 |
| Rev. Kh Dailo |
Ziektu - Rev. - Kh. Thang Dailo
Thuhma:
Pathienni ṭumkhat chu Pune Hmar Christian Fellowship inkhawmna Biekinah Kohran pawl hotu pakhat thuril dingin ruot a nih a. Kohran chanchin le rongbawlna a hrilnaah, “Nangni chu Kohran in ni chuong nawh a” ti tongbau a hmang chu a mak ka ti hle el a. Chutaka inthok chun Kohran umzie le Kohran hi iengam a nih ti hi ka lo sui nasa khop el a. Bible ziekna ṭawngbul tieng, Bible scholarhai ziek le Kohran chanchin hai ah iengtin am ziek a nih, tihai khom chu ka enin ka suia. A hnuoia ang hin Kohran umzie ka hriet dan le hmudan ka hung ziek ve a nih.
Bible Scholar hmingthang takel J.H.Newman chun,“Kristien umkhawm pawl, tienlai huna inthoka tulai hun chena mi” chu kohran niin a hrila. (J.H.Newman: The whole body of Christians gathered together from all ages). Hi a thil ziek hi indik hlein ka hriet a. Chuleichun Isu Krista ringtu mihriem pawl chi tum tum umkhawm le ringtu mimal khom Kohran ti hin a huopsa ti hi ei innghatna dinga ka dit chu a nih.
Kohran Umzie:
‘Kohran’ (Church) thumal umzie le hung suok dân sui met ei tih. Tienlai(Old) English chun ‘cirice’ ti a niha. Middle English a ‘chirche’ ti chu tuhin ‘church’ tia ziek a hung ni a. Chu thumal chu Greek ṭongin ‘kyriakon / kyriakos’ ti a nih a. Hi thumal umzie tak chu Lalpa In (kuriakon – the Lord’s house) tina a nih a. Tienlai deua ziektu hmasahai chun hi thumal hi Biek-bûk (place of worship) angin an hmanga. Amiruokchu Thuthlungthar huna ṭonginlettuhai chun Greek ṭong bok ‘ecclesia’ ( Hebrai ṭonga kahal) hi kohran tina ah an hmanga. Chu umzie chu ‘mi umkhawm’ tina a hung nih.
Biblea Kohran:
Biblea hin Kohran chi hni- (1) Hmuthei lo le (2) Hmuthei hrilin a um.
(1). Hmu theilo kohran (Universal Church): Ringtu thitah, la dam le la hung piengding hai popo Isu Krista lu nîna le inzoma, a rorelna hnuoia um hai popo chu kohran an nih.
“Pasal chu nuhmei lu a na, Krista chu kohran lu a ni angin, ama ngei chu taksa sandamtu a ni si a.………Chuongchun kohran chu fainawna kai lo le, zûr lo le, chuongang thil hrim put lova, thienghlim le hmelhem lova um lemin ama kuomah kohran ropui takah inpe fawm thei a tih”(Ephesi 5:24-27).
Krista ringtu mimal tin chu Isu leh inzawmna a nei a, Krista chu a lu a nih. Bible a bok hin Isu Krista chu a ringtuhai leh moneitu le mo anga hril a nih a (Mat 25:6: Thuppuon 19:9).
Hnuoia hin Pathienin kohran pakhat chau a nei. A kârchâng kohran pahni - Thuthlunghlui le Thuthlungthar kohran um angin ei hril hlak. Amiruokchu pakhat char an nih. Hi kohran pahnih nia ei hril hai hi Isu Krista a chun zom(graft) an nih. Thuthlunghui kohranhai(Israel) khom olive kungpui (Isu) leh la zom an ni ding zie ei hmu. Rome 11:19-24 “Chun nangin, ‘Zoma ka um theina dingin a zârhai chu suktlienin a um annawm’ tîng i ti maw?.........Nang olive suoka inthoka sât thlâk hman, pieng dân naw anga olive thing ṭhaa zoma i um chun, chuong a zar tak takhai chu a bulpui, olive thing pangngaia chun zom an ni lem naw dim a ni?” (Isa. 49:13-23; 60:1-15 khom en roh).
