Fox Journal | CCPur: Nagaland Chief Minister Shurhozelie Liezietsu chun vawisun Manipur khawpui Imphal a hung sir hun ah, Manipur a BJP sawrkar thar hung inthut naa chun inremna le inhrietthiemna hun thar India hmarsak biel a dingin a eng tan mek a. Meitei hnam hai chu a hmasawn pawl tak an ni leiin unau laia a upa tak nina thiem taka kengkaw a, hnam dang an neka naupang hai thatna ding tha taka ngaituo pui dingin a hril.
Hun liemta haia Nagaland le Manipur inkara inhrietthiem nawna um hlak chu hrilin, amiruokchu, chu thil chu sawrkar thar hung um le inruolin a bo tah. Hnam tum tum hai laia hun liemtah a kan hotu thenkhat haiin mani hmasielna leia ngirhmun thalo tak an lo chawksuok leiin pawi kan tih.
Tuhin chu mipui haiin beiseina thar le inremna a hung um thei ding niin sawrkar thar hung ngirsuokna le inzawmin a hril.
Nagaland a BJP le NPF thangruolna chun thenum state hai ta dingin nghawng tha tak a nei thu a hril a, Manipur CM N. Biren kuomah NPF MLA pali hai chun a tawp chen an thlawp zing ding tiin Liezietsu chun thu an tiem.
Manipur ah CM thar in hnena a hung chang khan kan hratna angin ka lo ngai tiin NPF kumhlun Nagaland CM chun a hril.
Nagaland CM chun India hmarsak biela hnam tum tum cheng hai chu ei mamaw thil hai an ang vawng a ni leiin inlaichinna tha tak ei mamaw thu le Meitei hai chu unau laia upa tak anga khawsa dingin thurawn a siem. Manipur a hnampui tak le hi lai biela hmasawn tak tiin Meitei hai chu an pak a. An ni hin ziekmi tam tak le lekhathiem an nei a, inremna le muongna ditum tak a um theina dingin thang hung la raw hai sen tiin a hrilsa.
Inlaichinna lo se ta bek bek el sukbotu hi inchik tlak tak meeting a hin Liezietsu chun inbiekna tam lem la nei pei ning a ta, inlaichinna hi an thutna bit, nghet tak el a ni ngei ding a nih a ti a. Zawna pek a um dawnin, hun liemtah haia khan Blockade chu a hluor em em a, tuhin chu khang kha hunin a liempui an tah tiin a hril.
Ei pi ei pu hai kha unau tha tak an lo ni tawl a, tlangram le phairam mi hai chu inrem taka khawsak tlang dan inchuk ding a nih. Meitei, Naga le Kuki hai chun hmasawnna chu inremna chauin an tlun thei a nih ti an hriet a tul tiin a hrilsa bawk.
Manipur CM N. Biren chun Nagaland CM zuk ko dingin kum naupang lem a ni si leiin a lo buoi thu a hril a. CM Liezietsu, TR Zeliang le Minister Yitachu hai hung chu chawngpu nina anga hung an ni a, agenda dang a um naw tiin hrilfiena a siem.
Nagaland CM chun BJP sawrkar tharna ni 40 sung ah tlangram le phairam ah boruok zalen le zangkhai tak el a um thei chu inpakum a ti thu a hril tiin CM, N. Biren chun a hrilsa.
COMMENTS