Fox Journal | CCPur: N. Biren, CM, Manipur zani May 5, 2017 a JNIMS hmun a function a thangnaa chun India in zalenna a hmu zo kum 70 lai ni ta khawma Tamenglong District ah hmasawnna a um naw taluo chu mak a ti thu le a lawm naw thu a hril.
Tarik 4 May, 2017 khan CM Bungalow ah Tamenglong District review meeting a nei pui nghe nghe. District pumpui ah water supply scheme pakhat chau a um a, electric ban tlawm leiin meivar hmu lo tam tak an la um bawk.
Hieng lawm lawm a hmasawnna um lo el hi a suitu ding Official team, Commissioner of Health inrawina in Chief Engg., PWD hai chu tir an nih.
JNIMS a hunser hmangnaa a thangna a hin thu tam tak a hril a, chuong hai laia CM, N. Biren thuhril hai thenkhat, a hnuoia ang khun ei hung lakdawk a nih.
Thla liemta haia passenger motor inzing ut a siet tuokna tlung chung thu ah CM N. Biren chun, "A san pakhat chu transport department a inthawka license indiknaw taka pekdawk a um hi a nih. License tehlem pe dawktu a thang hai chu hrem ning an tih."
Phalna nei loa motor check hlak VDF le Police hai a sawiselnaa chun hieng hin a hril, "Motor documents le inzawm a check hai chu VDF le Police ni loin traffic department hai mawphurna pek an nih. VDF le Police haiin phalna nei loa motor an check hriet a ni chun dan ang takin hremna pek ning an tih."
Mob justice le inzawmin hieng hin a hril, "Khawtlang hmasawn hai ta dinga entirna ditumlo tak a nih. Stone Age a kir nawk ang a ni a. Hieng ang thiltlung hi thuneitu bik haiin hma an lak vat naw leia tlung hlak a nih" tiin Manipur CM, N. Biren chun a hril.
SHARE:
COMMENTS