Vawisuna Kristien inti, mi ringum ve tawka inngai, Pathien khawm tia inngai le insalhai hi mi hmu laia chu a tak le a tak naw hriet hran intak vieu ei tih. Amiruokchu mani khata ei um hun a hin a tak am ning ei ta a tak lo?
Hi hi ei reng a ei ngaipawimaw ding thil chu a va ni ngei de. A lang a chang a chu mi ei vengna lei damin thatak angin ei inlanga, anachu ei khat chaua ei um hin ieng thil am ei thaw nuomin ieng thiltha am tha naw am ei ngaituo hlak ding maw le?
Hla a chun, “Krista ngaituo bukna chu hmabak sengin ei um, a tak bit le kawrawng chu a bukin an lang hlak” a tih a. Buka ei um pha chun a kawrawng, a puo tienga tha vur chu nakie a lan lang ngei ngei ding a nih. Hi hi ei hmabak seng chu a nih a, ei pumpel thei chi a ni nawh.
Annawleh, midang po poin khawvel leh an inchalrem hnungah ei ringna leh inrem si naw sien iengtin am um ve tang ei ta? Iem thawng ei ta? Hi khawm hi ngaituo tham a tling a nih.
Ruol le pai, vai ram le hla rak lo, Imphal a ringawt hman Kristien ei nina (sandamna thu kher lo a khawm) ei suklang ngam naw nghal a ni chun ei va chau awl awm de. Kristien inti ngawt lai a khawm a lang a changa nina suklang ngam lo ei um der tah ana. Ei nina hi a va dain ava dau hrat de.
Iengkhawm nisienla, ringtu hi mani khat khawma um inla annawleh, ringnawtuhai lai khawm um inla, a hlimthla chau ni loin a tak bita um ngei chu ei thaw ding a nih. Rorelna ei hmasuon zinga, chu hun a chun a tak bitna tieng thang seng ei tiu. Chu ding chun, “lung pum le a hmangruohai nguntakin zawng ve la, Kalvari tlanga inthawk, hmangruo kim la vawng la, rinum hung tlung lai khawmin hla sak thei ngei i tih.” (Hi thuziek hi May 7, 2017 issue a Thalai Weekly Editorial a nih/Fox Journal).
COMMENTS