Thuthlungthara Gentêl kohranhai khom olive kûng indik takah Krista leiin zom an ni thu ei hmu - (Ephesi 2:12-19) “Khânglai khan Krista bovin, Israel khuo le tui leh intuolkhat lovin…………mi thienghlimhai le chun tuolkhat le Pathien sunghai in ni ta lem a nih.
Chuleichun, hmu theilo kohran(universal church) indik tak chu pakhat cho a nih a. Chu kohran chu Isu Krista, Olive kungpui le Grape kungpui (Johan 15:1) a phun le inzom chu a nih. Chuleichun Kohran hmu theilo chu Isu Krista taksa chu a nih. “…….Saula, Saula, nangin iengdinga i mi suknawmna am a na; tiin rawl a hriet a. Chun, ama chun, Tû am i na, Lalpaa ta. Lalpa chun, Isu i suknawmnat hi ka nih;”(Thilthawhai 9:4-5). Kohran suknomnat chu Isu suknomnat a nih. Ringtu mihriem, Isu Krista le inzomhai chu Kohran ei tihai chu an ni lem.
Hi kohrana hin ei ṭhang ve am? Hi zawna hi ei sukfel dinga poimaw chu a nih.
(2). Hmu thei kohran (corporate body of Christ/Christians): Acts 2:47(New King James Version): “Pathien an inpâk a, mi po po lâwmzâwngin an um hlak. Chun, sandama hung um pei taphawthai chu, Lalpain ni tin kohran kuomah ân ṭhangsatir pei hlak” Thuthlungthara kohran inṭan dân le ‘kohran’ thumal ziek langna hmasa takna chu hi hi niin an lang.
(a)-“Juda mi fir ka ni laia ka um dan kha in hriet, khânga râwng taka Pathien kohran suknomnaa răwt chimit ka tum hlakzie hai khah”(Gal 1:13)
(b)-“Pathien kohran, a thisena ama ta dinga a’n chawk chu chawm dingin, nangni le in beramhai ta dingin fimkhur ro; Thlarau Thienghlimin an chunga hotu dingin a sie cheu a ni hi”(Act 20:28).
Isu ringtu mihriem umkhawm (corporate body of Christ/Christians) hai chu kohran tia hriet an niha. Chuongchun Korinth kohran, Ephesi kohran, Galati kohran le a dang danghai chu hmu theiin an hung ngirta a. Tuhin Kohran Denomination (Pawl) ei ti hai eg. Catholic, Baptist, Presbyterian, Lutheran, Methodist, Evangelical Free Church of India, Independent Church of India etc. ringtuhai umkhawmna hai hi kohran tia ei hriet langsâr chu an nih. Krista ringtuhai umkhawmna pawl le hming an ni leiin mawi takin kohran tiin ei hrietin, ei ko a nih.
Christian Fellowship Umzie: Fellowship ti hi ei ngaidân tlangpui chun ‘insukhlim malama umkhaw/inkhawm’ ti a ni deu taka. Amiruokchu Biblea a hmang dânhai ei bichieng chun chuong ang el chu a lo ni noh.
‘Fellowship’ hi English ṭong a nih a. English ṭonga ‘fellowship’ ti chu Greek ṭongin ‘koinonia’ ti a nih a. Thuthungthar a hin voi 19 lai ‘koinonia’ thumal hi hmang a nih a. Chun, hi thumal hi thawlawm ve, ṭhang ve, inṭawmpui tia hmangna khom a um. Umkhawm cho ni lovin thaw tlâng tina khawm a kawksa a nih. Biblea a hin Kristaa ei um le Krista taksa bung ei ni zie le Krista chu ei inkoppui (partner) a ni zie suklangna a nih. Chun, ‘koinonia’ hi Pathien le inkâr cho ni lovin ei mihriem chanpui danghai le inkâr hrilna le ringtuhai chu ei in-ringtuo/in- sortuo seng ti hrilna a ni bok.
