Fox Journal | CCPur: Kum 2011, May 2 a Al-Qaeda hai hotu lutak Osama Bin Laden thattu US Navy SEALS hai chun tulaia inhrosa ve zing el N. Korea hotu lu tak Kim Jong-Un chu a thuneinaa inthawka peithlak dan ding an phan mek nia hrillang a nih.
US Ministry of National Defense in a hril dan chun N. Korea hai hotupa chu a chetchang thei naw dan lampui dapin thang an lak mek a. Hi exercise hi S. Korea ah fepui ning a ta, Korean Peninsula hmunah buoina a suok thut pal chun tiin inral ring sa zinga um a ni thusuok chun a tarlang a. The SEAL Team 6, Special Warfare Development Group ti a hriet ni bawk hai chu May 2011 a an chet anga ra insuo nawk tumin an inpuocha nasa hle ni'n MailOnline chun a zieklang.
US in sipai thahratna ieng ang khawm hmang sienla, ieng ang indona a ngam ang ang chu Democratic People’s Republic of Korea (N. Korea) chun beilet dingin a cho hle thu a hril ve.
Vawisun Pyongyang hmuna an supreme leader le founder Democratic People’s Republic of Korea, famtah Kim Il-sung a Birthday 105 an lawmna huna hin N. Korea chun Nuclear ralthuom ensin le suklang ringa an thlir thup laiin Pyongyang hmuna fe Journalist hai chun Nuclear ralthuom hmanga indona suok thei ding awmin boruok anlang naw thu an hril. Amiruokchu, khawvel hriet le hmu thei angin US le N. Korea chu inkap thei zing ngirhmun a um an nih.
Kim Il-sung hi April 15, 1912 a Pyongyang khaw kawl Mangyungbong khawte a Kim Sŏng-ju hming puta pieng a nih. Presbyterian sungkuo a inthawka seilien Kim hai hi unau pathum an ni a, a upa tak a nih.
Kim hin a dam hun sung nuhmei pahni a nei a. A hmasa lem Kim Jong-suk leh an nau hmasatak Kim Jong-il an nei a. Hi baka hin nau pasal dang le nau nuhmei dang pakhat ve ve a nei sa a. A nuhmei Jong-suk in kum 1949 khan a thisan a, hi zo hin Kum 1952 khan Kim Sung-ae a nei nawk. Sung-ae le hin nau pathum an neia, hieng a nau pathum hai laia mi Kim Pyong-il chu kum 2015 a inthawk khan Ambassador to Czech Republic sin a thaw tan a nih.
Kim hi July 8, 1994 khan heart attack a nei thut leiin kum 82 mi niin a thi a nih. Kim Il-sung hi tuta N. Korea hotu lu tak Kim Jong-Un a pa pu a nih.
COMMENTS