 |
| Lampui siemthatna sinthaw lai |
Fox Journal | Hmarkhawlien: National Highway 37 in a hrawthlengna Hmarkhawlien khawsung sunga Lampui inruolnawna le ruo a sur huna tui intlingna hmun thenkhat hai chu Pu Lalthomlien Hmar in thahnemngai insuoa ama sum sengin pil hmanga an vurtir chu chawl lovin a sunzawm pei a. Khawsung inlailina tak Tinmukhi tia hrieta umna hmun chu vawisun (13th April) hin JCB le inthuoin lampui chilruolna (Soil leveling) sin an thaw nawk.
Hmarkhawlien khawsung lampui siemthata um theina dingin khawsunga Organisation hran hran le hnam dang hai thangsain Bandh hai khawm ko a lo ni ta hlak a. Sawrkar tienga thuneituhaiin khawsungin a pawimaw le tha nia a hriet lampui tha siem dinga a ngenna chu a thu le lekhahaia intiemna an nei hnung khawmin mita hmu thei ding an hmalakna a lan lang naw zing a. Biek-In panna lampui tha naw hraw rawp dinga la um chu Pu Lalthomlien hin ngaimaw in ama sum sengin hmalakna a nei pha ta a nih.
Khawsung mipuiin Pu Lalthomlien a hmalakna hi ropui le tha an ti hle a. Fur ruotui tlak hung intan dinga khawlai dung pawr neng nung hlak kha tuta lampui siema um lei hin an pumpeltir thei dinga ngai pawl tam tak an um bawk a nih.
Khawsung mipuihai harsatna ngaipawimawa a theina kawng hran hrana hmalak a tum dan hrilin Pu Lalthomlien chun PWD Minister Parmimol Suklabaidhya an hmupui tak thu khawm a hril a. Hmalak dinga sin dinga sawrkar tienga inthawka beiseina a um lai zingin ruotui tlak leiin lampui sietna bik hai a pawr hle a. Inkhawm fena dinga mipuiin lampui pawr tak el hraw ngaia la um hlak chu a ngaimaw thu hrilin hieng ang hmalakna hi a lo fepui el a ni thu a hril. “Gabinagar panna lampui le Diger Junction anthawka Hmarkhawlien Junction chen haia sawrkar hmalaknain CC Block dap a ni vat ta ding a nih,” tin Pu Lamthomlien Hmar chun a hrilsa bawk a nih.
COMMENTS