Thil danglam tak pakhat chu Biblea hin ‘fellowship/koinonia’ hi Pathien le Ringtu inkarthu hrilna dingin Penticost Ni tlung hma khan chu hmng a ni der noh. Penticost-ni zo tieng, Thlarau Thienghlim huna ruok chu ‘fellowship/koinonia’ hmangna tam tak a um. Chuleichun Thuthungthar kohran thu hrilna dinga hin a lo poimaw hle ni ding a nih.
Bible châng ‘koinonia / fellowship’ hmangna entirna ding - “Lalpa Isu Krista lunginsietna dâm, Pathien hmangaina dâm, Thlarau Inthieng pâwlna (koinonia) dâm chu in rênga kuomah um raw se” (2 kor 13:14).
“Chuongchun, Kristaah lungmuongna hrim hrim dâm, hmangai thlamuongna hrim hrim dâm, Thlarau pâwlna(koinonia) hrim hrim dâm, lainatna le lunginsietna hrim hrim dâm a um chun lungril hmunkhata umin, hmangaina hmunkhat neiin, inthuruola lungril hmunkhata umin, ka lâwmna sukfamkim ro” (Philippians 2:1-2).
“Pathien a Naupa ei Lalpa Isu Krista pâwlnaa (koinonia-a) ko lûttu cheu kha ring a um a nih” (1 Kor:1:9).
Christian Fellowship Kohran a nih:
A chunga kohran pahni (hmuthei le hmu theilo) ei hrilna a khin Christian Fellowship chu a ṭhang ngeiin ei hriet a. Hmu theilo kohran le Isu Krista ringtuhai fekhawmna (corporate body of Christ/Christian) an nih a. Denomination kohran pawl dang anga Baptist, Presbyterian, Methodist, Lutheran, Evangelical Free Church etc. etc. hming an put naw leia kohran a ni naw ti thei ding a ni nawh.
Thuthlungthar huna kohran hmasa ei hmuhai - Korinth kohran, Ephesi kohran, Galati kohran etc, etc. hai kha tuolsung(local) kohran an ni a. Tulaia Denomination kohran hai anga inopdân(constitution) le thuring (doctrine) pakhat hnuoia inzomkhawm an ni noh a. An doctrine inzomkhawmna chu Isu Krista chanchinṭha kha a ni topin an lang a. Entirna dingin - Hmar Christian Fellowship (HCF) hai khom hi constitution le doctrine pakhat hnuoia, Assembly neia inzomkhawm an ni noh a. India khawpui hmun hrang hrangah mani kea ngirin Biekina hai an inkhawm hlak. HCF memberhai chu –Presbyterian kohran, Penticostal kohran, Baptist kohran, Evangelical Free Church of India, Independent Church of India le a dang danghaia inthoka Kristien fekhawm an nih.
Vairam khopuia hai student, sorkar le company haia sinthaw le sungkuoa lo khawsahai Pathienthua lo ṭhuoi le keikhawm hi a poimaw em em el. Kohran Pawl bîk(denomination) hminga inkhawm rot nisienla inthuruol a harsain, a nuomnaw an tam ding a ni leiin thil harsa a nih. A Kohran Pawl bîk um lova inthuruol taka inkhawm hi mihai, a bîkin ṭhalaihaiin an nuomin inhoi an ti em em a. Pathienthu le hlâ haia keiṭhuoi le enkol theina ding lampui ṭha em em chu Hmar Christian Fellowship hi a nih. Chuleichun Christian Fellowship hi Thuthlungthar kohran hmasahai kha an ang lem hielin an lang. “Christian Fellowship hi kohran a ni noh” titu chun kohran umzie a hriet naw an naw khoma, a kohran hriet dân (concept of church) a chieng naw ni mei a tih.
