Fox Journal | Hmarkhawlien: Central Kristien Thalai Pawl, Independent Church Of India in hun sawt taka inthawka Hmarkhawlien khawsunga Thalai In a bawl chu April 4, 2017 khan hawng a lo ni tah.
Hun hawngna Program hi zan dar 6:30 a inthawka tan a ni a, Upa Ramhlunsang Fin. Secy. CKTP in inkhawm keihruoiin Rev. Lalhmingthang, Secretary Evangelism ICI in Inauguration le Dedication hun a hmang a, CKTP Theme Song "Lal Iengkim Thawthei" ti hla mipui fekhawm hai chun khuntakin sakna an nei a, Jiribam Presbytery Choir ainthawk "Lalpa ngaisak" ti hla ngaithlak a ni a. Rev. Lalsuokhup P/S Cachar Presbytery in Thalai In a hung intan dan le bawl a ni dan report a pek a, Cachar Presbetery Golden Jubilee Choir haiin "Ropuina kan pek che" ti hla an sak bawk a, Semikah Vocalist Nk. Gloria Lalmalsawm Khawlhring ainthawk "Aw Thalai" ti hla ngaithlak a nih.
Thalai In hung kana thawlawm thlak nuom hai ta dingin thawlawm bawm 'Samari mi tha thilpek' ti bawm inhlanna nei a ni a, Rev. Zothanghrim Zote le Rev HP Runremthang haiin 'Samari mi tha thilpek' bawm puon inkhum hawkna an neiin Rev. Lalrohlu in tawngtaina'n an hlan.
Thalai In bawlna le inzawma inpekzohai chawimawina puonbat inbattir an ni a, Thalai In bawl a ni tana Mistiri sin thaw dinga inpe hmasatak Pu Zaro, Kolasib haiin an bat hmasataka, a hnunga mi iemanizat inbattir an nu a, Pillar of Thalai In Certificate mi 10 vel kuoma inhlanna nei a ni bawk. Thalai In enkawltu ding 'Caretaker' hai hlaw ding intiemna hun hawng ani a, Mi 20 velin an intiem nia hriet a nih.
Nk. Quinlyn Lalrovel, Rev. Thangngur Awardee 2015 in "Lord Your Holy" ti hla sakna a nei bawk. ICI Central Choir hai khawmin hla pahni sak a, Hun insersuon chi dang dang hmang a ni hnungin Rev. Ramropui in Benediction hrilin hun kharna a nei a. Inkhawm tinin tuolsung KTP haiin light refreshment an buotsai pek. Hi Thalai In a hin Gospel Camp tan nghal a niin Pasal 43 le Nuhmei 24 an lut a nih. (Input: THT)
COMMENTS