai ta di’n thil ṭul inhmaw popo hai sukfel zung zung an ta, naupang chu Shelter Home/ Observation Home/ Hospital hneina taka sieng an tih. Special Juvenile Police/ Local Police hai hin naupang hai sawttak enkaina/ venghimna hnuoia an um theina di’n naupang chungchanga sawiselna (complaint) an dawng hai hrim hrim darkar 24 sung Child Welfare Committee (CWC) kuoma report peng an tih.

Hi Dân hin naupang hriselna ting panga inhmaw taka ekai alo ṭul pal ani chun damdawi lekha le lekha dang dang hai hni kher ngai lovin enkai nghal anni theina dingin phalna a siem pek bawk.
Hi Dân hin naupang suknawmnat tuortu hai ta di’n zangnadawmna special court hai siempek di’n thu a peka, chu taka chun naupangin inchûkna ting, sin thawna, piengsuolna, natna hri invawina, naupâina hai, etc, lâka harsatna alo tuok ani chun zangnadawmna peng a tih.

Hi Dân hnuoia hin Hremna chi hranhran siem ania, chuong hai chu:
Penetrative Sexual Assault (section 3): Hi Dân hnuoia hin suksuoltu chu Lung-ina kum 7 neka tlawmlo intang, damsung chen khawm suksei thei, chun fine chen khawm nei thei (Section 4)
Aggravated Penetrative Sexual Assualt (section 5): Hi Dân hnuoia hin suksuoltu chu Lung-ina kum 10 neka tlawmlo intang, damsung chen khawm suksei thei, chun fine chen khawm nei thei (Section 6)
Sexual Assault (section 7): Hi Dân hnuoia hin suksuoltu chu  Lung-ina kum 3 neka tlawmlo intang, kum 5 chen khawm suksei thei, chun fine chen khawm nei thei (Section 8) Aggravated Sexual Assault (Section 9): Hi Dân hnuoia hin suksuoltu chu  Lung-ina kum 5 neka tlawmlo intang, kum 7 chen khawm suksei thei, chun fine chen khawm nei thei (Section 10) Sexual Harassment of the Child (Section 11): Hi Dân hnuoia hin suksuoltu chu  Lung-ina kum 5 intang le fine chawi (Section 12)
Use of Child for Pornographic Purpose (Section 13): Hi Dân hnuoia hin suksuoltu chu  Lung-ina kum 5 intang le fine chawi athu i zirin, kum 7 chen khawm ni thei, fine khawm chawi thei bawk [Section 14 (1)]

Hi Dân hi mipuiin an hrietzau theina dingin mawphurna Central le State Government hai kuta si a nia. Hmangruo chi hranhran hing - Cinema, TV, Radio, Newspaper, etc., hai hmangin mipui hai inhriettir chu Central le State Government thaw ding makmaw anih.
Hi Dân Section 14 na chun, a act hai lai thleng ṭul alo um pal ani chun tleng thei thuneina Union Government a peka, a dan-le-dun (rules) siem ṭhat thuneina ruok chu Central Governmenta apek thung. Dan-le-dun remkhawm/siemna kawnga hin inchûkna insang zat le experience-ṭawng inlettu, inchûkttirtu, thuhril sawngtu naupangin a nei hai; naupang venghimna le enkaina le inhmaw taka medical treatment a nei hai; zângnadawmna pekna kawnga dam; hunbie taka enkaina kawnga dam huom a tih.

A chunga ei tarlang le inzuola buina hai hrim hrim mi chiengfel puitu dingin India Sawrkar chun district tin ah Child Welfare Committee (CWC) le Juvenile Justice Board (JJB) a sia, buoina ilo tuok pal ani chun anni hai kuoma hin I buoina chu anrang thei angin inthlun nghal hlak rawh. Poisa seng ngainaw nia, I buina chu an rang thei angin lo chingfelpui an ti che.