‘Church’ tia ko le ko naw kha a poimaw tak a ni nawh. Tulai hnaia thil umdan khom ei hriet ve a poimaw khop el. Mi tam tak chun denomination kohran khuokhirna hnuoia tienlaia
thawdân pangngaia (liturgics) deua um hi an nghok ni ding a nih. USA, Europe le hmun dang danga hai khom denomination hrang hranga inthoka kohran mi le sa fekhawmin Community Church/Felowship tiin Biekin an indin a. Chuong ang biekin chu a pungin an ṭhang hrât hle el. Keini Wheaton, USA a kan zuk um ve laia Biekin inlâr le member pungna tak chu Willow Creek Community Church a nih. An inṭhuoidân le thil thawdânhai chu vairam khopuia Christian Fellowship umhai ang hi a nih. Hi Community Fellowship hi kohran ang chara ngaiin, inhoi ti em emin mi a sîng tel Pathienni zâtin an inkhawm hlak.
Christian Fellowship le Kohran Pawl (denomination) inkar thu: Kohran Pawl le Christain Fellowship hai hi Pathien ringtu umkhawmna an ni ve ve thu chieng takin ei hril tah a. Kohran hmu theilohai umna ve ve an nih boka. Chuleichun inhrethiem le inthuruol taka, pumkhata an fe hi a poimaw khop el. Lalpa Isu ṭongṭaina: John 17:11 “Chun, kei chu khawvêlah um ta naw ning, hienghai hi chu khawvêlah um an tih, kei chu i kuomah ka hung ding a ni tah. Pa Inthieng, nangin kei i mi pêkhai hi i hmingin hum rawh, eini ang bawka pumkhat an ni theina dingin”. Ringtu kohranhai hi pumkhata ei um hi a va poimaw de.
Chuleichun, Christian Fellowship khoma Kohran Pawlhai hi nuorsan le hmuse lova Nu le Pa, ei piengna anga ngâia inzâ taka ei en hi thil poimaw a nih a. Chun, Kohran Pawl khoma an nau le tehai vairam khawpuia Pathienthu le hlaa lo keiṭhuoitu Fellowship kohran a lo um hi lawm taka a thei ang anga ṭhangpui ding an nih. Chuonga ei um chun Lapa Isu Krisata ṭongṭaina kha ei sukpuitling a ni bok ding a nih.
Thukhârna:
Tulai khawvel kohran fedân ei enin, tienlai deua Kohran Pawl (Denomination) leia indonahai kha theinghila, inthuruolna le inzawmkhawmna ṭha tak nei nuomna a nasa ta khop el. Khawvel kohran popo insuikhawm (ecumenical movement) hi a tir chun Evangelical inti pawlin an dit nawha. An ditnawna san tak chu khawvela sakhuo dang dang, Islam, Hinduism, Buddhism etc. hai khom inhuopsa tir an ni leiin. Chun, Chanchinṭha thedar nêka social rongbawlna uor a hung ni bok leiin. Amiruokchu tulai hin Evangelical inti pawl le Liberal Christian an tihai khom inhnaina tak a hung um mêka. World Coucil of Churches le National Council of Churches hai khoma Johan 17:11,21 thupui hi fepuiin Kristien kohranhai laia inpumkhatna hi a hung ngaipoimaw ta hle el. Eini lai khom Kohran tam takin North East India Christian Council (NEICC) zomin, National Council of Churches in India (NCCI) le World Coucil of Churches (WCC) leh inthlungmat peiin an um tah.
Thuziek (document)poimaw tak el: Evangelicals and Catholics Together: The Christian Mission in the Third Millennium, published in 1994 ti hi tulai hnai el khan Evengelical kohran le Catholic kohran thuoitu tam takin pomin an bawzui a. Chu document-a paragraph pakhat chau tarlang ei tih: As Christ is one, so the Christian mission is one. That one mission can be and should be advanced in diverse ways. Legitimate diversity, however, should not be confused with existing divisions between Christians that obscure the one Christ and hinder the one mission. There is a necessary connection between the visible unity of Christians and the mission of the one Christ. We together pray for the fulfillment of the prayer of Our Lord: “May they all be one; as you, Father, are in me, and I in you, so also may they be in us, that the world may believe that you sent me.” (John 17) We together, Evangelicals and Catholics, confess our sins against the unity that Christ intends for all his disciples”.
