Fox Journal | CCPur: Vawisun dar 12:25 lai khan Chhattisgarh hmuna Sukma District sunga Burkapal le Chintagufa inkara ah Naxalites haiin CRPF ambush thawin 26 zet an that a, mi 6 an hliem niin chanchinthara hai tarlang a nih. Hi lai hmun hi Maoist hai nasataka an chetthlakna hmun a nih. Hliem paruk hai hi an inrik deu niin an hril.
Tuta ambush a um sipai hai hi 74th battalion, CRPF, anti-Maoist operation dinga hi lai hmuna sie lut an nih.
74th battalion Road Opening Party hai chu Chintagufa bul lai Burkapal ah an patrol a. Lampui siemthatna hmun lai meka enkaitu dinga sie an nih. Chuong lai chun Maoist haiin CRPF hai hi tawp loin an hung kap ta chur chur el a nih tiin Jitendra Shukla, Additional Superintendent of Police, Sukma chun a hril.
Report in a tarlang dan chun ambush tuok ROP party a sipai fe po hi 90 an nih a. A bulin Naxals hai chun hi lai khaw mi hai chu kan umna hmun en dingin an hung tir a, chu zo chun Naxals 300 bawr velin an mi hung bei a nih. Kei ni khawma kan kapin kan that rawn a, Naxalites pali vel an awma ka kapfuk tiin CRPF constable Sher Mohammed, hliem laia thangve chun a hril. CRPF kaphlum hai ralthuom, wireless le an thil pawimaw hai po po chu Maoist haiin a lal fai thip a nih.
Chhattisgarh CM Raman Singh khawm a Delhi fe ding program siem sa chu cancel in Raipur a pan ta lem a, emergency meeting a ko nghal.
Bastar Inspector General Vivekanand Sinha le Deputy Inspector General Sunderraj hai chu buoina hmun Sukma sir dingin an lo pan ta bawk. Hi lai District bawka hin kum bul khan CRPF 12 Naxal hai ambush naah an lo thi ta bawk a nih.
(Thlalak: Hliem sipai hai Helicopter in an phur lai).
COMMENTS