Fox Journal | CCPur: US chun "MOAB" (Mother of All Bombs), non-nuclear Bomb laia len tak chu ISIL hai bunker le puk umna hmun Afghanistan saktieng panga mi chu an thlak khum niin Central Command (Pentagon) chun a hril.
Hi non-nuclear bomb GBU-43 hi zani Ningani khan MC-130 aircraft hmanga Achin District, Nangarhar province, Pakistan ram inrina le inhnai te chu lai hmuna chun thlak a nih. Hi Bomb rik dan chu KG 9,797 a rik, GPS hmang a ni a, ensinna hmasatak chu March 2003, Iraq War intan hma ni tlawmte la bak khan hi Bomb hi ensin a nih. Tuta mi hi buoina le inzawma vawikhat hmangna a ni bawk.
Hi strike hi thaw a ni nasan chu Afghan le US sipai haiin hi lai biek operation an thaw thangpuina dinga thaw a ni thu US Central Command (CENTCOM) chun a hril a. Amiruokchu, hi bomb hrattak el, TNT tonne 11 a rik le inhen tawk, km 1.6 sung blast radius nei hin civil mi pawi tawklo tam tak a tawksa thei dinga ring a nih.
ISIL sipai 36 an thi ti report a ni a, ISIL hai hnuoiver inthuk tak el khawm suksiet a ni sa bawk a, civil mi ruok chu a tuor an um naw niin Afghan Official chun a hril.
Hi le inzawm hin US President chun mitin in ieng ang thil am a tlung ti chu chieng takin an hriet seng a, ka sipai hai chu enkawlin thu ka pek a nih. Khawvela sipai ropui tak el ei/kan nei a, an ni chun an sin pangngai an thaw a nih. Hi thaw na ding hin phalna tluong tak el pek an nih tiin a hril.
US Official record dan chun ISIL hai hin sipai 700 vel an nei niin a hril a, amiruokchu, Afghan Official thusuok chun Afghanistan ram sungah ISIL sipai chu 1,500 bawr vel um dingin an ring thu an hril thung.
Chuong lai zing chun, Beijing chun vawisun khan US chu North Korea chungah iengkhawm thaw lo dingin a vau ti ti. North Korea chun an hotulien Kim Jong-un in thu a pek hun hunah an Nuclear ralthuom an ensin ding thu an puonglang leia US in Nuclear Ralthuom North Korea in ensinna a nei vai chun a en liem el naw ding thu a hril leia hieng ang innghirnghona thil hi a hung suok pei a, tulai hin an kar thu hi a tang tha em em.
US, S. Korea le N. Korea hai chun mit aia mit, ha aia ha tiin an chem sei le an thal hai keidawk in an incho nasa hle niin China foreign minister, Wang Yi chun a hril a. A tu tieng tieng khawm incho tuona le inthithaina, thu le thilthaw a tawpsan dingin ei ngen a, tuta ngirhmun hi keikir thei ta naw na le sukre thei ta naw na chen intlungtir lo dingin Mr. Wang chun Xinhua News Agency a hril. A tu tu khawm ni hai sienla, Peninsula hmuna indopui suksuok tuhai chun an liengkoah iengkim innghat an ta, an phutawk ang lawmman pek ni bawk an tih tiin a hrilsa.
Chanchin suitu thenkhat chun US in thaw lo dinga a ti lai zingin satellite thlalak a inthawka hmu angin N. Korea chun hnuoi sungah nuclear ralthuom ensinna a nei vat ding a hawi niin an hril. US chun a Navy strike group aircraft carrier Caro Vinson chu Peninsula tieng ngha in a thuoikawi ta bawk. Hi le inzawm pei hin N. Korea Vice Minister - Foreign Affairs, Han Song-ryol chun America chu an President thar Trump hnuoia hin an suol hrat hle a kutthlak an nuom zing el hi an nuom a ni chun indo dingin kan inpei ti'n a hril.
Japan PM Shinzo Abe chun N. Korea chun ni khat laia Syria rama civil mihai chunga hmang ang Sarin thangna missile kapdawk thei ding ang rana um chu a ngaimaw thu a hril ve.
N. Korea ruoltha Russia chun rambung tum tum hai chu thil tha naw le ditum lo a suok nawna dinga hnungkir seng dingin fielna a siem ve a. S. Korea, US ruoltha khawma US chun Peninsula hmuna indopui chawksuok thei ding thil a ruoltha S. Korea hrietpuina thang lova thaw lo dingin a ngen ve.
Beijing hmuna Mr. Wang chun N. Korea ralthuom le inzawma inbiekna thar um theina ding beisei a um thu a hril a. Inbiekna formal am informal, a ieng iengkhawm um sien, China chun a thlawp ding thu a puong a. Chuong lai zing chun, US chun N. Korea chun a Nuclear program titakzet a a suktawp ding thu a hrillang hma chu inbiekna nei a ni naw ding thu a hril ve thung.
COMMENTS