Fox Journal | CCPur: Manipur a sawrkarna thar siemtu BJP chun thang nasatakin a lak pei a, tuta sawrkar fe lai mek hin Manipur state sunga sawrkar thawktuhai chu an nauhai sawrkar school ah an inkaitir naw chun an hlaw hai suktlawm a ni ta ding, Policy thar a suok vat ding thu N. Biren Singh, CM, Manipur chun a hril.
Hi thu hi liemtah Ningani a Pradhan Mantri Kaushal Vikas Yojana (PMKVY) training centre, Thangmeiband DM college road, Imphal a hawngna hunser hmang a ni tuma CM hin a hril a nih.
CM in a hril pei naa chun sawrkar school hai a hlutna siem le suksang a ni theina dingin hun sawtnawte hnungah hi policy hi hmang hung ni vat tang a ta. Private school a mani nauhai lekha inchuktir le private tuition inlaktir chu incheina (Fashion) ang a hmang a ni tah a. Hi thil fe mek hi state a inthawk sukbo ngei a tul ti'n a hril.
Sin nei lo Thalai tam tak an um a, chuong hai harsatna chu PMKVY hnuoiah sukkieng thei a nih. Sin nei lo Thalai hai hi training pek ning an ta, an thiemna izirin sin pek ni bawk an tih. Hi training hi information technology, handicrafts le skilled labours hai tlur bik a ni ding thu Biren chun a hril a. Kum 2017 le 2020 inkar sung hin sin nei lo 32,400 hai kuomah sin pek ning an ta. Nitin mamaw hai hi local product nasatak siemsuok a inthlak danglamna a um a tul. Manipur hitel a parda le puonpha hai khawm state kutsuok, local a mi hai hmang a ni pei ta ding thu a hril a. Indian PM Modi in Make in India a khekpui angin CM N. Biren hin Make in Manipur chu nasataka hmang dingin a hrillang ve a nih.
Marketing a that tawk naw leiin state kutsuok hai chu bazar a inchawk ding a um zing thei naw a. Hi harsatna khawm hi sukkieng a ni vat theina dingin hmalak ning a tih. March 25, 2017 a CM Office a Anti corruption cell indin haiin an sin an thaw tha a, thubuoi chawl lovin a hung lut zing. Sawrkar office haia thlang taka thilthaw a corruption suktlawm a ni theina dingin Mobile hai khawm Office a hai chawi phal a nih.
CCPur buoina chungthu a hrilna ah N. Biren chun state sawrkar chu JAC, CCPur hai thil ngen Lamka District suk puitling theina ding ngirhmuna sawrkar chu a ngir naw thu a hril a. Hi demand hi District Boundary Commission in report a submit huna hrillang thei chau ning a tih ti'n a hrilsa.
COMMENTS