Kristien nun a hin indona chi dang dang a tam hle. Amiruokchu, a chunga ei hrillang khin indona chu Lalpa ta a nih. Lalpa ta a nih tia inthung muong el ding lem chu ei ni nawh.
Harsatna chu ei fethleng ding chu a tam a nih. Israel hai Kanan ram an lut hma, Joshua in a thuoi tan laia inthawk khan hi ngirhmun hi chiengtakin hriet thei a nih.
1. Ahmasatakin ei ni tienga thang tu am a nih ei chieng angai. Ei ni tienga thang chu Pathien a ni chun hnena chu ei ta a nih.
Jeriko an thaw ding tawma Joshua hmaa hung inlang khan “Jeriko le a lal le mi hrat huoisen hai hi i kutah ka pek tah” a ti a nih.
“Pek tah” a ni leiin hne sa a ni el. Ei ni khawm a ei Kristien hringnun kalchawinaa hei hne thei naw anga inlang a lo um khawm a ei ni tienga thang Lalpa a ni phawt chun ei hne sa a ni el.
Isu’n keiin khawvel ka hne tah a ti kha. Chun, ei ringna chu khawvel hne a ngamna chu a ni bawk a nih.
2. Pathien lampui hai chu mihriem lampui ang an nawh; amiruokchu, lampui indiktak a lo ni hlak a nih.
Jeriko kul thaw dan dinga Pathienin a hril kha tuta ei thuoituhaiin Pathien a inthawka an dawng, an mi hril sawng nisien, ei ni rawi hin iem hril veng ei ta? Nuizat chu um ei tih.
Thuawi nekin thuawi naw chu tam lem ei ta, a thuawi naw po chu khawlai kohran amani ah lo insawn dai an ta, sawiselna nasatak um bawk a ta, ei ri chu sie hleng a tih.
Amiruokchu, Pathien ti chu Pathien ti a nih. A hun takah Pathien a hung thanga Jeriko kul chu a chim rum rum el a ni kha.
Tulai Kristien nun a pawi ve taka inlang chu ei ngaidan le ei mihriem ninaa Pathien thu hrietthiem tum ei tam hle hi ni mei a tih.
Ringna thu a dam, annawleh, Bible a chanchin ei hmu hai dam hi ei mihriem lungril mawl tak hin hrietthiem ei tum hram hram a, ei hrietthiem theinaw chun ei ringhla nawk a. Chuong ding chu a ni nawh a, Pathien lungril le a thuruk chu ei ni mihriem lungril hin a hrietsuok zo ding a ni naw a nih.
3. Pathien rawl hriet dan thatak chu to tawk tawk a um a nih. Joshua’n a rawi hai kuomah, “Khek der naw unla, inrawl khawm hriet ni naw raw se, khek dinga thu ka pek ni cheu a tlung hmakhat chu in baua inthawkin thu hrim hrim suok bawk naw sien, chu pha ruok chun chu khek ro” a tih.
Hi hma chara ei ni um dan ding ei hril le khan an mil nawk ta naw hle. Amiruokchu, to tawk tawk a um chun Pathien rawl hriet a lo awlsam a nih.
Exodus14:14 a khawm “...inum tawk tawk ding” a ti dam, Sam ziek (46:10-11) a dam ei hmu thei. Hang ngaituo ta, ei ihril, Israelhai hi mi nuoi tel an nih.
4. Ei thaw hram hram chun hnena chu ei chang ding a nih. “Lungawi taka ama zui chu a tha tak a nih” ti ang khan thuawi taka Jeriko kul khawm mak danglam taka thaw dan ding an hmuzo hnunga an hang thaw hram hram chun a khatin Jeriko chu a hung chima, Israelhai chun hi kul ropui hi an lak der el chu a ni kha.
An inhel tan lai chun ei hriet ta nawh, kul sunga umhai chun an lo nuisan el dim. A nihni ni in amani a tangkaina ka hriet nawh dam ti inla leh kul chu chim a ti? Chim teu naw nih. A tawp chena thang hram hram a ngai a nih. (Thalai Weekly)
COMMENTS