Fox Journal | CCPur (HT): Mi ringum taka inthawka chanchin ei dawng danin June 20 le 21, 2017 zan karlak dar 1 bawr vel khan hmelhriet ngailo hmaituom le ralthuom chawi hai chu Tipaimukh Sub-Div. sung a Ankhasuo khuo ah va lut in Doctor le Nurse hai an sawisak bak ah an mobile phone le pawisa kawl hai an lakpek hnung in an fehmang san.
Ei thu dawngnain a hril danin Doctor le Nurse va sawisaktuhai hin AK-47 le silai tha an chawi tawl a, mi 6/7 vel niin a hril a, mit a hmutu hai hril dan chun uniform dum an inbel niin a hril bawk.
Hi thiltlung an hriet le inruolin khawtlang thuoitu hai le Assam Rifles thangruol ha'n an vawzui nghal a, sienkhawm hi thu ei sut chen a hin doctor le nurse sawisaktuhai chu man an ni thu hriet a la ni nawh.
Sawisakna tuok Doctor le Nurse hai hi thlabar taka an siem leuin khawsung mi hai chun khuo suoksan lo dingin an thlo a, sienkhawm um nuom ta lovin Ankhasuo hi an suoksan vawng tah niin ei thu dawngna chun a hril.
Hi thiltlung dodalnain zanikhan khawtlang mipui chun lampui hrawna neiin sawrkar thuneituhai chu hienganga nunrawng taka che hai hi mansuok a hremna pe ngei dingin sawrkar an ngen.
Hienganga nunrawng taka che hai hi tu ha'm an nih ti chieng taka hriet la ni naw sienkhawm an tawng hmang a inthawk chun ei tlangval hai chu anni an ring naw thu ei thu dawngna chun a hril.
COMMENTS