Kohran le khawtlang hin ei nauhai hi lekha thiem hai sienla ti chu ei nuomtak le ei ditthlangna tak chu a nih. Anleh, lekha hre thei ve lo, inchukna ding pawisa sum nei lo hai hi teh?
Ei khawvel in hmang dan le inthuoidanhai hi ei hang thlirin a lekhathiem theihai hi iengkimah ditsak anni a, lekha tieng hre ve rak lo music thiem, electric siemthiem ti le thil dang danghai hi teh, a thiemve tho an ni a iengleia ditsak an hlaw naw bik am? Ei talent in ang vawng sienla ei pawimaw dang hai hi tunam en kai tang a ta? Lekha a lo hriet naw chun mi tling lo anga ngai an nina tak hi ei thawsuol niin an lang. Ei khawtlang ei kohran hin hieng talent dang dang nei mi fel tak takel hai hi ei theinghil zing ta a, an changkangna ding iengkhawm ei ngaituopui ta naw bawk. Hi lei tak hin a nih Hmar nauhai khawm hin hlasakthiem, guitar per thiem le thil dang dang ei nei mumal nawna san takchu. Mi talent develop pui ti hi thaw nachang ei hrietnaw lei ni loin ei lungril that naw leia mumal boa um zing ei nih. Ei hmakhuo seng ei ngaituoa, ei ta dinga hlawkna um lo chu ei ngaituo pei ta nawh, ei in suksawl pei ta nawh. Ei nunghak tlangval talent tha tak tak nei hai hi an talent develop dan ding ngaituo pek ta inla chu ei khawltlang ei hnam a telpuiin a hung parsuok ding a nih.
Chuongang bawk chun kohranhai khawm hin beram umsa hi ei enkawl a, beramhai an nuomna tieng tieng an tlan kuol khawmin dawnsak chuong lo. Beramchu a khata a tlan kuol a tlan kuol chun a tawpa chu sakei in a lo bengthawi hlak a ni kha. Ei beramhai sakeiin a beng zing ta khawma um na pang ngaia la um zing. Sakei in fapei a ta a tawpa chu ei ni khawm phieng tamin la thi ve ngei ei tih. Ei hang hril tahai a chun iengtinam thaw chuong ei ta ti chu lungril ah a hung pieng ngei ring a um. Kohran upa, Pastor ni chun ei mipuihai ei kan hlak am? A lien deu le khawsa thei deu hai inah chu ei luot ngun tawl, a khawsa theilo hai inah ruok chu a luot suok an um ngai nawh. Inruithei thaw hai laka insi hmang tlat tum ni awm takin thang an lak ve tlat. Chanchintha ti hi ei fe pel a, mi fe pel ti hi thupuia hmangin rawng ei bawl tak lei hin ei rawngbawlna hrim hrim hmu ding um ta lo. Isu Krista’n “Hieng ang mihai hi ka kawlah in hung thuoi ding a nih" a ti ang khan chu ei ni ve hmel naw khawpel.
Khawtlang le kohran hin iengam a na ei tlansan ti hi in dap ei tiu khai. Ei nauhai hi lekha thiem vawng hai sienla ti chu ei nuomtak a nih. Anachu thiem thei vawng ding an ni nawh. Pathienin talent dang seng a mi pek a nih. Chuong talent tha tak tak hai develop pek dingin nang le kei hi nu le pa a siem ei nih. Nau malsawmna ei nei hai hi an talent zawng dawkpui hi ei thaw ding makmaw tak el a nih. Kohran khawm hin ramthin ti leia hmun hla tak tak va suok dawk a ngai nawh. Ei khawtlang hi en hmasang ei tiu, ei insung en hmasang ei tiu.
Ei insung, ei khawtlang hmasa loa hmun dang ngawt ei ngaituo hi andik am a nih. Ei mit a ei hmu hai hman in vawi lo a ramthim ei hmu phak lo kan vawi ei ti chun ei thawsuol ngei ding a nih. Mit a ei hmu phakhai hi siemtha phawt ei tiu, indin thar phawt ei tiu khai. (Hi article hi Thalai Weekly a insuo a ni a, TW Editor hai hrietpuinain Fox Journal in tha a ti leiin an suo sawng a nih.)
COMMENTS