Jiri-Vangai hotuhaiin bieltu MLA kuoma harsatna intlun

Ashabuddin, Jiribam MLA le Jiri Hmar hotuhai

Fox Journal | CCPur: Vawisun tarik 27 April, 2017 zing dar 10:05 khan Jiri-Vangai biel a Hmar hnam thuoitu dang dang haiin an bieltu MLA tling thar an inhmupui.

Hnam thuoitu hieng Pu L. Enga, H.I. Executive Member GHQ, Pu V. Lalbel, President, HYA Jiri JHQ, Pu Laltlanlien, Advisor, HSA Jiri-Vangai JHQ le Pu Laltlanthang, President HSA Jiri-Vangai JHQ hai chun 11th Manipur State Legislative Assembly a Jiribam a inthawka MLA tling thar Pu Ashabuddin, MLA chu Jiribam Guest House ah inhmupuina hun an hmang.

Hi huna hin biel mipui hai harsatna lamliem (Road) major repairing Jiribam - Khawzawl (Choudhurikhal) chen a thaw dinga um mek le inzawmin Khangbor chen huomsa nisien tiin ngenna an siem.

An ngenna angin Pu Ashabuddin hin ngaituo lo thei lova ngaiin thaw ngei dingin hnam thuoitu hai kuomah thu a lo intiem.

Hiengang MLA biek inhawitak le ei harsatna hai intlun theina Pu Ashabuddin kuoma hin hotuhaiin lawm thu an hril nghal niin report ei dawngna chun a hril.