I HRINGNUN KHAL TAWPSAN NAW RAWH; I HUN A LA TLUNG VE DING

Inlettu: Editor, Fox Journal

Ei tulai khawvel inthang hrat taka hin, mitin ei inhmaw seng. Ei fe tumna tlung vat nuom leia inhmaw, hlawtling vat vat nuom, thil thaw zo vat vat nuom na. Chuong a ei beisei anga thil a tlung naw phat ei thlep tla zawtin, ei duthusam ang thil ei hmu naw changin ei kun hlak. Intlansiekna a ni a, maksan bik ni ei inlau hle. Hlawtlingna kum hai chu a hung tlahnuoi tah a, kum 15 mi chau chun code ziekin website zawrin a sumdawng thei tah. Kum 25 an hung kai ta chun an isiem company ngei an nei tah. Annawleh, rimawi tumtu hlawtling tak el, khawvel fangsuok tah dam. Mi haiin hun tawite sung chauin thil tam tak an thaw a nih. Mi thenkhat chauin.

Chuong ang thil lei chun titna ei nei hlak a, ei zam hlak. Kum 25 I niin sin zawnga I la tlankuol zing leiin, hlutna I neiin in hriet nawh. I then le ruol hai po po chun nuhmei pasal an nei a, New Zealand a an honeymoon hmangna amanih, hmun dang inhawi tak tak el kum 2 sung khawma I sir dinga I beisei phak nawna hmuna an thlalak hai an kapkai I hmu a. Hun chu a tawi takzet tah, khawvelin an tlanpêl ta che a, nang ruok chu I khuma inthawka tho ding buoi ringawtin I la buoi zing maw!

Hadam rawh. Thuok inthuk takin la rawh. Mi dang le nang in tekhi naw rawh. Khawvel hi mi chitin kimna ram a nih - kum tlawmte a hlawtling awl le nakie deua hlawtling mi. Kum 25 a innei a kum 30 a inthe an um a, kum 40 a an hmangai hai le intawng chaua inthe ta lo khawm an um. Henry Ford chun a revolutionary Model T Car a siem chun kum 45 a ni tah. Whatsapp message simple tak el an forward hin thu tam tak a hril,"I danglam, mi dang le in tekhi naw rawh" ti hi.

Mi thenkhat chu kum 22 in an graduate a, anachu sin an hmuna dingin kum 5 dang dam an la nghak. Mi dang pakhat kum 27 mi a graduate a um nawk a, ama chun sin thatak a hmu nawk nghal si. A then chu kum 25 a CEO niin kum 50 in an thi a, a then kum 50 a CEO hung ni phak chauin kum 90 chen dam an um nawk. Mitin hin an (Time Zone) hun tlung ang peiin sin an thaw. Mitin an teirei peina angin hlawtlingna an hmu.

I hun tlung ang angin um rawh. I thawk chanpui hai, I ruolhai, I neka naupang hai dam I hma ah hrat takin an fe el thei, a then chu I hnunga um dam ning an tih. Hi khawvela mihriem hai po po hin an intlansiekna seng, an lampui le an hun senga thaw an nih. Pathienin mitin ta dingin plan a nei. Hun hi a danglamna (Tlung hun in ang nawna) a nih.

American President Obama chu kum 55 in a chawl a, Donald Trump in kum 70 in President a chel tan ve. Thik amani dem naw ro, an hun a tlung a ni ve el! Nangkhawm I huna um I nih.

Hlawtling vat na hi hringnun hlimna a ni kher nawh. Kum 25 I niin Company I hawng thei a, kum 30 I niin I company tlusiein kut benthekin I um thei bawk. Hlawtlingna kum 40 ah I chang thei, chu huna chun I hlawtlingna enkawl dingin I lungril a puitling huntawk lem el thei. Thil tlung hai hrim hrim hi, a san thatak uma tlung an nih.

Kha sin I chân kha I ta dinga thalo a ni el thei. I thiemna kha kha sin neka ropui lem, nakie le I la hmang ding a ni lem el thei. A hun indik tak bik a um nawh. Ei ni tieng ei inrel a ei inpefel hunah thiltha ei dawng hlak. I ta dingin a la tlung naw a ni chun, tuta huna la tlung ding an nawh tina a nih. Mi dang va thik le van hnar kha a pawimaw le tul tak a ni nawh.

Nanga thilthawtheina um kha mawikhai takin tuoinam rawh, thiemna thar, tawng thar, hun la hung um dinga mihriem I ni nuom angin insiem rawh. I hlawtlingna le inmil ding mihriem mizie nanga khan siem tum rawh. I hrat naw khawma I thei ang angin I thiltum chu panin thaw pei rawh. Mitinin hunbi an nei seng. Kum upat hnung le hi neka lungril ngaituona puitling I nei hnunga thil ropui tak thawsuoktu ding khawm I ni el thei. Amiruokchu, nang le nang I lo inngaisie a, I lungril sawlna hai chu Zu a sukbo I lo tum khawm a ni thei. Insirna ding kha ngaituo rawh!

Vangneina hi a tawp naw reng reng a. Vawisun hi I hun annaw chun zing khawm khi a ni thei. I beisei ang a la tlung naw lei elin I hringnun mawi tak I khal kha tawpsan naw rawh. I hun a la tlung ve ding a nih. (Hi article hi saptawnga mi a ni a, tha ei ti em leiin Editor in an let a nih.)