Tuolthattu Popkov
Fox Journal | CCPur: Court ah nuhmei iengzam suollui in I that taa ti zawna indawn a ni chun, police officer bang Mikhail Popkov chun chieng takin ka hril thei nawh, a record tha taka ka lo sie naw leiin tiin a dawn a. Tuta kar khan a dawnna chieng lem a siem tah a, nuhmei a suollui le a that zat nia hriet thei ta po chu nuhmei 82 an na, hi neka a tam ring a la nih.
Kum 52 mi Popkov hi mi tuolthattu rapthlak tak a ni a, kum 2015 khan Angarsk, Siberia, Russia hmunah nuhmei 22 neka tam thatna leia a thiemnaw inchangtir a umin a damsung lungin a intang dinga rel khum a lo ni tah.
Tuhin a hektuhaiin Popkov hi tuolthatna case 60 neka tamin an hek belsa nawk a nih. Ama hi pa tha tak anga hun hmang, a nuhmei ta dinga pasal ditum le Police officer inpe zo tak lo ni hlak a nih.
A mi that hai hi a tlangpuiin a that zoin an ring ah a atbawng hlak a. A then an lung a lakdawk bawk. A tam lem hai chu a that hma le a that hnungin a suollui deu vawng.
Case pakhat a chun Popkov hin a naunu kaina school a hotu pakhat a ithat, a vuina dinga thawlawm dawl a khawm tha takin a pek. A dang nawk a chun concert a fe nuhmei student pahni hai chu a Car a phurin a that nawk ve ve niin Daily Mirror report chun a zieklang. Hienga hekna thar hai leia thiemnaw inchangtir a ni vai chun khawvel history a mi thattu rapthlaktak a ni ding a nih.
Detective hai chun Popkov chu nuhmei pasal thilah a chau tak leiin kum 2000 inthawk khan tuolthatna le suolluina a tawpsan tah niin an hril a. Amiruokchu, charge thar hung um hai hi kum 2010 laia thiltlung dam an nih tiin an file na chun a um. Detective hai bawk chun Popkov anzin hun lai mi that a nei le nei naw an la suichieng naw a, an suichieng hunah nuhmei 82 neka tamin a kaisang ngei an ring thu an hril.
Labels:
NewsSHARE:
COMMENTS