HMARKHAWLIEN AH PALM SUNDAY LAM HRAW MIHRIEM 1400 VEL

Fox Journal | Hmarkhawlien: Hmarkhawlien Joint Churches Thalai Pawl Executive Meeting vawihnina Resolution No. 1 dungzuiin vawisun Palm Sunday, Kristien hai ta dinga ni pawimaw tak inserna zing hun chu khawtlang huopa hmang a lo rawt angin khawlaidungah kohran po po fekhawma Hosanna ti khekna le khawlai fangna hun hmang a nih.

‘Hossanna’ tia kheka thang hai hi nuhmei, naupang, nupui, papui, pitar le putar mihriem 1400 vel an thang ni a hriet a ni a. Zingkar inhma tak dar 3:30 in Seventh Day Adventist Church Biek-in tuol (Highway Junction) lai mipui intuokkhawmna nei a nih a. Pu Chawnglienlur in Public Address System (PAS) tawlna ding Pick-Up Truck thawlawmiin Power pek dawkna Generator a pekdawk sa bawk a. Reformed Presbyterian Church NEI in Sound Box an hung thawlawm ve a, UPC NEI haiin amplifier le pawimaw dang dang an thawlawm sa bawk.

Hi baka hin VC Amplifier le Mike Horn 2 hmang belsa ani bawk a nih. Program induonga um angin chanvo neituhaiin an chanvo an thlak thei seng a. Hun hawngna tawngtai HJC (Hmarkhawlien Joint Churches Chairman Upa K. Lalsamlien in a nei zoin area fangna nei tan a nih a. Motor a chuongin Pu Fimronghet Hmar, Pu Lalchawilien Khawbung, Tv. Joshua Lalrawngbawl le Tv. Michael Lalramtiem Neitham haiin Microphone hmangin ‘thuinsamna’ an nei a. Mipui zatve ding motor hmatieng an fe a, a zatve dang a hnungtieng an thang a. Beisei neka mipui an tam leiin Fulertal bazar sunga thuhril tawi (Short Speech) nei dinga ruota um chu a hmun an chep leiin thul a ni a. Diger khaw kawl, Bypass point le Binakandi Point haia nei a ni ta lem a, Pu Lalchawilien Amo in hun a hmang a nih.

Palm Sunday tuka Area fangna hi hnam dang hai chengna hmuna hai zun kuol a ni hnungin bul intanna Highway Junction ah bawk kir nawk a ni a. Hun tawpna siemin HJCTP Vice-Chairman Pu Abraham L Keivom in mipui pungkhawm hai lai lawmthu a hril a. Hmangruo pawimaw le tul hai inro lova hung pedawktu mimal le Kohran hai kuoma lawmthu hrilna neiin, “Palm Sunday zing hun ropui tak le hlawtling taka hmang a ni theina san chu Pathien zar le Hmarkhawlien khawsunga Kohran tinin HJCTP ruohmanna an thlawpna zar a nih,” a ti bawk a. Upa Herald Brown, Secretary, HJC in hun suktawpna tawngtaina neiin mipui an tin dar a nih.

Isu Krista; Jerusalema chawimawia a umna ni champha, zing hunser; area fang a ni lai hin Hmar tawng le tawng dang danga thuinsamna nei a ni a. Motor hmatienga mipui fe hai le a hnunga zuituhai chun, “Hossanna, Hossana Lalpa hminga hung chu inpakin um raw se. Ram hung tlung ding ei pa David ram chu inpakin um raw se. Achunghnungtaka khin Hosanna,” tiin an khek a nih.
(Input: THT)