Fox Journal | CCPur: District thar Pherzawl mipui hai chun a vaiwkhatna dingin an harsatna hai A. Tombikanta, Deputy Commissioner (DC) le Additional Deputy Commissioner (ADC) kuoma zalen taka intlunna hun, liemtah Ningani khan People's Day, Pherzawl district ngei ah an hmangve.
Village authority, village chief le mi dang dang Parbung, Thanlon sub-div. a inthawk le khuo dang dang a inthawk Pherzawl DC Complex ah an harsatna tuok hai hril dingin an pungkhawm tawl.
District administration, Pherzawl chun complaints 45 lai zet an dawng a, Police personnel tlawm thu, doctors huntawk um naw thu, school a zirtirtu tlawm el bak ah dar 8 a kai tanin chawhnung dar 2 tin ti hai dam a nih.
Mipui hai ni a hin Pherzawl District sung a SDO dang dang Thanlo, Vangai range le Parbung a mi hai an thang tawl a, District level officer (DMO) hieng ZEO, PHED le Army hai khawm an thang bawk.
Mipui in an thil ngen dang chu Bank sie lut ding, khuo a hai kawlphetha meivar in tlung tir ding, lampui tha tak siem ding le inbiekpawna ding phone network tha huntawk siem ding bak ah National Food Security Rice hnuoia bufai an hmu naw thu chu District Administration kuoma an intlun sa.
Fekhawm hai laia pakhat in naupang hai ta ding a Aadhar card registration le NPR (National Population Registration) thaw ding a rawtna a hung siem chun thuneitu hai na a ver hle bawk.
Hi huna hin officer thang hai chun DRDA funds hai chu tukhawm a suk chingpen lo ding le CCPur a inthawk a thawktu sawn a um hai chu chel tang lo dingin an ni tieng a harsatna thu an hril ve.
A. Tombikanta, DC Pherzawl chun complain hung lut tlangpui hai chu buoina pangngai deu vawng a ni a. Nisienkhawm, Chief Minister thangpuina naw chun DC khat chau chun hieng harsatna hai hi sukkieng thei a ni naw thu Media hai a hril.
Darthangsei, Pherzawl HSA thuoitu chun Manipur CM in hieng anga hun tha, mipui haiin an harsatna thuneituhai kuoma an intlun theina ding a hung siem chu lawmum a ti thu a hril. Chun, CM hin hi District hi inzanain an hmatieng hung sir vat sien tiin a nuom thu a hrilsa bawk.
Mipui haiin an hung intlun hai hi ngaithlak le inchik vawng a ni a, DC le ADC hai chun DLO hai leh hriltlangna nei nghalin an ni theina chin ah an thei ang anga suk puitling le hma la dingin an hril niin chanchin ei laksawngna chun a hril.
COMMENTS