Mi iengang khawm ni inla, mi in ei thu an awi chun ei lawm a, ei thu iengah an lo ngai rak naw chun anni kuomah hril kher naw inla khawm ei lung a awi ngai nawh. Hi hi mihriem hai khawma ei hriet em em. Ei thu awitu chu a duot khawm ei duot deu a, ei thuawinawtu chu remchang hun hunah hremna ding ei zawng nuom vieu. Hi thu hi Pathienthu kher lo a khawm an dik hle.
Hiengang char hin Pathien chun mihriemhai chu a thu awi dingin a mi tih a. Mihriem hringnun po poa pawimaw tak chu Pathienthu awi chu a nih. Mihriem in ei dit dana Pathienthu awi dingin a mi ti nawh a, Pathienin ama ti dan ngeia ama thuawi dingin a mi ti a nih. Adam thuawinaw leia thina hung tlung le Isu Krista thuawi leia hringna hung um chu mihriem hai po po a them phak a nih. Adam a thuawinaw leiin mihriem po po chu suolna le thinaah an tlu tah a. Isu Krista, “thi khawp raka thu zawm” (Phil. 2:8) leiin Pathienin ama ringtu hai po po chu a lo lawm lut ve a nih.
Thuthlung Hlui a chun Pathien ditsakna le lawmna mihriem haiin an chang ding a ni chun a thu awi dingin a tih a. Chu chu Exodus 19:5 ah chieng deuin an lang. Israelhai chu Aigupta rama inthawkin Pathienin a thuoisuoka. Sinai tlangah Mosie a hang kaia, Pathien chun Israelhai chu a thu awi dingin a lo infui a, a thu an awi a ni chun hnam dang po po laiah a ta dinga ro bik ni dingin a lo hril a nih. Chu zo chun dan sawm a pek tah a. Dan sawm hai bak a hin Exodus, Leviticus, Nambar, Deuteronomy hai ei hang en pei lem chun dan chi dang dang a tam em em el. A zawm el chu thu dang nisien, Bible a inziek tasa hang tiem ringawt khawm pei um lo hiel a nih. Hieng dan hai po po hi hraw khawm harsa tak tak an nih a. Hieng dan hai hraw a ni chun Pathien lungawi a ta, hraw a lo ni naw a ni chun hremna chu an tuok el ding a nih. Chuongang ngei chun Israelhai khawm an thaw nasa hle, a changin hremna an tuoka, amiruokchu Pathienin a humhim ve tlat bawk a nih.
Eini rawi ni inla chu mei le katin a kanghlum ding pawl leh, hnuoi kak in a lem hmang ding pawl leh inkat deu nuk mei ei tih. Ei dit danin a thu mihriem in ei lo awi tum hlak leiin mihriem in ei thaw suol rawp hlak a. 1 Samuel 15:22 a khawm khan hienghin an ziek: “inthawina nekin thuawi chu a tha lem a, beram chal thau nekin a thu pawm chu a tha lem a nih.” Lal Saula chu Pathienin Amalek mihai do a, sukbohmang vawng dingin a hril a. An thil nei po po, nuhmei le pasal, naute, nene ne laihai, bawngchal, beram, saringsei le sabengtung hai iengkhawm hla loa sukbohmang vawng dingin a hril a. Amiruokchu, Lal Saula chun Amalek lal Agag le ran ruol a tha a ti ti chu a hung hla a. Lal Saula ngaidan chun beram le bawngchalhai chu Pathien kuoma inthawinaa hung lak chu thilpawi a ni nawh. Thaw thaah an ngai lem hman hman a nih. Pathien a lung a sen em em. Mihriem ngaidan le Pathien ngaidan an ang nawh. Pathienin a ti chun a ti a ni el. Mihriem in ei remchang dana ei zui hi a ti zawng ni kher naw nih. Lal Saula kuomah Samuel chun, “LALPA thu idit naw leiin ama khawma lal dingin a dit bik ta naw che” a ti thuoi el. A va pawi de aw!
Thuthlung Thar a chun Isu Kristaa ringna innghat ding ei nih ti ei hmu a. Hebrai 5:9 a chun, “...a [Krista] thuawi po pohai ta dingin chatuona sandamna bulpui a hung ni tah a” tiin an ziek. Hi hi Pathien thupek a nih. 1 Johan 3:23-24 a chun, “A thupek chu hi hi a nih, a Naupa Isu Krista hming awi inla, ama in thu a mi pek angin inhmangaituo bawk inla. A thupekhai zawm chu ama ah a um zing a, ama khawm chu ama ah a um zing bawk a nih” tiin a hril. Kristien ei ni chun hi thupek hi ei zawmin a thu ei awi ding a nih. A san chu ringnaw chu thuawinawna a ni sih a.
