Kristien ei intina hi khaw chena hla am ei fepui hlak a? Biekin sung, inkhawmpui, ruolhai lai, Pathienni chau, Biekin inkhawm sung chen chau am a nih? Hi zawna hi ho te anga in lang, amiruokchu pawimaw deu el a nih.
Kristien ei nina hi nitina ding a nih. Isu Krista khawma ama zuitu ding chu nitina ama Kraws puta zui ding a ti a nih. A nih, eini chu inkhawmpui dam, Biekin a dam chu ei theina le thlarau a hrat in ei ngai a. Amiruokchu, nitin tina hring chu mi tlawmte chauin an thei tlat hi a pawi ta hle el. Puotieng dam, inkhawmpui a tumtieka, mani inah, re deua ei umin Kristien i nina kha hei en chieng ta. Inkhawmpui amani Pathienni inkhawm laia i ngaidan le i thil tuok hung in ang ta nawng a ta, harsa i ti leiin i tlu el ding a ni nawh. I ngir tlat ding a nih. Chu chu a nih ringtu nun det chu.
Rev. Thangngur chun, “ Pulpit a van thu ei hril a, Biekin sunga chau a thu ei zawm a, hmun danga thukhel hrila ei um hin Lal sin thaw ning ei tim? tiin a lo hril a. Kristienna hi Biekin sunga ding chau a ni naw a, mani nun a, thilthawna kawng tinrenga phursuok ding a nih.
Inkhawmpui hun a khawm, Pathienni hun a khawm, makhata i um hun a khawm, ringnawtu laia i um hun a khawm i nina chu i chel zing ding a nih. Ei fepui zing ding a nih.
Chuong ni loa Pathienni le inkhawmpui poa hlim a, makhata um huna mizie dang deu nei nawk zie i ni chun Isu Krista tuorna, hmangaina le sandamna i la hmu chieng tak tak naw khawm a ni el thei a nih. Phurna ringawt khawm hin Pathien rawng khawm hi nasataka bawl thei a lo nih. Chuong ringawt a ni chun inrim thlawn el an naw ding maw? Sandamna, tak nei chun detna, ringumna chen an tlun a nih. Vawisuna Kristien inti hai hi hang inbi chieng ei tiu khai! (Thalai Weekly/Fox Journal)
COMMENTS