Kohran denomination inhnik/invetchil leiin khawvel ah Kristienhai cho ni lovin ram le hnamin harsatna a tuok hlak. Kum 1618-1648 laia 30 Years War ti-a European history a hiel ei lo tiem khom kha mani Pawl (denomination) ṭanna le ngaisângna leia hung suok a ni kha. Tu lai hnaia Ireland rama politics tienga buoina namên lo um zing khom hi denomination ei ti leia hung suok a nih. Kohran bingin mani denomination an ṭan tlat leia rambung le khawmuolpui (continent) dang danga buoina suok hi hril ding a tam. Eini, denomination inti ve khom inzakum hiela tlawm le kohran naupang khom ni inla, ICI le EFCI buoina, NEIG le Independent Kohran buoina ditumlo tak ei lo tuok ve a ni kha.
“Chun, kei chu khawvêlah um ta naw ning, hienghai hi chu khawvêlah um an tih, kei chu i kuomah ka hung ding a ni tah. Pa Inthieng, anni chu i hmingin hum rawh, pumkhat an ni theina dingin, eini pumkhat ei ni ang bawkin” (John 17:11) ti hi tulai kohran lai hin hung tlung ngei sien nuom a va um de.
February 25, 2017
Hriet ve mei mei dinga ṭha: Sakhuona leia indona le mithi zât:
(1)- The Thirty Years' War kha sakuona leia indona Central Europe laia kum 1618 and 1648 suok a nih. Indona sawt tak le mithi tamna tak a la nih. Protestant vs. Catholic. Mithi-8,000,000.
(2)- French war of religion 1562-1598. Protestants vs.Catholics. Mithi zat- 2,000,000.
(3)- Second Sudanese Civil War 1983-2005. Muslim vs. Christian. Mithi zat-1,000,000.
Kohran Pawl hung inṭan hun:
(1)The Original Christian Church 30 A.D.
(2)Coptic Christians (Egyptian Oriental Orthodox) 451 A.D.
(3)Eastern Orthodox Church - 1054 A.D.
(4)Roman Catholic Church - 1054 A.D.
(5)Waldensian Church - 1170 A.D.
(6)Unity of The Brethren Moravian Church 1457 A.D.
(7)Lutheran Church – 1517.
(8)Reformed Church – 1522.
(9)Anabaptists - Hutterites, Amish, and Mennonites - 1525 A.D.
(10)Church of England or Anglican Church – 1534.
(11)Church of Scotland – 1560.
(12)Baptist Church - 1609 A.D.
(13)Quakers - 1647 A.D.
(14)Brethren - 1709 A.D.
(15)Methodist Church 1738 A.D.
(16)Episcopalean Church – 1776.
(17)Presbyterian Church -17 th cent.
(18)Church of Christ -1793.
(19)United Church of Christ -1957.
(20)International Church of Christ – 1967.
(21)Holiness Churches – 1867.
(22)Seventh Day Adventists – 1831.
(23)Salvation Army – 1865.
(24)Christian and Missionary Alliance (CMA) – 1887.
(25)Church of the Nazarene – 1895.
26)Church of God -1881.
(27)Assemblies of God -1914.
(28)Foursquare Church - -1927.
(29). Evangelical Free Church (EV Free) -1950.
(30)Calvary Chapel Churches -1965.
(31)Willow Creek (Seeker Sensitive) Movement -1975.
(32)Vineyard Churches -1974
Para-Church Organizations :
(1)YWAM (Youth With A Mission) -1960.
(2)Campus Crusade for Christ (CCC) – 1951
(3)World Vision -1950
(4)Evangelical Fellowship of India(EFI)-1951
A chunga tarlang lo Kohran Pawl le Para-Church tam tak khawvela hin an la um.
COMMENTS