~Jr Amo
Hun lo liemtah eini rawi thalai haiin ei hriet phak chinah a la hla bek bek ring a um naw a. Mizorama inthawka Kartin a sut suoka um Lelte Weekly News khan Mobile Phone hung inlar ang deuin thawkkhat kha a ming chîm thut a. LWN (Lelte Weekly News) latu tam tak el Manipur a khawm an um pha hrim a nih. An lara mipui ta dinga a thu thedar le mihriem a keisuok hai zar khawma inza a um hlie hlie.
Amiruokchu, Mizoram huopin Award a hung sem hlak a. Zohnathlak ramri khang ang reng siin unau bo nawna tawk, eini mi mawl hai hlimna tawka mani nina indiktak thuphmang meta hlim thei tawkin Award a siem thiem a.
Award puitlingin hieng LWN Music video of the Year, Singer of the Year, Best Music Video of the Year, Singer of the Year (Male), Music video of the Year(Band), Gospel singer of the Year (Female)- Lalduhsaki Gospel singer of the Year (Male), Music video of the Year (Gospel) le a dang tha tak tak siemin Mizoram a Lusei hlasakthiem le inlar hai kuomah a sem hlak, an unau dang hai chang chu thieng si lova inpumkhatna le Zohnathlaka inunau na chu khekpuiin hnam hnuoihnung lema a hriet hai chu Chibil Award tia zaihlemin vawisun chen hin semsuok thei zinga a la um hi inpak a um hle.
Award tha tak tak el a chunga mi hai khi tuta Chibil Award dawngtu hnam hai laia dawngve thei ding iemani zat eiin sersuok ve tah. Chuong sa khawm chun ei hnufuolna chu remchanga lain mani hnam bing chawisangna ding le mani unau hai hnuoisie na dinga Chibil Award an duong hin mihriem remhrietna inhnarum tak el a nei ti a suklang.
Chibil Award hlak chu ieng thil reng amanih ti dawn se se lova a hnam pum huopa lawmtuhai ei la ni nawk ta pei a. Vawisuna Lusei tawng hmangve naw hai kuoma Chibil Award chie dawng theia ei um hi ei lawm zing ding amanih? Chibil Award hi unau ei nina var taka ramri mi khang pek sia an hmingmawi sia siemtu pakhat a nih. A latuhai ka dem der nawh sienkhawm ei Award dawng hin lawm a phu chie am mingo sap haiin Negro midum hai an vun rawng hmanga an thlierhranna ang deu kha a lo ni lem ti hi ngaituo chieng a va tha awm de ka unau dittak hai. A hnam ang zawng khawma hi Award hin ensan a phu lem hman hman annawm a nih?
Chibil Award, Hmar-Thadou-Gangte-Paite le hnam dang a dawngve tuhai hin ei la dawng zawm pei nuom zing el hi a mak ka tih.
(Zieksuol an ti ang chi kha a um chun sorry)
COMMENTS