Ziektu: VL. Khawbung
United State Of America (USA) West Virginia State Grafton sim tieng pang, thingtlang khuo chiterek Wabster khuoah 1 May 1864 khan naute a hung pieng a, chu naute chu, naute danghai neka pieng nal le hmeltha bik em em ni naw sienkhawm, khawvel mi ropui laia tiem sa thei hiela nuhai chawimawina chang hrie, Mother's Day hmusuoktu Anna Marie Jarvis ani tlat.
Ana Marie Jarvis hi Granville le Anna Marie Reaves Jarvis hai nau neisun ani a, anu Anna Marie Reaves Jarvis hi kohran le khawtlang ta dinga mi thahnemngai tak el ani a, a rawiin Mother's Day Work Clubs dam an indina. An khuo le hmun dang danga hai mi ha'n hriselna tha an nei theina dingin kawtthler, lampui tuilungkawr(canal) hai sukfai in mipui ta dingin theitawp an suo hlak anìh. Kum 1861 American Civil War lai khawm khan an khuo Wabster hi hmun pawimaw tak ania, chuong chun indona a hliem tuor tam tak hai sawmdawlna a theitawpin a thaw hlak bawk a nih.
Thing del lo lung dello na na chu Anna Marie Jarvis khawm a hung puitling ve peia, an chûkna khawm Marry Baldwin College Stauton, Virginia a chun a hung Graduate ve ta a. Sienkhawm, vangduoi thlak takin kum 1902 chun a ngai em em a pa chun a boral san ta hlau el a. A pa thi hnung chun anu leh Philadephia-ah an inpem ta a. Chuonga a nu le hlim taka an um lai chun, anu khawm chun kum 1905 May thla chun a thi san nawk ta a; a beidawng thei em em a, harsatna popo in a tuom vel ni'n a hrieta; a ngaituona hai khawm chu muolkhat khawm an vungkum tir thei naw a, a beidawng hle anih. Ani ngei maw, hringtu nu le pa um ta lova damlaini hringnun hang hmang ding chu beidawng um hleng a tih.
A nu ruong chunga chun, nu lo ni ta hai le la hung ni pei dinghai ta ding chun thil iemani bek thaw dingin an tiem ta a. Kum 1907 anu thi champha a hungin hersuok chun, ama ngainatu le a ruoltha hai a fiel khawma; chumi ni chun anu ruong chunga thu tiem a lo nei ta angin, Nu hai ni (Mother's Day) inser a nuom thu chu a puong ta a. A ruolhai khawm chun tha an tipuia, an hlim em ema, an kohran St. Andrew's Methodist Episocopal Church West Virginia-a mi thuoitu hai khawm rawnin hi ni hi Mother's Day ti a hmang dingin thu an thlung ta anih. May 1908 chu Mother's Day ni dingin an hmang tan ta a, hi kum vek hin American Young Men's Association chun America rama kumtin hmang dingin an nawra, chuong chun, America Kohran pawl hrang hrang hai le Politician hai lekha an thawn dara; theitawpa lo zawm ve dingin hma an lâka, kum 1912 General Methodist Conference, Mineapolia chun Anna Marie Jarvis chu Mother's Day hmu suoktu ah a puong ta anih. Chun, kum 1914 chun USA President Woodrow Wilson chun rampuma hmang ding May chawlni vawihnina chu Mother's Day in a puong ve ta bawka, kumtin USA ah state 46 baka Canada le Maxico hai thangsain an inser ta anih.
Hieng ang hi Mother's Day hungsuok dan ani si chun a hlutna ang tak tak hin ei hmang am? Nu hai hlutna le an mi hmangaina ngaituo si lovin hmang liem mei mei ei tih ti inlau a um takzet. Khawvela trawngbau mawi tak chu "Nu" ti hi anih. Ienga insuk pa em em khawm harsatna vawrtawp an tûk meu chun, nu ngaiin an khek rawng rawng el hlak anih. Nu hmangaina hlutzie hre thara, bultan tha dingin tiemtu hai popo ka fiel cheu anih. Kum khatlaia ka ruolnu Message ka thei nghil thei naw chu hi hi anih "I nu kha hmangai la, chawimawi rawh" ti hi.......!
Date. Mauchar, Sinlung Hills. 7 May, 2011
COMMENTS