The Machine Gun Preacher tia hrietlar Sam Childers hi 1963 kum khan Forks, North Dakota hmunah a pienga, a pa hi thir siemna hmun a sinthaw niin a naupanglai hun hi hmun dang dangah a pa sin lei hin an insawn kuol hlak a. Piengpui unau pathum neiin ama hi an unaua naupang tak dawt a nih. An unaua a naupangtak le an farnu neisun chu an chinlai lung tieng that naw leiin kum khat a tling hmain a thi a nih.
Mi tamtakin ei hrietlar Machine Gun Preacher film hmu nuom um tak el, Marc Forster a i direct le Gerard Butler in an chang kha ama Sam Childers a chanchin besana a siem a ni a. Ama hi kum 12 a ni khan a pa sin leiin Grand Rapids, Mennesotaah umhmun khuorin an sungkuo in an insawna. Hi taka inthawk hin a hringnun nasatakin khawvel suolna, inruithei thil chi dang dang hieng zu, ziel, ganja le heroin haiin a sukbuoi tan a. Hi kum hin a school kai khawm chu zawm talovin kha lai huna thil inlar tak el motorcycles khal pawl (Gang) hai chu zawmin hringnun a hmang tan a. Chuonga inruithei thil leh hringnun a hmang zing lai chun tuta a nuhmei Jaszper leh hin club a intawng fu in an inneia, nau pasal pakhat le nau nuhmei pakhat an neia, an naupasal pa hi kum tam a ni hmain Sam a sangnu ang khan a thi ve a. A nuhmei khawm hi club stripper a ni nghe nghe! Khawvel suolna lampui chu hrawin hringnun chu a hmang zawm peia sawrkar hmelma a siemin inruithei thil a zawra, khawlai dunga mi le insuol ti hai chu a nitin nun a nih. Hi bak a hin drug dealer hai vengtu sin thawin iemani chen hun a hmang bawk.
Ngaituona nei mi invet ni lo na na chun a pa in a lo hril vet “I nun hi I sim vat naw chun, mi’n an la that ngei ngei ding che a nih” ti tawngbau chu a lungril a um ta zing ela, hieng lai hin a nuhmei Jaszper khawm chu a tleirawl laia a ilo maksan tah Pathien chu bel thar nawkin thang nasatakin a lak zing lai a nih. Chuong chun Sam khawm chu in siem that tumin inruithei thil a zawr hai chu la nghei naw sienkhawm a tawpsan a, inbawlna hmunah sin neiin nasatakin amaa suol um chu hne tumin a bei a, a zai a zaiin that tieng a hung pan pei le inruol chun Pathien remruot ni ngei dingin chuong lai tak chun Assembly of God kohran chun thlarau tienga dangcharhai inhmu khawmna hun an neia chun a nuhmei chun Sam khawm chu thuoiin hi taka hin a nih Isu tadinga an pumpek tanna chu.
Chuonga a hringnun hung inthlakdanglam pei chun Africa ramah rawngbawl dingin an thawk suok tan a. Kum 1998, kum tawp tieng chun Sudan a tlunga. Hi hi Sudana an zin hmasatak tum a nih. An zinna hmasatak tum le a hnunga an zinna haia khawm, nasatakin Lord's Resistance Army (LRA) hai thil thaw chu a hung inhmelhrietpui taa. Chu thil chu ama ngeiin 'suol theidaumtak' tiin a hril a nih. Sudana an zin hnung hun sawtnawteah Childers le a nuhmei Lynn chun Sudan simtieng pangah Angels of East Africa, the Children's Village an indin a. The Children's Village a hin tuhin naufahra 100 lai enkawlin lekha inchuktir an ni a, chun, indin tan a nia inthawk hin naupang 1000 chuong zet an sanhim ta bawk a nih. Hi Children's Village a thawktuhai hi Sudanese mi reng, fahra le hmeithai hai an nih.
Childers chun Africaa a tawnhriethai chu a lekhabu Another Man's War ah kimchang deuin a ziek nghe nghe.
Kum 2009, November thla chun Debra Peppers' television show Outreach Connection in Quincy, Illinoisah Childers chu an lang a. Hi taka hin Childers chun Uganda hmartienga naupang mana umhai a sansuok thu a hril bawk a nih.
