App Store a Snapchat rating 1 ah tlahnuoi

Evan Spiegel, Snapchat CEO

Fox Journal | CCPur: Thangthar Social Media hmang hai laia inlar ve em em el, Snapchat chu tulai hnai hin a hlutna nasatakin a tlahniem. Hi thil hung um thut nasan nia hriet chu Snapchat CEO, Evan Spiegel a tawngbau ni a hril, "Snapchat hi ram pasie India le Spain a hai suk hmasawn kan hnik nawh" suklang a nina le inzawmin nasatakin a hlutna a hung inhnuoi duok a nih.

Hi le inzawm in App Store a rating 5 star ni lai zing chu 1 star ah a tlahnuoi dawr a. Android Play Store a ruok chu 4 star rating a la nih.

Hi thil hung in irsuok tanna chu US besan news website pakhat Variety an ti chun liemtah Inrinni khan Snapchat thawktu hlui Anthony Pompliano tawngbau, CEO Evan Spiegel in September 2015 a a kuoma a lo hril,"Hi App hi mi hausa hai ta ding chau a nih. Ram pasie India le Spain hai angah suklien ka nuom nawh" ti a hrilsawngna an hung quote dawk lei a nih.

Hi thil hi India mi le sa hai chun an pawm zam el naw a, social media hmangin nasatakin CEO tawngbau hi an beilet a nih. App rating a hung tlahnuoi hin CEO le App demna chu a hung hluor nasa zuol hle bawk. Social Media a bak a then chun App Store comment a hai khawm nasatakin an dem thu an zieklang tawl bawk.