Aw leh, ei ni tulaia Kristienhai ta dingin thuawina chu iem ni tang a ta? Isu Krista thuawi chu a nih. Thienghlimnaa Pathien hnungzui ding ei nih a, thuhnuoirawl le hmangaina neia Isu Krista anga um ding eini bawk a nih. Lunginsietna ei dawnga ei lawm leia hieng thil po po hi hung suok ding a nih a. Ei sungkuo, kohran le khawtlang a chen khawm hotu hai thu khawm ei awi ding a nih ti Bible in a min chuktir bawk a nih. Pathienthu chau awi ka ta, sawrkar, khawtlang le kohran thuoituhai thu chu awi ding an ni nawh ti hi thil indik lo hulhuol a nih. Hi lei hin tam tak chun an thaw suol rawp hlak.
Ephesi 5:22 a dam, 6:1 a dam sungkuoa luah intuklut ding ei ni thu hmu theiin a um. Kohran a khawm thuoituhai kuomah intuklut ding ei nih. Hebrai 13:17 a chun, “In hotuhai thuawi unla, an thu thu in um ro; chanchin hril ding an ni leiin, lungngai puma hrilloa, hlim puma an hril theina dingin, in thlarau an veng pek hlak cheu a nih” a tih. Khawtlang le sawrkar thuoituhai kuoma khawm ei intuklut ding tiin Bible chun chieng deuin a mi hril a. Rom 13:1 a an ziek hi Pathienthu a ni naw hei ti chun ei nuom dan in um ei ta, amiruokchu Pathienthu a ni hei ti a ni chun ei zawm a ngai a nih. Hieng hin an ziek, “Mi tin an chunga roreltuhai thu thu in um raw se. Pathienthu loin tukhawm roreltu an um ngai si nawh a; roreltu a um hai hi Pathien i ruot an nih.” Hi bak a hin roreltuhai kal chu Pathien i ruot kal an nih a ti tawp el. 1 Peter 2:13 a khawm, “Lalpa leiin mihriem ruot hai taphawt kuomah in tuklut ro” ti ei hmu a, Tita 3:1 a khawm a lan zieksa nawk rawp. Chuong a nisi chun eini hi ei inngaituo a va ngai nasa de. Pathienthu ei awi khel a khawm insunga nu le pain dan an siem, kohranin dan a siem, khawtlang le sawrkarin dan a siem hai khawm hi ei hraw a lo ngai a ni chu tie. Dan ei ti hin tuol that lo ding ti amani, ruk inru lo ding ti hai khawm an ni ngei el a. Amiruokchu ei ni ruok chun a then chau zawm ei tum a, a dang hai ruok chu ei ngai thupui nawh. Ei ni remruotnain thu ei awi a lo ni zing hlak a lo ni ding awm a nih. Insungah nu le pa annawleh insunga a lu takin thaw dinga a mi tihai dam, thaw lo dinga a mi tihai dam hi a ni dan ding anga ei thaw chu ei mawphurna a nih. Chuong ang chun kohran a khawm kohran thuoituhai thuhril amani, kohran dan amani le doctrine tha taka ei zui chu ei thaw ding a nih. Mani tiengah Pathien thu inti hrie em em leia kohran hotuhai hmusit amani dam hi thil um thei a ni leiin fimkhur a ngai hlak. I remruotna le nang a tha ti ringawt ni pal thei a nih.
Pathienthu a kher naw khawm nisien, thil thaw ding le thaw naw ding thil a um hi tie. Thaw naw chi nia ei hriet si hai –mi in off dinga an ti lai zinga Biekina mobile khel ti hai dam, mani neka upa lem inzahai le an thuawi ti hai dam, electric a man pe si loa lo inruka a var hnuoia Bible dam tiem ti hai po po khawm hi ei Kristienna le inhme lo vawng a nih. Ei Kristienna hi ei in ennawn a va ngai ta de aw. Thlaraua inti hrat vieu, a bul thut indiksi lo ei nih. Foundation dinga phaiphin ringawt vur pawnga, in sawng thum sawng li bawl ang ei nih. Phaiphin foundation chunga insawng a inthawkin foundation deta um, insawng insang naw lem a um hai hmusit chu mi invet thaw dan a nih.
Thuawina ei ti hi an lang chau thuawina a ni nawh a, Pathien le ei inkar, mani sunghai le ei inkar, khawtlang le sawrkar chena ei kar ei suk fel chu thuawina indik ning a tih.
(Thalai Weekly)
COMMENTS