 |
| Representational image of an Ambassador Car with a Red Beacon. |
Fox Journal | CCPur: Thla nawk May 1, 2017 a inthawk khin India ram phek sungah President, Prime Minister, Chief Justice of India le mi pawimaw dang dang hai khawma Red Beacon (VIP Light) hmang phal a ni ta naw ding a nih. Tukhawm phal bik le phal naw bik um naw nih, angkhat vawng ding tiin Finance Minister Arun Jaitley chun vawisun khan Cabinet Meeting zoin a hril a. Emergency service hieng fire brigade, ambulance le Police Van hai chun Blue Beacon chu an la hmang thei ding thu a hril a. Blue Light, VIP hai hmathuoitu hai ihmang hlak khawm chu emergency thil ah phal a la ni ding tiin Jaitley chun a hrilsa.
Hi Red Beacon (VIP) Culture hin traffic dan le dun le mipui tam tak sukbuoi hlaktu hi PM in sukbo tuma ngaimaw taka Meeting naa a lo hril ta hlak hrim a nih.
Tulai hnai el khan PM Modi le a convoy hai chu Bangladesh PM Sheikh Hasina, Delhi Airport a an lo va hmuok dinga an fe tumin traffic pangngai zuiin normal takin mi dang hai angin lam intluonin an fe ve a nih.
A tlangpuiin mi pawimaw haiin lam an hrawna ding hmuna hai hin Police hai chun barricade le road block hai siemin, mipui hai ning intel le nghawkum takin an innghak tir hlak a. Tuta thla bul khan naupang hliem phurtu Ambulance, mi pawimaw convoy an hung leia Police haiin an dang chat chu online ah an dar nasa hle a nih.
Kum 2013 khan court chun beacon hmang chu a khuokhir met a, dan tieng mi hai chauin an hmang ding tiin order a lo siem tah. PM Modi in Red Beacon chungthu hi ngaituo dingin kar liemta khawm khan meeting a lo ko ta bawk.
Hi le inzawmin CM pahni, Devendra Fadnavis, Maharashtra CM le Amarinder Singh, Punjab CM hai chun Red Beacon an lo hnâwl der tah.
COMMENTS