Sam chun Pathien le an inkar chu siemthat zing a nuoma, a nun khawm thienghlim takin a khal a. Chuongchun, thil chu hung fe tluong peiin, an hringnun chu siet tieng nekin that tieng a pan pei a. A nuhmei Lynn chun nau nuhmeite ditum tak el a nei pek a, Sam khawm in bawlna tienga sumdawngin a sunghai chawmna dingin an rim a. An hmaah chona ropuitak phawr dawkin ala um ding a nih ti hrim an hriet nawh.
Kum 1998 chun Sam chu Sudan simtienga um khaw pakhat Yei an ti chu a tlung a. Hieng hunlai hi Africa rama indona, Second Sudanese War hunlai tak a nih. Sam chu Americaa an Pastor-in a ngenna angin hieng buoi laia in-hai siemthatu dingin mission group pakhata chun a thang ve a. Chuonga an thei ang anga mihai an thangpui lai chun, Sam chun naupang taksa, landmine a del puok leia inchen nenga um chu a hmufuk hlau el a. Sam chun chu chu a hmuin a dingthathuona, Sudan simtienga mihai chu a thei tawpa thangpui dingin Pathien kuomah thu an tiem tah a nih.
Thla iemanizat liem hnung chun Sam chu Sudanah kir nawkin mobile clinic a hawng a. A thutiem sukpuitling ngei tumin nasatakin a ram chu a fang kuol a. Yei thlangtienga inthawka Boma saktienga khuohai chu a fang a nih. Chuonglai chun, Uganda inri na, Nimule khuo a sir lai chun Pathienin a kuomah thu a hung hril taa. "Fahrahai enkawlna ding bawl dingin ka dit che a, hilai hmun ngeia bawl dingin ka dit che a nih" tiin Pathienin a kuomah thu a hril a.
Chuonglai chun, the Lord's Resistance Army, helpawl, nunrawng taka che hlak hai chun naupang 30000 lai thuoihmangin le a khaw mi a sangtel an that el bakah chu lai hmun vel chu nasatakin an suksiet a. Amiruokchu, Sam chu mi lunginuoi tak a ni a, a lungril chu thlak el a tum bik nawh. Pathienin naufahra in bawl dinga a tina hmun a ni a, a tina hmun ngeia bawl chu a tum tlat a nih. USA tieng kirin, a sumdawngna chu zawrin, a sum chu Africa tieng a thawn a nih.
Damte tein naufahra in chu bawl tan a hung ni a. Suna chun naupanghai umna ding chu bawlin hun a hmanga. Zana ruok chu thosilen keiin thingkung hnuoia zal hmun a rem hlaka. Chuonga a zal lai khawm chun a kut khingtiengin Bible a chawia, khingtiengin AK-47 a chawi hlak a nih. Chuong lai zing chun, Pennsylvaniaa a i maksan Lynn le a naunu Paige chun harsatna anni tawk tawkah an lo hmasuon ve a. An car chu a man an pek zo el naw leiin lak pekin an uma, chun, an in khawm lak pek dingin thu insuo khum an ni bawk a. Sam chun chu thil chu intlan dingin sum a neia, amiruokchu, a in intlan ding le fahra in bawl dingin a sum chu an dai nawa. Pakhat lem lem a thlang a tul a. Chuongchun, thuthlukna siemin, fahra in chu bawl zo lem a tum taa.
Nau fahra in chu a bawl zo chun, Sam chun LRA a inthawka naupang sansuok dingin silai leh Pathienthu leh a pen suok a. Hun sawtnawte hnungah a thil thawhai chu a hung indar ta nghal a. A khaw mihai chun, ama chu "The Machine Gun Preacher" tiin an ko pha hiel a nih.
Nau fahra in a bawla inthawka kum 13 zet a liem hnungin, Sudan simtienga fahra enkawlnahai laia a lientak a hung ni taa. Hi fahra in a hin naupang 1000 chuong zet umin an khawsa a nih. Vawisun hin hilai hmun, hi fahra in hi naupang 200 chuong zetin an in anga an ngai hiel an tah. Amiruokchu, Sudan rama naupang tamtak chu vawisunni chen hin rinumna nasatak tuorin, thangpui ngai ngawi ngawiin an la um rawp a nih.
Sam le Lynn chu an chengna in, Pennsylvaniaah an khawsa meka, Sudan rama naupanghai tadinga an thahnemngaizie le an invawizie chu kum 13 liemtaa ang khan a la pangngai zing a nih. Sam in a chanchin a ziekna lekhabu, "Another Man's War" chu Hollywood feature film a siem a ni a. Hi film hi September thla, kum 2011 khan khawvel mipuihai en thei dinga tlangzar a lo ni tah.
COMMENTS